Tũmĩa Nesa Maũndũ Ala me Ĩvukunĩ Mbivilia Ĩmanyĩasya

Mũmanyĩwʼa wa Mbivilia aendeea kwĩmanyĩsya ũwʼo na aitũmĩa maũndũ ala ũkwĩmanyĩsya, akaendeea kwĩana na kwĩthĩwa na mosyao maseo. (Sav. 1:1-3) No tũtetheesye mũmanyĩwʼa witũ wa Mbivilia eke maendeeo kwa kũtũmĩa nesa maũndũ ala me ĩvukunĩ Mbivilia Ĩmanyĩasya.

Makũlyo Ala me Mwambĩĩonĩ wa Kĩlungu: Kĩla kĩlungu kyambĩĩaa na makũlyo masũngĩĩtwe ĩsomonĩ yĩla mũkwĩmanyĩsya. No ũmũkũlye makũlyo asu nĩ kana amasũanĩe na ayendeewʼa nĩ kũmanya mosũngĩo ĩla mũkwĩthĩwa mũyĩmanyĩsya kĩlungu kĩu. Kana ũkamũkũlya amasũngĩe o kwa ũkuvĩ. Asũngĩa ũsũngĩo ũtaĩlĩte ndũkamũkosoe vau kwa vau. Ũsũngĩo wake nũũkũtetheesya ũmanye maũndũ ala waĩle kũkindĩlĩĩla mũno mũisoma kĩlungu kĩu.—Nth. 16:23; 18:13.

Ũvoo wa Kwongeleela: Ethĩwa mũmanyĩwʼa nũkũelewa na nũkwĩtĩkĩlana na maũndũ ala mũkwĩmanyĩsya ĩsomonĩ, no ũmũkũlye akemanyĩsye e weka ũvoo wa kwongeleela ĩũlũ wa ĩsomo yĩu. Ĩla mũkwĩthĩwa mũyĩmanyĩsya ĩngĩ, no mũneenee o kwa ũkuvĩ ũvoo ũsu wa kwongeleela nĩ kana ũĩkĩĩthye nũnaeleiwe. Ĩndĩ woona aĩle kũeleangwʼa mũnango, no ũtũmĩe ĩvinda mũyĩmanyĩsya nĩ kana mũneenee ũvoo ũsu wa kwongeleela kana mũsome tũlungu tũmwe ũvoonĩ ũsu na ũimũkũlya makũlyo ala ũandĩkie ũyĩyũmbanyʼa.

Ĩsandũkũ Yĩla yĩ na Maũndũ Manene: Ĩsandũkũ yĩla yĩ na maũndũ manene nthĩnĩ wa kĩla kĩlungu nĩyo yĩthĩawa na mosũngĩo ma makũlyo ala me mwambĩĩonĩ wa kĩlungu. No ũtũmĩe ĩsandũkũ yĩu kũĩkĩĩthya kana mũmanyĩwʼa waku nĩwaelewa, na kana no aelesye maũndũ ala manene. Somai kĩla ũndũ wĩ ĩsandũkũnĩ yĩu vamwe na maandĩko ala me vo. Na ĩndĩ ũimũkũlya atũmĩe maandĩko asu kũelesya nĩkĩ ũndũ ũsu nĩ wa wʼo.—Meko 17:2, 3.