Osa Ĩtambya na Mĩtũkĩ

Kuma ĩla Kĩsese kitũ kya Indaneti kyeekiwe moalyũku, andũ aingĩ mũno nĩmethĩĩtwe maikũlya kwĩsĩla kĩsese kĩu mamanyĩwʼe Mbivilia. Mĩvango myeũ ya kũtavanyʼa kũla kwĩ andũ aingĩ nĩtumĩte andũ angĩ aingĩ makũlya mamanyĩwʼe Mbivilia. Ovisi wa ũvonge wakwata livoti sya andũ makũlĩtye mamanyĩwʼe Mbivilia, ũthĩnĩkĩaa ũndũ ũsu mĩtũkĩ ũndũ vatonyeka. Kwa ngelekanyʼo, ethĩwa mũndũ akũlya kwĩsĩla Kĩsese kya jw.org amanyĩwʼe Mbivilia, atumĩa ala me kĩsionĩ kĩla mũndũ ũsu ũĩ maandĩkĩawa nĩ ovisi wa ũvonge ĩtina wa mĩthenya ĩlĩ. O na ũu wĩ o vo, livoti kuma isionĩ syĩ kĩvathũkanyʼo sionanyʼa kana andũ amwe ala methĩawa makũlĩtye mamanyĩwʼe Mbivilia nĩmaminaa syumwa mbingĩ mayĩsa kwoneka. Tũtonya kwĩka ata nĩ kana tũtetheesye andũ asu wendi woo wa kwĩmanyĩsya ũtanathela?—Mko. 4:14, 15.

Wakomana na mũndũ ũkwendeewʼa ũtekalaa kĩsionĩ kyenyu, usũsya vomu ya Tafadhali Fuatia Upendezi (S-43) mĩtũkĩ ũndũ vatonyeka na ũinenga mũandĩki wa kĩkundi kyenyu ũmbanonĩ ũla ũatĩĩe waselewa mũno. Mĩthenya ĩlĩ ĩte mĩthelu, mũandĩki wa kĩkundi aĩlĩte kũvikya ũvoo ũsu kĩkundinĩ kĩla kĩ vakuvĩ na vala mũndũ ũsu ũtonya kũkwatĩkana, kana kũvikya ũvoo ũsu ovisinĩ wa ũvonge aitũmĩa jw.org kwa kũvinyĩĩa vala vaandĩkĩtwe “Kutaniko.” Atumĩa ma kĩkundi maĩlĩte kũsiasya jw.org mavinda kwa mavinda. Meethĩa matavĩtwʼe ĩũlũ wa mũndũ ũkwendeewʼa kĩsionĩ kyoo, maĩlĩte kwosa ĩtambya na mĩtũkĩ. Mũtavanyʼa ũla wanengwa wĩa wa kũmantha mũndũ ũsu, aĩlĩte kwosa ĩtambya na mĩtũkĩ. Mũtavanyʼa eethĩa mũndũ ũsu ate mũsyĩ, aĩlĩte kũtia ĩsyĩtwa yake na namba yake ya simũ.