Yĩla Twakwatwa Nĩ Mĩisyo Mĩthũku Vyũ

“Mbeenĩ, tweewʼaa tũkwʼĩte ngoo mũno vyũ. Yĩla kwauie mbua yaĩ na kĩwʼũ kingĩ na yatuma kwambĩĩa kũombokanga, syĩndũ sitũ syonthe nĩsyaanangĩkie.”—Andrew, kuma nthĩ ya Sierra Leone.

“Ĩtina wa kĩuutani kĩnene kũthela, nĩtwasyokie mũsyĩ kwitũ. Twavika tweethĩie syĩndũ syonthe ila twatiĩte ite vo na ũu watuma tũtelema mũno. Mwĩĩtu wakwa atulilye ndu na ambĩĩa kũĩa.”—David, kuma Virgin Islands.

ETHĨWA nĩwakwatiwe nĩ mũisyo mũthũku, no ũelewe ũndũ andũ ala makwatawa nĩ mĩisyo mewʼaa. Andũ asu nĩmatelemaa, nĩmewʼaa ta mate andũ ma vata ĩngĩ, nĩmasaanĩawʼa, nĩmemakĩaa, na mekalaa me na wia. Andũ aingĩ ala makwatawa nĩ mĩisyo nĩmewʼaa matũlĩkĩte ngoo na me anou mũno nginya ũkethĩa maikwenda kwĩkĩa kĩthito mekale ũndũ mekalaa tene maũndũ matanamba kũthũka.

Ethĩwa nĩwaĩtye syĩndũ syaku syonthe nũndũ wa mĩisyo, o naku no wĩwʼe ta ũte na vinya wa kũendeea kũmĩĩsya. O na no wambĩĩe kwĩwʼa ta ũtaĩle kũendeea kwĩthĩwa thayũ. Ĩndĩ o na ũu wĩ o vo, Mbivilia nĩyonanĩtye kana no wĩthĩwe na kĩtumi kĩseo kya kũendeea kwĩthĩwa thayũ na kwĩkwatya kana ĩvinda yũkĩte yĩkeethĩwa yĩ ĩseo.

KŨMANYA ŨWʼO WA MBIVILIA NĨKŨTŨNENGAE WĨKWATYO

Ĩandĩko ya Mũtavanʼya 7:8 yaasya atĩĩ: “Mũminũkĩlyo wa ũndũ nĩ kavaa kwĩ wambĩlĩlyo.” Ĩtina wa kũkwatwa nĩ mũisyo, no ũtate vyũ kwĩkala ũndũ wekalaa maũndũ matanathũka, ĩndĩ ũyĩwʼa vatatonyeka. O na ũu wĩ o vo, manya kana maũndũ no maseũve weethĩwa na kĩthito na waendeea kwĩthĩwa na wũmĩĩsyo yĩla ũkwĩka ũu.

Mbivilia nĩwetete ĩvinda yĩla ‘kũtakewʼĩka ĩngĩ wasya wa kũmeta na wasya wa kũĩa.’ (Isaia 65:19) Wathani ũsu ũkeanĩa ĩvinda yĩla nthĩ ĩno ĩkethĩwa yĩ vandũ vaseo va kwĩkala ungu wa Ũsumbĩ wa Ngai. (Savuli 37:11, 29) Andũ maikakwatawa nĩ mĩisyo. O na maikalilikana maũndũ mathũku ala mamakwatie nũndũ wa mĩisyo, nũndũ Ngai Mwene Vinya Wʼonthe athanĩte atĩĩ: “Maũndũ ma mbee matikalilikanwa, o na matikalika kĩlilikanonĩ.”—Isaia 65:17.

Kwasũanĩa ũndũ ũũ: Mũmbi waitũ nũvangĩte ‘kũtũnenga wĩkwatyo mũminũkĩlyonĩ witũ.’ Ndeto isu syĩonanyʼa kana Ngai akatuma twĩkala thayũ mũseo ũte mathĩna ungu wa Ũsumbĩki wake mũlũngalu. (Yelemia 29:11) Yo kũmanya ũwʼo ũsu wĩ Mbivilianĩ no kũtume wenda kũendeea kwĩkala thayũ? Ũla mũndũ mũka wĩtawa Sally ũwetiwe mbeenĩ aĩtye atĩĩ: “Kwĩlilikanyʼa ĩũlũ wa maũndũ maseo vyũ ala Ũsumbĩ wa Ngai ũkeanĩsya kwondũ witũ ĩvinda yũkĩte no kũũtetheesye ũeke kũsũanĩaa mũno ĩũlũ wa mathĩna ala maũkwatie, na ũiendeea kũmĩanĩsya na maũndũ ala me vo yu.”

Wĩona ata ũkemanyĩsya mũnango maũndũ ala Ũsumbĩ wa Ngai ũkeka kwondũ wa andũ? Kwĩka ũu no kũũtetheesye kũmanya kana o na kau nũkwatĩtwe nĩ mathĩna, ve kĩtumi kĩseo kya kũendeea kwĩkala thayũ weteele mũno ĩvinda yũkĩte yĩla ũtakakwatwa nĩ mathĩna. Ĩndĩ ĩvinda yĩu yĩtanamba kũvika, ĩvindanĩ yĩĩ no ũkwate motao maseo kuma Mbivilianĩ ala matonya kũũtetheesya kũmĩĩsya mathĩna ala maũkwatie nũndũ wa mĩisyo. Kwaeka twone ngelekanyʼo imwe syonanĩtye ũndũ ũsu.

Maandĩko Matonya Kũũtetheesya

Koma too wĩanĩtye.

“Ũkai, inywʼĩ, tũthi vandũ vate andũ nĩ kana mũthũmũe vanini.”—Maliko 6:31.

Ũkunĩkĩli wĩonanyʼa kana ĩtina wa mũndũ kũkwatwa nĩ mũisyo mũthũku mũno na “ailea kũkoma too wĩanĩtye . . . thĩna ũla wĩ nawʼo no wongelekeele na ũu ũituma aendeea kũũmĩa mũno ngoonĩ.” Kwoou, nĩ ũndũ waĩle mũndũ kũkoma too wĩanĩtye.

Elesya mũndũ ũngĩ ũndũ ũkwĩwʼa.

“Kĩmako ngoonĩ ya mũndũ nĩkĩminamasya; ĩndĩ ndeto nzeo nĩmĩtanasya.”—Nthimo 12:25.

Neena na mũndũ wa mũsyĩ kana mũnyanyau ũmũĩkĩĩe. Andũ ma mũsyĩ na anyanyau no makwĩthukĩĩsye nesa, makakwĩkĩa vinya, na makaũnenga ũtao.a

Sũanĩa ĩũlũ wa ĩvinda yũkĩte ĩseo.

“Kwosana na watho wake [Ngai] tweteele matu meũ na nthĩ nzaũ, na nthĩnĩ wasyo ũlũngalu ũkekalaa.”—2 Vetelo 3:13.

a Mũndũ ũla weethĩwa na mawĩmakĩo maingĩ kwa ĩvinda yĩasa nũseo aneene na ndakĩtalĩ.