Thangaanyʼai Mawĩanĩ Ala Maseo

Ĩandĩko ya Aevelania 10:24 yĩtwĩkĩĩte vinya ‘tũlilikananʼye ithyĩ kwa ithyĩ kũthangaanʼya wendonĩ na mawĩanĩ maseo.’ Nĩtũthangaasya ana-a-asa maitũ kwa kũmaiĩa ngelekanyʼo nzeo na kwa kũmaelesya ĩũlũ wa mũĩĩkĩo witũ. Elesya angĩ kĩkundinĩ maũndũ maseo ala wonete. Eka meyonee ũtanu ũla wĩ nawʼo nũndũ wa kũmũthũkũma Yeova. Ĩndĩ, ndũkatate o na vanini kũmaelekanyʼa naku kana kũmaelekanyʼa na angĩ. (Aka. 6:4) Tũmĩa ũtonyi ũla wĩ nawʼo kũthangaasya angĩ “wendonĩ na mawĩanĩ maseo,” ĩndĩ ndũkatume mona ta vate ũndũ mekaa, kana ũtume mona ta mateanĩasya ũndũ wa vata. (Sisya ĩvuku Shule ya Huduma, ĩth. 158, kal. 3.) Twathangaasya angĩ wendonĩ, maũndũ ala angĩ ta kwĩka andũ nesa maũndũnĩ ma kĩ-mwĩĩ kana kũtavanyʼa, makaatĩĩa ĩtina.—2 Ako. 1:24.