ŨNDŨ ŨTONYA KŨSINDA KĨMENA

1 | Ndũkethĩwe Na Kyende

Kĩla Mbivilia Ĩmanyĩasya:

“Ngai nde kyende, ĩndĩ mbaĩnĩ syonthe mũndũ ũla ũmũkĩaa na wĩkaa ũla waĩle nĩwĩtĩkĩlawa nĩwe.”—MEKO MA ATŨMWA 10:34, 35.

Kĩla Yĩthĩawa Ĩyonanyʼa:

Yeovaa Ngai ndatũtwʼĩĩaa sila kwosana na nthĩ ĩla tumĩte, ũko witũ, kĩkonde kitũ, kana kĩthĩo kitũ. Ĩndĩ asiasya kĩndũ kĩla kya vata vyũ, nakyo nĩ kĩla kĩ kĩlĩkonĩ na ngoonĩ sitũ. Mbivilia yaĩtye: “Mũndũ asiasya mũvwʼanĩle wa ũtheinĩ, ĩndĩ Yeova asiasya ngoonĩ.”—1 Samueli 16:7.

Ũndũ Ũtonya Kwĩka:

O na kũtwʼĩka tũitonya kũsoma ngoo, no tũatĩĩe ngelekanyʼo ya Ngai kwa kwĩthĩwa tũte na kyende. Tata ndũkasilĩle mũndũ aĩ nũndũ nĩ wa kĩkundi kĩna kya andũ. Wamanya kana nĩwĩthĩawa na mawoni mataĩlĩte ĩũlũ wa angĩ, ta andũ ma ũko ũngĩ kana ma nthĩ ĩngĩ, mũvoye Ngai aũtetheesye ũvetange vyũ mosũanĩo asu kĩlĩkonĩ. (Savuli 139:23, 24) Wamũvoya kuma ngoonĩ aũtetheesye wĩthĩwe ũte na kyende, ndakalea kũũtetheesya.—1 Vetelo 3:12.

a Yeova nĩyo ĩsyĩtwa ya Ngai.—Savuli 83:18.

“Ndyaĩ naakomana na mũndũ wa kĩkonde kyeũ tũkewʼana . . . Ĩndĩ yu naĩ nĩnatwʼĩka ũmwe wa ana-a-asa maumĩte isionĩ syĩ kĩvathũkanyʼo ĩũlũ wa nthĩ, ĩndĩ mendanĩte kuma ngoonĩ.”—TITUS

Ngewa—TITUS

Nĩwasindie Kĩmena

Titus eethĩawa kĩkundinĩ kya aũme angʼendu mathatĩtwʼe mũno nĩ mĩao mĩna yavathũlaa andũ ma ũko ũmwe. Aĩtye: “Nĩtwaendaa taoni kũla andũ aiũ matathoketwʼe, ta motelinĩ na ilavunĩ, nĩ kenda o twambĩĩsye nduuthĩ.” Titus awetete kana eekaa maũndũ asu no ũndũ wa kĩmena, na ongelete kwasya: “Yĩla naemanwa na mũndũ, ethĩwe nĩ mũndũũme kana nĩ mũndũ mũka, mavinda onthe ninyie nekasya ngundi ya mbee.”

Titus ambĩĩie kũalyũla mwĩkalĩle wake yĩla wambĩĩie kwĩmanyĩsya Mbivilia na Ngũsĩ sya Yeova. Mbivilia yaalyũlile vyũ mosũanĩo make. Na mũno mũno akiitiwe ngoo nĩ watho wa nthĩ nzaũ, vala ‘kĩkwʼũ kĩtakethĩwa vo ĩngĩ, o na kũtakethĩwa ĩngĩ kĩmeto kana kĩĩo kana woo.’—Ũvuanyʼo 21:3, 4.

Mwambĩlĩĩlyonĩ, Titus nĩwaemawa nĩ kũvetanga kĩmena ngoonĩ. Aĩtye: “Neewʼaa ve vinya mũno kũalyũla mosũanĩo na meko makwa.” Ĩndĩ nĩwatetheeiwʼe nĩ kĩla weemanyĩisye ĩandĩkonĩ ya Meko ma Atũmwa 10:34, 35, yĩla yaĩtye kana Ngai nde kyende.

Kweethĩiwe ata? Titus aĩtye: “Nĩneeyĩkĩĩthisye kana Ngũsĩ sya Yeova nĩsyo ndĩni ĩla ya wʼo yĩla noonie ũndũ mendanĩte, o na ethĩwa maumĩte ngo syĩ kĩvathũkanyʼo kana me na ikonde syĩ kĩvathũkanyʼo. O na ndanamba kũvatiswa ndwʼĩke Ngũsĩ, mwana-a-asa ũmwe waĩ wa kĩkonde kyeũ nĩwanthokisye mũsyĩ kwake tũĩsanĩe lĩu. Noonie ta ndoto! Ndyaĩ naakomana na mũndũ wa kĩkonde kyeũ tũkewʼana, o na eka kũya lĩu nake mũsyĩ kwake! Ĩndĩ yu naĩ nĩnatwʼĩka ũmwe wa ana-a-asa maumĩte isionĩ syĩ kĩvathũkanyʼo ĩũlũ wa nthĩ, ĩndĩ mendanĩte kuma ngoonĩ.”