Ũndũ Ũtonya Kũtũmĩa Kĩlungu, Ũndũ Ũtonya Kwasya

Ana-a-asa nĩmekĩaa kĩthito kingĩ mũno kũseũvya kĩlungu Ũndũ Ũtonya Kwasya, na atavanyʼa aingĩ nĩmonete ũvoo ũla wĩthĩawa kĩlungunĩ kĩu ũyendeesya andũ kĩsionĩ kyoo. Ĩndĩ, nũndũ maũndũ methĩawa me kĩvathũkanyʼo ĩũlũ wa nthĩ, atavanyʼa me na ũthasyo wa kũtũmĩa ũvoo wĩ kĩvathũkanyʼo yĩla meũtavanyʼa, kana makaneenea maũndũ ala mekwendeesya andũ kĩsionĩ kyoo. O na ũu wĩ o vo, nĩtwaĩle kũatĩĩa myolooto yonthe ĩla twanengwa yĩla kwĩ kambeini ya mwanya. Kĩeleelo kitũ nĩ kwĩanĩsya mwĩao wa Yesũ wa kũtavanyʼa ũvoo mũseo wa Ũsumbĩ.—Mt 24:14.

Yĩla atavanyʼa manengwa ũvoo kĩlungunĩ kya amanyĩwʼa, maĩle kũtũmĩa ũvoo ũla wĩ nthĩnĩ wa kĩlungu, Ũndũ Ũtonya Kwasya kĩla kĩ nthĩnĩ wa Kavuku ka Ũmbano wa Mwĩkalĩle wa Aklĩsto. Ĩndĩ, ethĩwa mayĩĩtwe matũmĩe ĩmwe kwa ĩmwe ũvoo ũla wĩ kĩlungunĩ kĩu, me na ũthasyo wa kũtũmĩa ĩkũlyo yĩ kĩvathũkanyʼo, ĩandĩko, kana kĩla makaneenea masyoka maisũanĩa kĩla kĩkwendeesya andũ kĩsionĩ kyoo. Ĩndĩ meke ũu mateũthi ũtee na kyongo kĩla kĩũneenewa mwei ũsu. Ũu nĩ kwonanyʼa kana mwolooto ũla twanengetwe nthĩnĩ wa kavuku ka kwĩmanyĩsya ka ũmbano ka Mwei wa 6, 2020, ĩthangũ ya 8 nũũvĩndũka.