Ĩsandũkũ Ya Ĩkũlyo

◼ Yo atavanyʼa nĩmaĩle kũtũmĩa Indaneti mũno kũmanyĩsya kana kũtavya andũ me nthĩ ĩngĩ na matamesĩ ũvoo mũseo?

Atavanyʼa amwe nĩmatũmĩĩte Indaneti kũmantha andũ ma kwĩmanyĩsya Mbivilia namo, kuma nthĩ ila wĩa witũ ũkũnĩtwe maluvuku, kana nthĩ ila syĩ atavanyʼa anini mũno. Mavinda amwe nĩmakwataa mosyao maseo. Ĩndĩ atavanyʼa no malike thĩnanĩ ĩla mekũtavya andũ matamesĩ ũvoo mũseo kwa kũtũma ũtũmani kana kũneena namo kwĩsĩla Indaneti. (Sisya Ũthũkũmi Witũ wa Ũsumbĩ wa Mwei wa 7, 2007, wa Kĩswaili, ĩth. 3.) O na kau kĩeleelo kĩthĩawa no kũkwata andũ me na ngoo nzeo methukĩĩsye ũvoo mũseo, kũneena na andũ asu tũtamesĩ no kũtume mwana-a-asa kana mwĩĩtu-a-asa alika itindonĩ nthũku ta sya akaĩi ma mũĩkĩĩo. (1 Ako. 1:19-25; Ako. 2:8) O na ĩngĩ, nthĩ ila wĩa wa ũtavanyʼa ũkũnĩtwe maluvuku, silikalĩ no iatĩĩe nĩ kana ikwatye mesengyi ila itũmawa kuma nthĩ ingĩ. Ũndũ ũsu no ũlikye ana-a-asa na eĩtu-a-asa ma nthĩ isu thĩnanĩ. Kwoou, atavanyʼa mayaĩle kũtũmĩa Indaneti kũmantha andũ kuma nthĩ ingĩ mamatavye ũvoo mũseo.

Ate o ĩla ovisi wa ũvonge watũtavya ũndũ ũngĩ, ĩla twatavya mũndũ tũtamwĩsĩ wumĩte nthĩ ĩngĩ ũvoo mũseo twĩ maũndũnĩ maitũ, tũyaĩlĩte kũendeea kũmũmanyĩsya Mbivilia asyoka kwoo. Vandũ va ũu, no tũmwonyʼe ũndũ ũtonya kũtũmĩa Kĩsese kya jw.org nĩ kana akwate ũvoo mwingangĩ kana tũkamwonyʼa ũndũ ũtonya kũneena na ovisi wa ũvonge wa nthĩ ĩla wumĩte. O na no ũmwĩkĩe vinya athi Nyũmbanĩ ya Ũsumbĩ ĩla yĩ vakuvĩ na kwake, o na kau nĩtwĩsĩ kana ve nthĩ imwe itethĩawa na Nyũmba sya Ũsumbĩ. Ethĩwa mũndũ ũsu nũkwenda ethokewa nĩ Ngũsĩ sya Yeova, waĩle kusũsya vomu Tafadhali Fuatia Upendezi (S-43) na ũinenga mũandĩki, nake akamĩtũma kwĩsĩla Kĩsese kya jw.org. Ovisi wa ũvonge ũla ũũngamĩe maũndũ ma ũtavanyʼa ma nthĩ ĩla mũndũ ũsu umĩte nĩwĩthĩawa wĩsĩ nesa kĩla kĩendeee nthĩ ĩsu, na kwoou ovisi ũsu no ũtetheesye mũndũ ũsu kĩ-veva kwa nzĩa ĩla yaĩle.—Sisya Ũthũkũmi Witũ wa Ũsumbĩ wa Mwei wa 6, 2014, wa Kĩswaili, ĩth. 7 na Ũthũkũmi Witũ wa Ũsumbĩ wa Mwei wa 11, 2011, wa Kĩswaili, ĩth. 2.

Ethĩwa ve mũndũ tũendeee kũneenea maũndũ ma Mbivilia na aithamĩĩa nthĩ ĩngĩ, kana ethĩwa nĩtũendeee kwĩmanyĩsya Mbivilia na mũndũ tũtamwĩsĩ wĩ nthĩ ĩngĩ kwĩsĩla Indanetinĩ, twaĩle kwĩka ũndũ vaelewʼa. Ĩndĩ o na ũu wĩ o vo, no tũendeee kũneena nake ĩũlũ wa maũndũ matonya kũtuma aendeea kwendeewʼa nginya ĩla ũkathokewa nĩ mũtavanyʼa wa nthĩ ĩla wumĩte. Ĩndĩ ethĩwa ekalaa nthĩ wĩa witũ ũkũnĩtwe maluvuku, atavanyʼa nĩmaĩle kwĩthĩwa mesũvĩĩte mũno ĩla mekũneenea maũndũ ma Mbivilia kwĩsĩla valũa, simũ, kana o syĩndũ ta Indaneti.—Mt. 10:16.