Kwĩmanyĩsya Kuma kwa Atavanyʼa Ala me na Ũmanyi Mwingĩ

Nĩtwonaa atavanyʼa ala me na ũmanyi mwingĩ me ma vata mũno kĩkundinĩ. Amwe mamũthũkũmĩte Yeova me aĩkĩĩku kwa myaka mingĩ. Angĩ no methĩwe manakwatie ũmanyi ũsu wa kũtavanyʼa myaka mĩvũthũ mĩvĩtu. Atavanyʼa asu nĩmonete ũndũ Yesũ ũtongoesye kĩkundi kya Kĩklĩsto mĩthenyanĩ ĩno ya mũminũkĩlyo kwa kũĩkĩĩthya kana andũ aingĩ nĩmatavwʼa ũvoo mũseo, na matwʼĩkĩthwʼa amanyĩwʼa. (Mt. 28:19, 20) Nũndũ nĩmethĩĩtwe me atavanyʼa me kĩthito, nĩmakwataa ‘vinya mũnene ũvĩtũkĩte’ ĩla makwatwa nĩ mathĩna na motato. (2 Ako. 4:7) Ve maũndũ maingĩ tũtonya kwĩmanyĩsya kuma kwa atavanyʼa ala me na ũmanyi mwingĩ. Ĩla manengwa mwanya, nĩmatanĩaa kũmanyĩsya ala angĩ maũndũ ala mo ene memanyĩĩtye. (Sav. 71:18) Kwoou, nĩtwaĩle kũmantha mwanya twĩmanyĩsye kuma kula maĩ. Tũtonya kwĩka ũu ata?

Ĩla Twĩ Ũtavanyʼanĩ. Nĩ kana atavanyʼa ala eũ, kana ala mate na ũmanyi mwingĩ ũtavanyʼanĩ makwate ũmanyi, nĩmaĩle kũmanyĩwʼa. Mũndũ no emanyĩsye maũndũ maingĩ kwa kũsisya ũndũ atavanyʼa ala me na ũmanyi matavanasya. (Sisya ũvoo ĩkasetinĩ ya Mũsyaĩĩsya ya 15/02/2015, ũla wĩ na kyongo “Ndũkaleele Ũtavanyʼanĩ,” kalungu ka katatũ ungu wa kyongo kĩnini “Tetheesya Ala Mate na Ũmanyi Mwingĩ.”) Ũtethekete ata kwa kũtavanyʼa na atavanyʼa asu me na ũmanyi mwingĩ?

We no ũthokye mũtavanyʼa wĩ na ũmanyi mwingĩ ũkatavanyʼa nake? Ethĩwa mũtavanyʼa ũsu e na mathĩna ma mwĩĩ, mavinda kwa mavinda no mũthi kwake wĩ na mũmanyĩwʼa ũmwe waku wa Mbivilia mũkemanyĩĩsye kwʼo. Mwamina kwĩmanyĩsya, no ũkũlye mũtavanyʼa ũsu ĩũlũ wa ũndũ woona weeka, na vala ũtonya kwĩka maendeeo.

Tũmĩa Ĩvinda Vamwe Namo: Ĩkĩa kĩthito ũmamanye atavanyʼa ala me na ũmanyi kwa kũtũmĩa ĩvinda vamwe namo. Thokya ũmwe woo ũthaithinĩ wa mũsyĩ, na ũimũkũlya makũlyo. Ethĩwa mũtavanyʼa ũsu e na mathĩna ma mwĩĩ, yo no mwĩke mũvango mũkekĩa ũthaithi wa mũsyĩ kwake? Mũkũlye ũndũ weemanyĩisye ũla wʼo. Akwatĩte moathimo maũ? Nĩ maendeeo meva wonete kĩsionĩ kyenyu? Nĩ maũndũ maũ ũtanĩe aimũthũkũma Yeova?

Nĩ ũseo ũkethĩwa na mawoni maseo, na ũielewa kana o na atavanyʼa ala me na ũmanyi mwingĩ mũno no methĩawa matesĩ maũndũ amwe. O ta andũ ala angĩ, atavanyʼa asu me na ũmanyi mwingĩ methĩawa na ũtonyi wĩ kĩvathũkanyʼo ũtavanyʼanĩ. (Alo. 12:6-8) Amwe nĩ akũũ, na ũu no ũtume matatũmĩa ĩvinda yingĩ vamwe naitũ. Ĩndĩ o na ũu wĩ o vo, no twĩmanyĩsye maũndũ maingĩ kumana namo nũndũ nĩmamũthũkũmĩte Yeova me aĩkĩĩku.