Kĩla Kĩtonya Kũũtetheesya Wĩmanyĩasye Ũteũtĩĩa
WE NĨWĨWʼAA ve vinya kwĩmanyĩsya we mwene ũteũtĩĩa na kũtanĩa kĩla ũkwĩmanyĩsya? Mavinda amwe ithyonthe nĩtwĩwʼaa ũu. Ĩndĩ kwasũanĩa maũndũ angĩ twĩkaa tũteũtĩĩa, ta kũthamba. Kũthamba nĩkũkuaa ĩvinda na nĩkwendaa kĩthito, ĩndĩ kũtũtiaa twĩwʼĩte nesa vyũ. No twasye kwĩmanyĩsya Mbivilia no ũndũ ũmwe na ‘kũthambwʼa na kĩwʼũ kwĩsĩla ndeto ya Ngai.’ (Aev. 5:26) Kwasũanĩa maũndũ amwe matonya kũũtetheesya:
Vangĩĩa ĩvinda ya kwĩmanyĩsya. Kwĩmanyĩsya Mbivilia we mwene nĩ ũndũ ũmwe katĩ wa “maũndũ ala ma vata” Mũklĩsto ũtaĩle kũlekeleelya. (Avi. 1:10) Nĩ kana ũatĩĩe mũvango waku nesa, wĩona ata ũkaũmbĩĩa vandũ ũtonya kũwona na mĩtũkĩ, ta ũvwaũnĩ kana mũomonĩ wa fridge? O na no ũtetheke weekĩa alarm simũnĩ yaku nĩ kana ĩũlilikanasye kavinda kakuvĩ saa sya kwĩmanyĩsya itanavika.
Sũanĩa kĩla kĩtonya kũũtetheesya ũtũnge kĩlĩko vandũ vamwe ũyĩmanyĩsya. We wĩwʼaa ve laisi kũtũnga kĩlĩko vandũ vamwe yĩla ũkwĩmanyĩsya ĩvinda yĩasya-ĩ, kana nĩ yĩla weemanyĩsya kavinda kakuvangĩ na ũyĩka ũu savalĩ iana ũna? Nue wĩyĩsĩ nesa. Kwoou ĩvangĩĩe kĩla ũkwona kĩũtethya. Na ethĩwa ndũkwĩwʼa ũyenda kwĩmanyĩsya saa ila wĩvangĩĩe syavika, no ũtate kwĩmanyĩsya o kwa ndatĩka ĩkũmi. Kwĩmanyĩsya ĩvinda ĩkuvĩ ta yĩu kũianene na mana. Na ũwʼo nĩ kana ndatĩka isu iitwʼĩka nĩsyathela, no wĩwʼe wĩ na wendi wa kũendeea.—Avi. 2:13.
Nyuva kwĩ tene maũndũ ala ũkwĩmanyĩsya. Watwʼĩka wĩeteela nginya ĩvinda ya kwĩmanyĩsya yĩvike nĩ kana ũnyuve kĩla ũkwĩmanyĩsya, kĩu no kĩtume ‘ũtatũmĩa ĩvinda yaku nesa.’ (Aev. 5:16) Kwoou wĩona ata ũkaandĩka ilungu kana syongo ila ũkwenda kwĩmanyĩsya? Na kĩla ĩvinda wasũanĩa ĩkũlyo ĩna, yĩandĩke vandũ. Eka ũu, kĩla ĩvinda wamina kwĩmanyĩsya, no ũandĩke maũndũ angĩ ũkwĩwʼa ũyenda kwĩsa kwĩmanyĩsya.
Alyũkana na maũndũ. Woona ve vata, no ũtate kũvĩndũa mũthenya ũla wĩmanyĩasya, saa sya kwĩmanyĩsya, ĩvinda yĩla ũũkua ũyĩmanyĩsya, kana syongo ila ũkwĩmanyĩsya. Kĩla kya vata vyũ nĩ kwĩmanyĩsya ũteũtĩĩa, ĩndĩ ti saa ila ũkwĩmanyĩsya, ĩvinda yĩla ũũtũmĩa, kana kĩla ũkwĩmanyĩsya.
Kwa wʼo, nĩtũtethekaa mũno yĩla tweethĩwa na mũvango wa kwĩmanyĩsya tũteũtĩĩa. Nĩtũmũthengeeaa Yeova mũnango, tũkemanyĩsya kwĩka motwi maseo, na tũkewʼa tweekĩwa vinya.—Yos. 1:8.