Tũthũkũmaa Ngai wĩ “Tei Mwingĩ”

1. Nĩ kyaũ kĩtonya kũka kĩlĩkonĩ twasũanĩa mũndũ wĩ tei?

YĨLA twasũanĩa mũndũ wĩ tei, tũkũnaa visa wa mũndũ wĩkaa angĩ nesa, wĩ ngoo nzeo, wĩ ĩnee, na mũlau. O na nĩ laisi tũkalilikana ĩla ngewa Yesũ wanenganie ya Mũsamalia mũseo. Mũsamalia ũsu ‘eewʼĩie tei’ Mũyuti wavithũkiĩwe nĩ ingʼei, o na kau ndaumĩte mbaĩ ĩmwe nake. Mbivilia yaĩtye kana ‘amwĩwʼĩie tei mũno’ nũndũ nĩwaũmĩĩtwʼe, na kwoou eeka mũvango asũvĩwe. (Luka 10:29-37) Ngewa ĩsu ĩtũtetheeasya kwona nguma nzeo mũno ya Ngai witũ, nayo nĩ tei. Ngai atwĩwʼĩaa tei nũndũ nũtwendete, na kĩla mũthenya nĩtwonaa tei ũsu wake maũndũnĩ maingĩ.

2. Mũndũ wĩ tei ekaa ũndũ ũngĩ wĩva?

² Ve ũndũ ũngĩ mũndũ wĩ tei wĩkaa. Mũndũ wĩ tei no alee kwosea mũndũ ũvĩtĩtye ĩtambya oona ve kĩtumi. Vate nzika, ũu nowʼo Yeova wĩkanaa naitũ. Mũandĩki wa Savuli aisye: “Ndatwĩkĩte kwĩanana na naĩ sitũ.” (Sav. 103:10) Ĩndĩ mavinda angĩ, Yeova nũnengae mũndũ wĩkĩte naĩ ũkanyʼo mũito.

3. Twĩneenea makũlyo meva?

³ Ĩsomonĩ yĩĩ twĩsũngĩa makũlyo atatũ: Nĩkĩ Yeova ũtwĩwʼĩaa tei? Kwʼo kumya ũkanyʼo mũito kwonanasya mũndũ nde tei? Na nĩ kyaũ kĩtonya kũtũtetheesya twĩwʼĩe angĩ tei? Ekai twone ũndũ Ndeto ya Ngai ĩsũngĩĩte makũlyo asu.

KĨLA KĨTUMAA YEOVA ATWĨWʼĨA TEI

4. Nĩkĩ Yeova ũtwĩwʼĩaa tei?

⁴ Yeova atwĩwʼĩaa tei nũndũ nũtwendete. Mũtũmwa Vaulo aveveeiwe aandĩka kana Ngai “e tei mwingĩ.” Yĩla Vaulo waandĩkaa ndeto isu, aneeneaa ũndũ Ngai woonanisye tei kwa kũnenga athũkũmi make etĩkĩwʼa mauta wĩkwatyo wa kũthi ĩtunĩ, o na kau nĩ ene naĩ. (Aev. 2:4-7) Ĩndĩ Yeova ndewʼĩaa tei etĩkĩwʼa mauta me oka. Mũandĩki wa Savuli, Ndaviti, aandĩkie: “Yeova nĩ mũseo kwa onthe; na matei make mololo me ĩũlũ wa mawĩa make onthe.” (Sav. 145:9) Nũndũ Yeova nĩwendete andũ, nũmewʼĩaa tei kĩla ĩvinda wakwata kĩtumi kya kũmewʼĩa tei.

5. Nĩ kyaũ kyatetheeisye Yesũ kũmanya kana Yeova e tei?

⁵ Yesũ nĩwe wĩsĩ nesa vyũ ũndũ Yeova wendete kwĩwʼĩa andũ tei. Ayĩsa kũtwʼĩka nĩwooka kũũ nthĩ, ekalile ĩtunĩ ĩvinda yĩasa mũno e na Ĩthe wake. (Nth. 8:30, 31) Kwoou ve mavinda maingĩ mũno woonie ũndũ Ĩthe weewʼĩaa andũ tei. (Sav. 78:37-42) Na yĩla wamanyĩasya andũ, nĩwakothaa kũneenea nguma ĩsu nzeo Ĩthe wĩthĩawa nayo.

