Mũmbi Witũ Nũtũthĩnĩkĩaa

1. MŨMBI WITŨ NĨWE UMASYA SYŨA

We wĩona thayũ ĩũlũ wa nthĩ ta wĩthĩwa ũilye ata keka kũyĩthĩawa na kyeni kya syũa? Syũa nĩyo yĩnengae mĩtĩ vinya wa kumĩlya matũ, malaa, matunda, mbeũ, na ngii. O na ĩngĩ, nĩyo yĩtumaa mĩi ya mĩtĩ ĩkusya kĩwʼũ kuma mũthanganĩ, na ĩyambatya kĩwʼũ kĩu nginya matũnĩ. Kĩwʼũ kĩu kĩsaa kũsyoka yayayanĩ ta mĩthũmũ.

2. MŨMBI WITŨ NĨWE UASYA MBUA

Mbua nĩ mũthĩnzĩo wa mwanya mũno kuma kwa Ngai, na nĩyo ĩtumaa nthĩ ĩsyaa malĩu me kĩvathũkanyʼo kwondũ witũ. Ngai atũnengae mbua na mavinda ma kũvanda na ma ngetha, na nũndũ wa ũu, twĩthĩawa na lĩu wĩanĩtye na ũtanu mwingĩ ngoonĩ sitũ.

3. MŨMBI WITŨ NĨWE ŨTŨNENGAE LĨU NA NGŨA

Aũme aingĩ ala me na mĩsyĩ nĩmathĩnĩkaa ĩũlũ wa vala mekumya lĩu na ngũa kwondũ wa andũ moo. Ĩndĩ Maandĩko maĩtye atĩĩ: “Sisyai nesa nyũnyi sya yayaya, iivandaa kana kũketha kana kũmbanyʼa ĩkũmbĩnĩ, ĩndĩ Ĩthe wenyu wa ĩtunĩ nũiĩthasya. Inywʼĩ mũi ma vata mũno kũte syo?”—Mathayo 6:25, 26.

“Ĩmanyĩsyei kumana na malaa ma kĩthekanĩ ma lili, ũndũ meanaa . . . ; ĩndĩ nĩngũmwĩa kana o na [Mũsumbĩ] Solomoni ũnenenĩ wake wʼonthe ndaaĩvwʼĩka ta yĩmwe yamo. Ethĩwa ũu nĩwʼo Ngai ũvwʼĩkaa mĩtĩ ya kĩthekanĩ . . . , ndakamũvwʼĩka mbee mũno inywʼĩ?”—Mathayo 6:28-30.

Nũndũ Ngai nũtonya kũtũmanthĩa lĩu na ngũa, vate nzika, no atũtetheesye tũkakwata syĩndũ ila ingĩ twĩ na vata nasyo. Tweethĩwa na kĩthito kya kwĩka kwenda kwake, no aathime kĩthito kitũ kya kũvanda lĩu, kana akatũtetheesya tũkakwata wĩa nĩ kana tũthooe kĩla twĩ na vata nakyo.—Mathayo 6:32, 33.

Kwa wʼo, twasũanĩa ĩũlũ wa syũa, mbua, nyũnyi sya yayaya, na malaa nĩtũkwataa itumi nzeo sya kũmwenda Ngai. Kĩlungunĩ kĩla kĩatĩĩe nĩtũkwona nzĩa ĩla Mũmbi witũ ũtũmĩaa kũneena na andũ.