ŨNDŨ ŨTONYA KŨSINDA KĨMENA

2 | Ndũkeyĩĩvanĩsye

Kĩla Mbivilia Ĩmanyĩasya:

“Mũikeyĩĩvanĩsye ũthũku kwa ũthũku kwa mũndũ o na wĩva. . . . Na ethĩwa nĩvatonyeka, ngalĩ ĩ yenyu, ĩthĩwai na mũuo na andũ onthe. Mũikeyĩĩvanĩsye, . . . nũndũ nĩkũandĩkĩtwe, ‘“Ũĩvanĩsyo nĩ wakwa; ngaĩvanĩsya,” easya ũu Yeova.’”—ALOMI 12:17-19.

Kĩla Yĩthĩawa Ĩyonanyʼa:

O na kau ti ũthũku mũndũ kwĩwʼa woo yĩla wavĩtĩwʼa, Ngai ndendaa twĩyĩĩvanĩsye. Vandũ va ũu, atwĩkĩaa vinya tũendeee kũmĩĩsya nũndũ o mĩtũkĩ nũkũvetanga ũthũku wʼonthe.—Savuli 37:7, 10.

Ũndũ Ũtonya Kwĩka:

Yĩla tweyĩĩvanĩsya, kĩmena nĩkyongelekaa. Kwoou yĩla mũndũ waũvĩtĩsya kana wakũũmĩsya, ndũkeyĩĩvanĩsye. Tata wĩsiĩĩe na ũyĩka ũndũ ũtonya kũete mũuo. Mavinda angĩ ndũũmĩawʼa mũno nĩ ĩvĩtyo yĩla wĩkĩtwe ethĩwa nĩwatwʼa kũekana nayo. (Nthimo 19:11) Ĩndĩ o na vailye ũu, nĩvatonyeka mavinda amwe ũkethĩwa wĩ ũseo kwosa ĩtambya ya kũthĩnĩkĩa ũndũ ũsu. Kwa ngelekanyʼo, ethĩwa nĩweekwa ũndũ mũthũku mũno, no ũtwʼe kũkũna livoti volisi kana mĩvĩanĩ ĩngĩ ya silikalĩ.

Mũndũ eyĩĩvanĩsya ethĩawa ayĩyĩũmĩsya we mwene

Nao nata ethĩwa ndũkwona ta vatonyeka ũkamantha mũuo na ũla ũkũvĩtĩsye? Kana nata ethĩwa nũtatĩte vyũ ũthĩnĩkĩe ũndũ ũsu nesa na vakaemela? Ndũkeyĩĩvanĩsye. Kwĩyĩĩvanĩsya no kũtume maũndũ mathũkĩĩa. Ĩndĩ kũlea kwĩyĩĩvanĩsya no kũũtetheesye kũsinda kĩmena. O na ĩngĩ, kwĩka ũu no kũũtetheesye ũkemanyĩsya kũmwĩkwatya Ngai athĩnĩkĩe ũndũ ũsu. Mbivilia yaĩtye: “Mũĩkĩĩe we, nake akeeka.”—Savuli 37:3-5.

Ngewa—ADRIÁN

Nĩwaekie Kwenda Kwĩyĩĩvanĩsya

Yĩla Adrián waĩ na myaka ĩkũmi na kĩndũ, aĩ mũngʼendu na nĩwamenete andũ mũno, na kwondũ wa ũu, nĩwendaa kwĩyĩĩvanĩsya kwa mũndũ o na wĩva ũla wamũvĩtĩsya. Aĩtye atĩĩ: “Mavinda kwa mavinda nĩtwokitaa na mavuti, o na ve mavinda amwe naũmĩaa mũno vyũ nginya ngatiwa nĩ vakuvĩ kũkwʼa.”

Adrián ambĩĩie kwĩmanyĩsya Mbivilia e na myaka 16. Aendeee kwasya: “O ũndũ naendeeie kwĩmanyĩsya Mbivilia, nowʼo noonaa naĩle kũalyũla mwĩkalĩle wakwa.” Adrián nĩwaaĩlĩte kũekana na kĩmena na ũngʼendu. Nĩwatethekie mũno nĩ kĩla weemanyĩisye ĩandĩkonĩ ya Alomi 12:17-19, yĩla yĩeleetye ĩũlũ wa kũlea kwĩyĩĩvanĩsya. Aĩtye: “Nĩnesie kwĩtĩkĩla kana Yeova nĩwe ũkavetanga ũsili ũte wa katĩ ĩvindanĩ yake na kwa nzĩa yake. O kavola kwa kavola, nĩnaekie kwĩthĩwa nĩ mũngʼendu.”

Mũthenya ũmwe ĩ ya wĩoo, nĩwavũiwe nĩ kĩkundi kĩmwe maĩ amaitha nakyo navu ĩtina. Mũtongoi wa kĩkundi kĩu amwĩie: “Ethĩwa wĩ mũndũũme ĩtetee!” Adrián easya: “Neewʼaa ndyenda kwĩyĩĩvanĩsya.” Ĩndĩ vandũ va kwĩyĩĩvanĩsya, nĩwamũvoyie Yeova mboya nguvĩ na auma vau.

Adrián aendeee kwasya: “Mũthenya ũla waatĩĩe, nĩnakomanie na mũtongoi wa kĩkundi kĩu kya imwana isu e weka. Nĩnathatie mũno ĩla namwonie na neewʼa naĩle kwĩyĩĩvanĩsya, ĩndĩ nĩnamũvoyie Yeova ĩngĩ andetheesye ndikaĩvanĩsye. Ũndũ ũla wanzengʼisye nĩ kana kĩmwana kĩu kyookie vala nĩĩ na kyambĩa atĩĩ: ‘Mwa ndekea nũndũ wa maũndũ ala mekĩkie ĩyoo wĩoo. No nende ngethĩwa nĩilyĩ taku. Nĩenda kwĩmanyĩsya Mbivilia.’ Natanie mũno nũndũ nĩnesiĩĩie ndikeke ũndũ ũtaĩle! Na nũndũ wa ũu, nĩtwambĩĩie kwĩmanyĩsya Mbivilia nĩ na mwanake ũsu.”