6. Yesũ atũtetheeisye ata kũelewa ũndũ Ĩthe wĩthĩawa na tei wingĩvĩte?

⁶ O tondũ ĩsomo ĩvĩtu yonanĩtye, Yesũ atũmĩie ngewa ya ũla mwana kĩmaamai kũtetheesya andũ maelewe nesa ũndũ Yeova wendete kwĩwʼĩa andũ tei. Mwanake ũsu nĩwaumie mũsyĩ na “aanangĩa malĩ yake maũndũnĩ mathũku.” (Luka 15:13) Ĩtina, nĩweelilile nũndũ wa maũndũ mathũku ala weekĩte, enyivya, na asyoka mũsyĩ. We ĩthe eekie ata? Mwanake ũsu o na atavikĩte mũsyĩ nĩweeyoneie nesa. Yesũ aisye: “E vaasa, ĩthe wake amwona, na amwĩwʼĩa tei mũno, na asemba amũkumbatĩa na amũmumunya.” Ĩthe wake ndaamwĩkĩĩthya nthoni. Vandũ va ũu, nĩwamwĩwʼĩie tei na amũekea, na amũthokya ĩngĩ mũsyĩ. Mwanake ũsu avĩtĩsye ĩthe mũno, ĩndĩ yĩla weelilile, ĩthe nĩwamũekeie. Ngewanĩ ĩsu, Yeova nĩwe ũelekanĩtwʼe na ĩthe ũsu wĩ tei. Yesũ atũmĩie ngewa ĩsu ya kũkiita ngoo kũtũtetheesya kũelewa ũndũ Ĩthe wĩthĩawa eyũmbanĩtye kũekea ala meelila kuma ngoonĩ.—Luka 15:17-24.

7. Ũĩ wa Yeova wonekaa ata yĩla ũkwĩwʼĩa andũ tei?

⁷ Yeova atwĩwʼĩaa tei nũndũ e ũĩ mwingĩ mũno. Nũndũ wa ũĩ ũsu wake, mavinda onthe ekaa motwi matonya kũuna syũmbe syake. Mbivilia yaĩtye kana “ũĩ ũla wumaa ĩũlũ” wĩ “tei mwingĩ na mosyao maseo.” (Yak. 3:17) O ta mũsyai wendete syana syake, Yeova nĩwĩthĩawa esĩ kana atwĩwʼĩa tei nũkũtũtethya. (Sav. 103:13; Isa. 49:15) Tei wake nũtumaa twĩthĩwa na wĩkwatyo, o na kau twĩ ene naĩ. Kwoou nũndũ Yeova e ũĩ ũte maela, nĩwĩwʼĩaa mũndũ tei yĩla woona ve kĩtumi kya kwĩka ũu. O na vailye ũu, nĩwĩthĩawa esĩ yĩla ũtaĩlĩte kwĩwʼĩa mũndũ tei. Ũĩ wake nũmũtetheeasya ndakewʼĩe mũndũ tei, ethĩwa kwĩka ũu kwĩĩthĩwa ne ũndũ ũmwe na kũmũnanyʼa.

8. Nĩ ĩtambya yĩva yaĩle kwoswa mavinda amwe, na nĩkĩ?

⁸ Nata mũthũkũmi wa Ngai akatwʼa kwĩka maũndũ mathũku na ngũlũ? Twaĩle kwĩka ata? Vaulo aveveeiwe atũandĩkĩe kana twaĩle ‘kũeka kũtindanyʼa’ na mũndũ ta ũsu. (1 Ako. 5:11) Ala mate kwenda kwĩlila mekaa kũtengwa na kĩkundi. No nginya ĩtambya yĩu yoswe nĩ kana ana-a-asa na eĩtu-a-asa ala aĩkĩĩku mekale me asũvĩĩku, na tũyonanyʼa kana nĩtũlũmanĩtye na Yeova. Ĩndĩ amwe monaa ve vinya kũĩkĩĩa kana yĩla mũndũ watengwa, ĩsu yĩthĩawa yĩ nzĩa ya Ngai ya kwonanyʼa tei. Ĩndĩ ũu nĩ wʼo? Ekai twone.

KWʼO KUMYA ŨKANYʼO MŨITO KWONANASYA MŨNDŨ NDE TEI?

