Ũndũ Tũtonya Kwĩthĩwa Atavanyʼa Aseo—Kũtetheesya Amanyĩwʼa ma Mbivilia Methĩwe Matonya Kwĩyĩĩthya Kĩ-veva

Nĩkĩ Nĩ Ũndũ wa Vata: Nĩ kana amanyĩwʼa ma Mbivilia maendeee kwĩana kĩ-veva, no nginya methĩwe mesĩ momanyĩsyo maingĩ eka o ala ma mũsingi ma Mbivilia. (Aevl. 5:12–6:1) Nĩ kana mũndũ emanyĩsye, nĩwaĩle kwĩkĩa kĩthito. Ũu nĩ vamwe na kũsianĩsya maũndũ ala ũtwĩe esĩ na ala meũ weemanyĩsya, na aimanya ũndũ ũtonya kũmatũmĩa. (Nth. 2:1-6) Ĩla amanyĩwʼa mamanya kwĩka ũkunĩkĩli, nĩmatethekaa nũndũ no masũngĩe makũlyo ma Mbivilia matũmĩĩte mavuku maitũ. Kĩthito kĩla mekĩaa nĩ kana matũmĩe maũndũ ala meemanyĩsya kĩkamatetheeasya kũmĩanĩsya na matatwa ala makamakwataa.—Luka 6:47, 48.

Ũndũ Ũtonya Kwĩka Ũu:

Mwonyʼe vata wa kũvoyaa kĩla ĩvinda atanambĩĩa kwĩmanyĩsya Mbivilia.—Yoa. 14:26; 1 Ako. 2:10.
Wambĩĩa kwĩmanyĩsya na mũmanyĩwʼa oou, mũtetheesye one vata wa kwĩyũmbanĩasya ĩsomo yĩla mũkemanyĩsya. Mwonyʼe ĩvuku yaku, na ũimũmanyĩsya ũndũ waĩle kũkululĩĩla maũndũ ala ma vata me moka.
Tetheesya mũmanyĩwʼa asũngĩe atũmĩĩte ndeto syake. Ĩla mũkwĩmanyĩsya, ĩsomo yĩikethĩwe ne kĩlungu kya makũlyo na mosũngĩo tũ, ĩndĩ mũtetheesye mũmanyĩwʼa eyĩelesye kuma ngoonĩ ate kũsoma mosũngĩo kũma ĩvukunĩ.
Mũthuthye asomae Ndeto ya Ngai kĩla mũthenya. Mwonyʼe mũvango wa kũsoma Mbivilia (Ratiba ya Usomaji wa Biblia) ũla wĩ Kĩsesenĩ kya jw.org/sw wonanĩtye nzĩa ya kwendeesya ya kũsoma Mbivilia. Kũsoma Mbivilia kĩla mũthenya nĩkwendaa kĩthito, na kwĩka ũu nĩkwĩthĩawa na mosyao maseo.—Sav. 1:2, 3.
Mwonyʼe ũndũ ũtonya kũkwata mosũngĩo ma makũlyo ma Mbivilia atũmĩĩte LIBRARY INDANETINĨ kana Watchtower Library. Mũtetheesye aelewe nthoo kana alama ila iũngamĩe ĩsyĩtwa ya mavuku ala tũtũmĩaa maũmbanonĩ.

Tata Kwĩka Ũndũ Ũũ Mweinĩ Ũũ:

Mwamina kũsoma tũlungu tũla twĩ ungu wa kyongo kĩna, kana kĩlungu kyonthe, kũlya mũmanyĩwʼa waku wa Mbivilia aelesye o kwa ũkuvĩ maũndũ ala weemanyĩsya. Ethĩwa ndwĩ na mũmanyĩwʼa wa Mbivilia, ĩmanyĩsye kwa kũsoma kĩlungu kya Mbivilia kana kya ĩkaseti ya Mũsyaĩĩsya na ũivindĩĩsya maũndũ manene ala weemanyĩsya, kana ũmaandĩke kwa ndeto nguvĩ. Kwĩka ũu kũkaũtetheesya wĩthĩwe ũtonya kũkwatya mĩtũkĩ ĩla ũũsoma.