Ũndũ Tũtonya Kũtetheesya Ala Matesĩ Kũsoma Nesa
1. Nĩkĩ ti laisi kũmanyĩsya Mbivilia andũ ala matesĩ kũsoma nesa?
1 Ene nyũmba ala matesĩ kũsoma nesa nĩmatonya kwendeewʼa nĩ maũndũ ma kĩ-veva, ĩndĩ ũyĩthĩa maitonya kũsoma Mbivilia na mavuku angĩ. Kũnenga andũ ta asu ĩvuku Mbivilia Ĩmanyĩasya ĩvinda ya mbee nĩkũtonya kũlea kũmatethya. Tũtonya kũtethya andũ ta asu ata memanyĩsye Mbivilia? Twakũlilye atavanyʼa ma ĩvinda ĩasa kuma nthĩ mbee wa 20 ũndũ mekaa. Vaa ĩtheo nĩvonanĩtwʼe ũndũ mekaa.
2. Nĩ mavuku meva matonya kũtũmĩwa kũmanyĩsya mũndũ ũtesĩ kũsoma nesa?
2 Ethĩwa mũmanyĩwʼa ndesĩ kũsoma kana esĩ kũsoma o vanini, no mwambĩĩe na kwĩmanyĩsya mbulosua Mwĩthukĩĩsye Ngai kana Mwĩthukĩĩsye Ngai Wĩkale Tene na Tene. Vainia ũmwe kuma nthĩ ya Amelika onasya mwene nyũmba mbulosua isu syelĩ na aimũkũlya anyuve ĩla ũkwenda matũmĩe. Ovisi wa ũvonge wa Kenya waĩtye kana mbulosua isu syĩthĩĩtwe na mosyao maseo nũndũ andũ ma nthĩ sya Africa mamanyĩawʼa kwa kũeewa ngewa ĩndĩ ti kwa kũkũlwʼa makũlyo. O na kau mũndũ mũsomu no etĩkĩle kũmanyĩwʼa kwa kũkũlwʼa makũlyo, nzĩa ĩsu ya kũmanyĩsya no ĩtume mũndũ ũte mũsomu ewʼa ate mwĩanĩe. Ethĩwa mũmanyĩwʼa nĩwĩsĩ kũsoma o vanini, atavanyʼa aingĩ manyuvaa kwambĩĩa kwĩmanyĩsya nake mbulosua Ũvoo Mũseo Kuma kwa Ngai! kana Nũtonya Kwĩthĩwa Mũnyanya wa Ngai!, kana maitũmĩa Ĩvuku Yakwa ya Ngewa sya Mbivilia.
3. Nĩ maũndũ meva tũtonya kwĩka nĩ kana tũtetheesye ala matesĩ kũsoma?
3 Makathe: Andũ ala matesĩ kũsoma nĩmatonya kwĩwʼa mate eanĩe, o na aingĩ monaa matesa kũmanya kũsoma. Nĩ kana ũmamanyĩsye Mbivilia, waĩle kwamba kũmatetheesye mewʼe me eanĩe. Andũ aingĩ ala matesĩ kũsoma nĩ oĩ na nĩmatonya kwĩmanyĩsya. Manenge ndaĩa na ũyĩka maũndũ kwa nzĩa ĩkwonanyʼa nĩwonaa me ma vata. (1 Vet. 3:15) Nĩmakwataa vinya wa kũendeea kwĩmanyĩsya mamanya kana kĩthito kyoo ti kya mana na kana nĩmekĩte maendeeo ma kĩ-veva. Kwoou, makathe kaingĩ ũndũ vatonyeka.
Andũ ala matesĩ kũsoma nĩmatonya kwĩwʼa mate eanĩe, o na aingĩ moo monaa matesa kũmanya kũsoma. Nĩ kana ũmamanyĩsye Mbivilia, waĩle kwamba kũmatetheesya mewʼe me eanĩe