9-10. Kwosana na Aevelania 12:5, 6, nĩkĩ tũtonya kwasya kana kũtenga mũndũ nĩ nzĩa ya kwonanyʼa tei? Nengane ngelekanyʼo.

⁹ Yĩla mũndũ tũmwĩsĩ na tũmwendete watangaaswa maũmbanonĩ kana “ti ũmwe wa Ngũsĩ sya Yeova ĩngĩ,” nĩtũkũnĩkaa mũno. O na no tũsengʼe ethĩwa ĩnaĩ lasima atengwe. Kwʼo kũtenga mũndũ nĩkwonanasya kana nĩweewʼĩwa tei? Ĩĩ, vyũ. Ethĩwa nĩwoona mũndũ waĩlĩte kũkanwʼa na ũilea kũmũkanyʼa, kĩu kyonanasya kana ndwĩ na ũĩ, ndwĩ tei, na ndũmwendete. (Nth. 13:24) Kwʼo kũtenga mũndũ ũte kwenda kwĩlila no kũmũtetheesye akavĩndũka? Ĩĩ. Aingĩ ala meekie naĩ ngito meethĩie kana kwosewa ĩtambya yĩu ĩlũmu nĩ atumĩa nĩkwamavindũie ilĩko, maekana na mwĩkalĩle woo mũthũku, na mamũsyokea Yeova.—Soma Aevelania 12:5, 6.

¹⁰ Kwasũanĩa ngelekanyʼo ĩno ĩkwonanyʼa ũndũ kũtenga mwĩki wa naĩ kwĩthĩawa ne nzĩa ya kwonyʼa kĩkundi tei. Twasye mũĩthi nĩweethĩa ve ĩlondu yĩmwe yake ĩwau. Nĩwĩsĩ kana nĩ kenda aiite ĩlondu yĩu nesa, no nginya ambe kũyĩvathanyʼa na ala angĩ. Ĩndĩ vai ĩlondu yendaa kwĩkala yĩ yoka. Malondu mendete kwĩkala me vamwe, na yĩmwe yavathwa nĩyĩthĩnĩkaa mũno. Ĩndĩ mũndũ no asye kana mũĩthi ũsu nĩ mũkalĩ na nde tei? Aiee. Nĩwĩsĩ kana aekana na ĩlondu yĩu ĩwau yĩtindanasye na ala angĩ, nĩyĩũmakwatya ũwau ũsu. Kwoou kũyĩvatha kũsũvĩaa ndĩthya yonthe.—Sianĩsya na Alivai 13:3, 4.

11. (a) Nĩkĩ tũtonya kũelekanyʼa mũndũ mũtenge na ĩlondu ĩwau? (b) Ala atenge matonya kwĩka ata, na nĩ ũtethyo wĩva matonya kũkwata?

¹¹ No tũelekanyʼe Mũklĩsto mũtenge na ĩlondu yĩu ĩwau. Ethĩawa e mũwau kĩ-veva. (Yak. 5:14) O tondũ mowau mana makwatanawʼa, o nawʼo ũwau ũsu wa kĩ-veva no ũkwatanwʼe mũno. Kwoou mavinda amwe wĩthĩaa nĩ lasima mũndũ ũsu mũwau avathanwʼe na kĩkundi. Ũkanyʼo ũsu wonanasya kana Yeova nĩwendete athũkũmi ala angĩ make aĩkĩĩku, na no ũtetheesye ũla wĩkĩte naĩ amanye kana nũvĩtĩtye na ayenda kwĩlila. Ũla mũtenge no aendeee kũthi maũmbanonĩ nĩ kana aĩthwʼe kĩ-veva na mũĩkĩĩo wake ũilũlũmĩĩlwʼa. O na no eloele JW Broadcasting^® na akakwata mavuku kwondũ wa kwĩmanyĩsya e weka. Na atumĩa moona nĩwĩkĩte moalyũku, no mamũnengae ũtao mavinda kwa mavinda ũmũtetheesye kũtũngĩĩa ngwatanĩo yake na Yeova, nĩ kana ese kũtwʼĩka ĩngĩ ũmwe wa Ngũsĩ syake.b

