Yĩla Mũndũ Ũla Mũtwaanĩte Weethĩwa Ate Mũĩkĩĩku

“Nendaa kũkwʼa yĩla mũemewa waisye kana nũkũndia na aitwaa mũndũ mũka ũngĩ mũnini kwĩ nyie. Naũmĩaa mũno, na mũno mũno yĩla nalilikana maũndũ ala neeyĩimĩte kwondũ wake.”—Maria, kuma nthĩ ya Spain.

“Yĩla kĩveti kyakwa kyandiie ndataĩĩe, neewie ta ve kĩlungu kĩmwe kya mwĩĩ wakwa kyakwʼa. Maũndũ onthe ala twavangĩte kwĩka nĩmaanangĩkie. Ve mavinda neewʼaa nde na mawĩmakĩo ngoonĩ, ĩndĩ ĩtina ndyĩwʼa nĩtũlĩkĩte ngoo vyũ.”—Bill, kuma nthĩ ya Spain.

MŨNDŨ aũmĩaa mũno yĩla ũla matwaanĩte weethĩwa ate mũĩkĩĩku. Ve andũ amwe matwaanĩte maekeanĩaa ĩtina wa ũla ũvĩtĩtye kwĩtya ũekeo na maitata vyũ methĩwe na ngwatanĩo nzeo ĩngĩ.a Ĩndĩ ethĩwe ala matwaanĩte nĩmavanga kũendeeaa kwĩkalanyʼa kana kũtaanĩsya, ũwʼo nĩ kana ala mesa kwĩthĩa ũmwe woo ti mũĩkĩĩku nĩmaũmĩaa mũno. Andũ asu matonya kwĩka ata nĩ kana momĩĩsye ũndũ ũsu mũito?

MAANDĨKO MATONYA KŨŨTETHEESYA

O na kau andũ aingĩ ala mavĩtĩwʼe nĩmaũmĩaa mũno, nĩmakwataa ũkiakisyo Maandĩkonĩ. Nĩmemanyĩĩtye kana Ngai nĩwonaa yĩla meũthĩna na nũmewʼĩaa tei.—Malaki 2:13-16.

‘Mosũanĩonĩ makwa maingĩ nthĩnĩ wakwa, mokiakisyo maku matanyʼa ngoo yakwa.’—Savuli 94:19.

Bill aĩtye: “Yĩla nasomie mũsoa ũsu, nasũanĩie Yeova aingiakisya o tondũ ĩthe wĩ tei wĩkaa.”

“Kwa ũla wĩ tei [kana, mũĩkĩĩku] ũkeeyonanʼya wĩ tei [mũĩkĩĩku].”—Savuli 18:25.

Mũndũ mũka wĩtawa Carmen, ũla mũũme ũtaĩ mũĩkĩĩku kwa myei yĩana ũna aĩtye atĩĩ: “Mũemewa ndaĩ mũĩkĩĩku, ĩndĩ nĩnaĩkĩĩe vyũ kana Yeova nĩ mũĩkĩĩku kwakwa, na kwoou ndaĩ esa kũndia.”

“Mũikemakĩe kwa ũndũ o na wĩva, ĩndĩ kĩla ũndũnĩ mavata menyu nĩmatavanwʼe kwa Ngai kwĩsĩla mboya, o vamwe na kwĩsũvana . . . na mũuo wa Ngai ũla ũvĩtũkĩte ũmanyi wʼonthe ũkasũvĩaa ngoo syenyu.”—Avilivi 4:6, 7.

Mũndũ mũka wĩtawa Sasha aĩtye atĩĩ: “Nasomaa ĩandĩko yĩĩ mavinda maingĩ. Na o ũndũ naendeee kũvoya, nowʼo Ngai wanengie mũuo.”

Mavinda amwe andũ asu onthe mawetwa nĩmeewʼaa ta mavikie mũthya. Ĩndĩ nĩmamwĩkwatasya Yeova Ngai, na makakwata vinya kuma Ndetonĩ yake. Bill aĩtye atĩĩ: “Mũĩkĩĩo wakwa nĩwatumie nĩthĩwa na vinya yĩla maũndũ maĩ manakulumana. O na kau nĩnavĩtĩle ‘kyandanĩ kya kyũũ kya kĩkwʼũ’ kwa kavinda, Ngai aĩ vamwe nakwa.”—Savuli 23:4.

a Nĩ kana ũkwate ũvoo ũeleetye kana nĩwaĩle kũekea, soma kĩlungu kĩ na kyongo “Mwenzi Anapokosa Uaminifu,” kĩla kĩ ĩkasetinĩ ya Amkeni! ya 22/4/1999.

Maũndũ Meekiwe Nĩ Andũ Amwe Nĩ Kana Momĩĩsye

Kũsoma na kũvindĩĩsya maandĩko ala matonya kũũkiakisya.

Ũla mũndũũme wĩtawa Bill aĩtye: “Nĩnasomie ĩvuku ya Yovu na ya Savuli, na nĩnakululĩĩlaa mĩsoa yonthe ĩla noona ĩtonya kũndetheesya thĩnanĩ wakwa. Ũu watumie nĩmanya kana aandĩki ma mavuku asu ma Mbivilia nĩmakwatiwe nĩ mawĩmakĩo ta ala naĩ namo.”

Kwĩthukĩĩsya tũwathi tũseo no kũtume wĩwʼa nesa.

Ũla mũndũ mũka wĩtawa Carmen aĩtye: “Yĩla naaĩwa nĩ too ũtukũ, neethukĩĩasya tũwathi. Kwĩthukĩĩsya tũwathi nĩkwatumaa nĩwʼa nesa.” Nake Daniel aĩtye atĩĩ: “Nĩnemanyĩisye kũkũna ngitaa wathi ũendeee na kwĩka ũu nĩkwatumaa nĩthĩwa na mũuo wa kĩlĩko na nĩkala nĩuĩtye.”

Kũtavya mũndũ ũngĩ ũndũ ũkwĩwʼa.

Daniel aĩtye-ĩ: “O na kau ndyeemanyĩĩtye kũwetaa ũndũ ngwĩwʼa, naĩ na anyanya aseo, na nĩnaneenaa namo kĩla mũthenya. Nĩnamaeleasya ũndũ ngwĩwʼa kwa kũmaandĩkĩa valũa na kũea ngewa namo. Ũu nĩwandethisye mũno.” Nake Sasha aĩtye: “Asyai makwa nĩmandethisye mũno. Mavinda onthe inyia wakwa aĩ vo kwondũ wakwa. Nenda kũweta ũndũ, nĩwambĩthukĩĩasya. O na tata nĩwatumaa nĩwʼa nĩ wa vata, na nĩwandetheeisye nakwata vinya ĩngĩ o kavola kwa kavola.”

Kũendeea kũvoya.

Carmen aĩtye atĩĩ: “Navoyaa kĩla ĩvinda. Nĩneewʼaa Ngai e vakuvĩ nakwa, aimbĩthukĩĩsya navoya, na aindetheesya. Ĩvindanĩ yĩu naĩ na mathĩna asu maingĩ, nĩnatatie vyũ kũmũthengeea Ngai.”