4. Tũtonya kũmekĩa vinya ala matesĩ kũsoma ata nĩ kana meyũmbanasye?
4 O na ethĩwa mũmanyĩwʼa waku ndesĩ kũsoma nesa, mwĩkĩe vinya eyũmbanyʼe mũtambĩte kũka kwĩmanyĩsya. Atavanyʼa amwe kuma nthĩ ya South Africa meaa amanyĩwʼa moo makũlye mũndũ wa mũsyĩ kana mũnyanya woo wĩsĩ kũsoma amatetheesye. Nĩ kana atetheesye amanyĩwʼa make mone ũndũ ne laisi kũkwata mosũngĩo ĩla makululĩĩle, mũtavanyʼa ũmwe kuma nthĩ ya Britain amanengae ĩvuku yake matũmĩe kwa kavinda kanini ĩla mekũsoma. Kwĩka ũu, kũtumaa amanyĩwʼa make mona vata wa kwĩyũmbanasya matambĩte kũka kũsoma. Nake mwana-a-asa ũngĩ kuma nthĩ ya India eaa amanyĩwʼa make masisye mavisa onthe nthĩnĩ wa ĩsomo yĩla yĩatĩĩee na maisũanĩa ĩũlũ wamo matambĩte kũka kũsoma.
5. Tũtonya kwonanyʼa wũmĩĩsyo ata ĩla tũkwĩmanyĩsya na mũmanyĩwʼa witũ?
5 Ĩthĩwa na Wũmĩĩsyo: O na ethĩwa mwĩtũmĩa ĩvuku yĩva, neenea mũno mũno maũndũ ala ma vata na ũimũtetheesya mũmanyĩwʼa waku amaelewe nesa. Mavinda ma mbee ma kwĩmanyĩsya, nũseo ũkatũmĩa ndatĩka 10 nginya 15. Mũikasome tũlungu twingĩ. Ũmĩĩsya o na ethĩwa mũmanyĩwʼa waku esoma kavola. Nĩvatonyeka akekĩa kĩthito kya kũsoma nesanga o ũndũ ũendeee na kũmũmanya Yeova. Nĩ kana ũtetheesye mũmanyĩwʼa waku aendeee kũmũmanya Yeova, nĩ ũseo ũkamũthokya maũmbanonĩ mwambĩĩa kwĩmanyĩsya oou.
6. Tũtonya kũtetheesya amanyĩwʼa maitũ ata mamanye kũsoma?
6 Amanyĩwʼa ma Mbivilia mamanya kũsoma nesa, nĩmatonya kwĩka maendeeo mĩtũkĩ. (Sav. 1:1-3) Atavanyʼa aingĩ nĩmatethetye amanyĩwʼa moo kwa kũtũmĩa ĩvinda ĩkuvĩ kũsisya ĩvuku Jitahidi Kũsoma na Kuandika ĩtina wa kwĩmanyĩsya. Ethĩwa mũmanyĩwʼa waku nĩwakwʼa ngoo nũndũ wa kwona ta ũtesa kũmanya kũsoma, mwĩkĩe vinya kwa kũmũlilikanyʼa maũndũ amwe ala ũminĩte kũmanya. Mũĩkĩĩthye kana Yeova nũkũathima kĩthito kyake, na ũimwĩkĩa vinya amũvoye. (Nth. 16:3; 1 Yoa. 5:14, 15) Atavanyʼa amwe kuma nthĩ ya Britain meaa amanyĩwʼa moo mavange kwĩanĩsya maũndũ ala matonya mbee. Mameaa mambe kwĩmanyĩsya A nginya Z, na ĩndĩ mayĩĩmanyĩsya kũvua na kũsoma maandĩko amwe, na mũthya mayĩĩmanyĩsya kũsoma mavuku maitũ ala maandĩkĩtwe kwa nzĩa yĩ laisi. Nĩ kana ũtetheesye mũndũ amanye kũsoma, ndwaĩlĩte kũmũmanyĩsya kũsoma kwʼoka, ĩndĩ waĩlĩte kũmwĩkĩa vinya endeewʼe nĩ kwĩmanyĩsya kũsoma.
7. Nĩkĩ tũtaĩlĩte kũkĩa kwambĩĩa kwĩmanyĩsya Mbivilia na andũ ala matesĩ kũsoma nesa?
7 Yeova ndavũthasya andũ ala mate asomu. (Yovu 34:19) Yeova asiasya ngoo ya mũndũ. (1 Mav. 28:9) Kwoou ndũkakĩe kũmanyĩsya andũ ala matesĩ kũsoma nesa ũwʼo. Ve mavuku maingĩ mũno ala ũtonya kwambĩĩa kũmamanyĩsya namo. Ĩtinanĩ nũtonya kwambĩĩa kwĩmanyĩsya namo ĩvuku Mbivilia Ĩmanyĩasya nĩ kana maelewe Mbivilia nesa.