12. Yĩla mũndũ waema kwĩlila, nĩ ũndũ wĩva atumĩa matonya kwĩka makonanyʼa me wendo na me tei?

¹² Nĩ ũndũ wa vata tũlilikane kana ala matengawa no ala mate kwenda kwĩlila. Atumĩa nĩmesĩ kana ũsu nĩ ũtwi mũito, na maiũvũĩaa ngũĩ. Nĩmesĩ kana Yeova ‘akanasya athimĩte.’ (Yel. 30:11) Nĩmendete ana-a-asa moo, na mayĩsa kwenda kwĩka kĩndũ kĩtonya kũtuma ngwatanĩo ya ana-a-asa na Yeova yanangĩka. Ĩndĩ mavinda amwe, kĩndũ kĩla kĩtonya kwonanyʼa kana me wendo na me tei, nĩ kũvetanga mwĩki wa naĩ kĩkundinĩ kwa ĩvinda yĩana ũna.

13. Nĩkĩ Mũklĩsto ũmwe wa Kolintho waaĩle kũtengwa?

¹³ Kwaekai twone ĩtambya yĩla mũtũmwa Vaulo woosie yĩla mũndũũme ũmwe ĩvindanĩ yoo weekie naĩ ngito na aema kwĩlila. Mũklĩsto ũsu aĩ wa Kolintho, na oosete kĩveti kya ĩthe wake. Ũsu waĩ ũndũ wĩ nthoni ta kĩ! Vaulo nĩweesĩ kana Yeova eeĩte mbaĩ ya Isilaeli atĩĩ: “Mũndũ ũla ũkakoma na kĩveti kya ĩthe wake nũvuĩte ĩthe wake amwone e mũthei: no mũvaka me elĩ moawe.” (Ali. 20:11) Kwa wʼo, Vaulo ndaĩ esa kumya mwĩao kĩkundi kĩu kyũae mũndũũme ũsu. Ĩndĩ ameie nĩmamũtenge. Mwĩkalĩle wa mũndũũme ũsu wakwetye kwasya ala angĩ kĩkundinĩ, o na amwe mayoonaa mwĩkalĩle wake ta wĩ nthoni!—1 Ako. 5:1, 2, 13.

14. Vaulo oonanisye ata kana nũkwĩwʼĩa tei mũndũũme ũla watengetwe kĩkundinĩ kya Kolintho, na nĩkĩ wamwĩwʼĩie tei? (2 Akolintho 2:5-8, 11 na maelesyo ma kwongeleela mũsoanĩ wa 5)

¹⁴ Ĩtina wa ĩvinda, Vaulo nĩwakwatie livoti kana mũndũũme ũsu nĩweekĩte moalyũku manene. Nĩwamanyie kana nĩweelilĩte kuma ngoonĩ! O na kau mũndũũme ũsu nĩweekĩĩthĩtye kĩkundi nthoni, Vaulo eeie atumĩa kana we ndekwenda kwĩthĩwa e “mũkalĩ.” Ameie nĩmethĩwe ‘meyũmbanĩtye kũmũekea na kũmũkiakisya.’ Nĩkĩ? Amatavisye ũũ: “Nĩ kana ndakaemeewe nĩ kyeva.” Vaulo nĩweewʼĩie tei mũndũũme ũsu nũndũ nĩwoonie nĩwĩlilĩte. Ndendaa kwona aiemeewa nĩ kyeva kana aikwʼa ngoo vyũ nũndũ wa kĩla weekĩte, nginya aeke kũmantha ũekeo.—Soma 2 Akolintho 2:5-8, 11 na maelesyo ma kwongeleela mũsoanĩ wa 5.

15. Nĩ kwa nzĩa yĩva atumĩa matonya kwĩthĩwa na tei ĩndĩ mateũlekeleelya ũkanyʼo mũito?

¹⁵ Nũndũ atumĩa maatĩĩaa ngelekanyʼo ya Yeova, o namo nĩmendete kwĩwʼĩa ala angĩ tei. Yĩla ve vata nĩmanengae mũndũ ũkanyʼo mũito, ĩndĩ yĩla vatonyeka nĩmamwĩwʼĩaa tei, moona ve kĩtumi kya kwĩka ũu. Na kĩtumi nũndũ makamwĩwʼĩa tei meeaĩle kũmũkanyʼa, wĩthĩwa wĩ ũndũ ũmwe na kũmũnanyʼa. Ĩndĩ no atumĩa me oka maĩlĩte kwĩwʼĩaa ala angĩ tei?

