Kambeini ya Mwanya ya Kwambĩĩa Kwĩmanyĩsya Mbivilia na Andũ Mwei wa 9

Mweinĩ wa 9, tũkeekĩa kĩthito kwambĩĩa kwĩmanyĩsya Mbivilia na andũ ala tweethĩa mĩsyĩ kwoo tũtũmĩĩte mbulosua Tanĩa Thayũ Tene na Tene! Atavanyʼa no manyuve kũtwʼĩka mavainia atetheesya kwa kũtavanyʼa masaa 30. Tũkatavanyʼa ata kambeininĩ ĩsu ya mwanya?

• Yĩla Ũũtavya Mũndũ ya Mbee: Tũmĩa ũvoo ũla wĩ ĩthangũnĩ ya mũthya ya mbulosua ĩsu nĩ kana ũtetheesye mwene nyũmba endeewʼe, na ethĩwa nĩvatonyeka ũimwonyʼa ũndũ twĩmanyĩasya Mbivilia na andũ. Lilikana ala mendeeawʼa ĩvinda ĩvĩtu, o vamwe na masyokeo. O na ethĩwa nĩmaleile tũyĩmanyĩsya ĩvinda ĩvĩtu, nĩvatonyeka makendeewʼa nĩ nzĩa yitũ nzaũ ya kũmanyĩsya na mbulosua ĩno tũũtũmĩa. Tũyaĩle kũtia mbulosua sitũ mĩsyĩ ĩla tũtanethĩa ene, kana tũkekĩa vaasyanĩ tũitũma valũa kwa andũ ala mataaonanyʼa kana nĩmekwendeewʼa ĩvinda ĩvĩtu. Kamitii ya Ũthũkũmi ya Kĩkundi no ĩvange maũmbano angĩ kwondũ wa ũtavanyʼa mweinĩ ũsu.

• Myanya Ĩngĩ Yaumĩla: Ethĩwa kĩkundinĩ kyenyu nĩmũtũmĩaa tũkalĩ twa mavuku, ĩkĩai mbulosua Tanĩa Thayũ Tene na Tene! vandũ yenekee nesa. Elesya ala moonanyʼa nĩmekwendeewʼa kana, ĩtina wa kũkwata mbulosua ĩsu no memanyĩsye Mbivilia vate ndĩvi. Monyʼe o kwa ũkuvĩ ũndũ twĩmanyĩasya, kana ũvange wĩmonyʼa mũthenya ũngĩ. Mũsyaĩĩsya wa ũthũkũmi no avange atavanyʼa ala maĩle mathi isionĩ sya viasala, na mayambĩĩa kwĩmanyĩsya Mbivilia na andũ. O na ĩngĩ, no ũkũlye ala mũthũkũmaa ĩmwe mwambĩĩe kwĩmanyĩsya Mbivilia, kana andũ ala mwakomana ũitavanyʼa wĩ maũndũnĩ maku.

Yesũ atwĩaĩe ‘tũtwʼĩkĩthye andũ amanyĩwʼa na tũimamanyĩsya.’ (Mt 28:19, 20) Ekai kambeini ĩno ya mwanya ĩtũtetheesye kwĩanĩsya mwĩao ũsu, tũtũmĩĩte mbulosua Tanĩa Thayũ Tene na Tene!