Ũndũ Tũtonya Kũtũmĩa Kĩlungu, Ũndũ Ũtonya Kwasya

Kwa ĩvinda, ĩthangũnĩ ya mbee ya kavuku Mwĩkalĩle wa Aklĩsto na Wĩa wa Kũtavanyʼa, nĩvethĩawa na kĩlungu kĩ na kyongo, “Ũndũ Ũtonya Kwasya.” Tũtonya kũkĩtũmĩa ata?

Yĩla Ũkumya Ũvoo wa Amanyĩwʼa: Waĩle kũtũmĩa ĩkũlyo, ĩandĩko, na kĩla mũkaneenea wasyoka o tondũ syonanĩtwʼe kĩlungunĩ kĩu. Ĩndĩ ũu ti kwasya kana no nginya ũtũmĩe o ndeto ila syĩ nthĩnĩ wa vitio sya ũndũ ũtonya kwasya. No ũtũmĩe nzĩa ĩngĩ, ũkambĩĩa na ndeto syaku, kana ũkasũanĩa na mwene nyũmba kwa nzĩa ĩngĩ. O na no ũmũnenge ĩvuku yĩmwe yĩ nthĩnĩ wa Syĩndũ Ila Tũtũmĩaa Mũno Kũmanyĩsya o na ethĩwa yĩyonanĩtwʼe kĩlungunĩ kĩu.

Yĩla wĩ Ũtavanyʼa: Kĩlungu ũndũ ũtonya kwasya kĩseũvĩtwʼe kĩũtetheesye ũkwate maũndũ ma kũtũmĩa ũtavanyʼanĩ. Ethĩwa mũndũ nĩwoonanyʼa kana kwawʼo nũkwendeewʼa, na nũkwenda kwĩmanyĩsya maũndũ maingĩ, no ũendeesye ũneenanyʼa kwa kũtũmĩa ũvoo ũla wĩ kĩlungunĩ kũsyokea mũndũ. No ũvĩndũe o vanini maũndũ ala me kĩlungunĩ ũndũ ũtonya kwasya kana ũkatũmĩa maũndũ angĩ me kĩvathũkanyʼo. Andũ kĩsionĩ kitũ no methĩwe mayendeewʼa nĩ maũndũ ala mananeeneiwe mwei mũvĩtu kana o ĩandĩko yĩ kĩvathũkanyʼo? No methĩwe mayendeewʼa mũno nĩ ũndũ mũna ũneekĩkie mĩtũkĩ kana ũtangaasiwe maũvoonĩ? O na ethĩwa watũmĩa ũvoo ũla wĩ kĩlungunĩ ũndũ ũtonya kwasya kwa nzĩa yĩ kĩvathũkanyʼo, kĩeleelo kyaku kyaĩle kwĩthĩwa ne ‘kwĩkaa maũndũ onthe kwondũ wa ũvoo mũseo, nĩ kana ũũtavye angĩ.’​—1Ko 9:22, 23.