NĨ KYAŨ KĨTONYA KŨTŨTETHEESYA ITHYONTHE TWĨWʼĨAE ANGĨ TEI?

16. Kwosana na Nthimo 21:13, Yeova ekaa ata oona mũndũ ate kwĩwʼĩa ala angĩ tei?

¹⁶ Aklĩsto onthe nĩmatataa mũno methĩwe me tei o ta Yeova. Nĩkĩ? Kĩtumi kĩmwe nũndũ Yeova ndesa kwĩthukĩĩsya ala matewʼĩaa angĩ tei. (Soma Nthimo 21:13.) Na nũndũ vai ũmwe witũ wenda kwona Yeova ailea kwĩthukĩĩsya mboya syake, twĩkĩaa kĩthito kingĩ vyũ twĩsũvĩe tũikethĩwe na ngoo mbũmũ. Vandũ va kũkunĩka matũ tũikewʼe yĩla Mũklĩsto wĩ thĩnanĩ ũkũtũkayĩa, mavinda onthe twaĩle kwĩthĩwa twĩyũmbanĩtye kwĩthukĩĩsya “kĩĩo kya ngya.” O na ĩngĩ, tũtataa ũndũ tũtonya tũlilikane ũkanyʼo ũũ wĩ Mbivilianĩ: “Ũla ũtethĩawa na tei akasilĩlwa vate tei.” (Yak. 2:13) Tweenyivya na tũililikana kana twĩ na vata mũnene wa kwĩwʼĩwa tei, tũkeethĩawa na wendi mwingangĩ wa kwĩwʼĩaa angĩ tei. Na mũno mũno yĩla mwĩki wa naĩ weelila na atũngwa kĩkundinĩ, nĩtwaĩle kũmwĩwʼĩa tei.

17. Mũsumbĩ Ndaviti oonanisye ata kana nĩweewʼĩaa angĩ tei kuma ngoonĩ?

¹⁷ Ve ngewa sya andũ mawetetwe Mbivilianĩ itonya kũtũtetheesya twĩmanyĩsye kwĩwʼĩa angĩ tei na tũyĩsũvĩa tũikethĩwe twĩ akalĩ. Ũmwe nĩ Mũsumbĩ Ndaviti. Nĩweewʼĩaa andũ tei mũno. Kwa ngelekanyʼo, yĩla Saulo waĩ mũsumbĩ wĩtĩkĩwʼe mauta nĩ Ngai, nĩwamanthaa kũmũaa Ndaviti, ĩndĩ Ndaviti nĩwamwĩwʼĩaa tei na ndaasũanĩa kwĩyĩĩvanĩsya kana kũmũũmĩsya.—1 Sam. 24:9-12, 18, 19.

18-19. Nĩ mavinda meva elĩ Ndaviti ũtaaĩwʼĩa angĩ tei?

¹⁸ Ĩndĩ ti mavinda onthe Ndaviti weewʼĩaa angĩ tei. Kwa ngelekanyʼo, yĩla Navali waneenie na kĩvũthya na alea kũnenga Ndaviti na aũme make lĩu nũndũ aĩ na ngoo mbũmũ, Ndaviti athatie mũno nginya enda kũmũaa vamwe na aũme onthe ma nyũmba yake. Ĩndĩ mũka wa Navali, ũla weetawa Avikaili, aĩ wũmĩĩsyo na nĩwendete kwĩka angĩ nesa, na kwoou nĩwoosie ĩtambya na mĩtũkĩ. Ĩtambya yĩla woosie nĩyasũvĩie Ndaviti ndaketĩkye nthakame.—1 Sam. 25:9-22, 32-35.

¹⁹ Ĩvinda yĩngĩ, mwathani Nathani atavisye Ndaviti ĩũlũ wa mũndũ wai mũthwii wavenie mũtũi wake waĩ ngya kalondu kake wendete. Ndaviti amũsũngĩie ũũ e mũthilĩku mũno: “O tondũ Yeova wĩ thayũ, mũndũ ũla wekie ũu nĩwaĩle kũkwʼa.” (2 Sam. 12:1-6) Ndaviti nĩweesĩ Mĩao ya Mose nesa mũno. Nĩweesĩ yaĩtye kana mũndũ ooya ĩlondu aĩlĩte kũyĩĩvĩa kũndũ kũna. (Kuma 22:1) Ĩndĩ aĩ we yu oonie kĩkwʼũ nĩkyo kĩmwaĩle! Ũsu waĩ ũsilĩlo mũkalĩ mũno. Ĩndĩ Ndaviti esie kwĩthĩa kaĩ ĩsu no ngelekanyʼo Nathani watũmĩie kũelesya ĩũlũ wa mũndũ ũngĩ weekĩte naĩ ingĩ nthũku o na kwĩ ĩsu, na mũndũ ũsu aĩ ũ Ndaviti mwene! Na Yeova nĩweewʼĩie Ndaviti tei mũno o na kwĩ ũndũ ũ Ndaviti waĩ atonya kwĩwʼĩa tei ũla mũndũ wavenanie ĩlondu ngelekanyʼonĩ ya Nathani!—2 Sam. 12:7-13.

20. Ngewa ya Ndaviti yĩtũmanyĩsya kyaũ?

²⁰ Nĩwoona kana yĩla Ndaviti wathilĩkile nĩwʼo watwʼĩĩie Navali na aũme make onthe kũawa? Na ĩtina, Ndaviti aisye kana ũla mũndũ wawetiwe nĩ Nathani ngelekanyʼonĩ yake aaĩle kũawa nũndũ wa kĩla weekĩte. No tũsengʼe nĩkĩ Ndaviti watwʼĩĩie mũndũ ũsu wawetiwe nĩ Nathani ũsilĩlo mũkalĩ ũu na nĩtwĩsĩ we eethĩawa e mũndũ wĩ ngoo nzeo. Kũsũanĩa kĩla kyaendeee ĩvindanĩ yĩu no kũtũtethye. Ĩvinda yĩu Ndaviti nĩwaandũawa nĩ wasya wake wa ngoo. Na kwa wʼo, mũndũ ũsilĩlaa angĩ e mũkalĩ onanasya kana ngwatanĩo yake na Yeova yĩ na thĩna. Nĩkyo kĩtumi Yesũ wanengie aatĩĩi make ũkanyʼo ũũ mũito: “Ekai kũsilĩla nĩ kana mũikasilĩlwe; nũndũ ũsilĩlo ũla mũsilĩlaa nawʼo, nowʼo mũkasilĩlwa nawʼo.” (Mt. 7:1, 2) Kwoou nĩtwĩsũvĩei tũikethĩawe twĩ akalĩ, na tũyĩkĩaa kĩthito twĩthĩwe na “tei mwingĩ” ta Ngai witũ.

21-22. Nĩ maũndũ ta meva tũtonya kwĩka tũkonanyʼa kana nĩtũkwĩwʼĩa ala angĩ tei?

²¹ Mũndũ wĩ tei ndekaa o kũthĩnĩka oona ala angĩ me thĩnanĩ. Mũndũ wĩ tei aeleawʼa ta “mũndũ wosaa ĩtambya atetheesye angĩ nũndũ wa ĩnee.” Kwoou, ithyonthe no tũsisye naaũ mekwenda kũtethwʼa mĩsyĩnĩ yitũ, ikundinĩ sitũ, kana ũtũinĩ. Twasisya nesa, tũilea kwona aingĩ mekwenda kwĩwʼĩwa tei! Kwa ngelekanyʼo, ve ũmwe ũkwenda kũkiakiwʼa? Ve ũmwe ũkwenda kwĩkwa kaũndũ kana kamũtethya, ta kũtwaĩwa lĩu? Nĩvethĩwa ve Mũklĩsto ũnatũngiwe kĩkundinĩ na yu nũkwenda mũnyanya ũtonya kũmũkiakisya na kũmwĩkĩa vinya? Nĩvethĩwa ve andũ ũtonya kũkiakisya na ũvoo mũseo ũla tũtavanasya? Kũtavanyʼa nĩ nzĩa ĩmwe nzeo vyũ ya kwonyʼa andũ kana nĩtũũmewʼĩa tei.—Yovu 29:12, 13; Alo. 10:14, 15; Yak. 1:27.

²² Twasalukya, no twone myanya mingĩ mũno ya kwonyʼa ala me vakuvĩ naitũ kana nĩtũũmewʼĩa tei. Naitũ tweewʼĩa angĩ tei, nĩtũmũtanĩthasya Asa witũ wa ĩtunĩ mũno, nũndũ we nĩ Ngai wĩ “tei mwingĩ”!