Ngai Nĩwe Woombie Ndevili?

Ũndũ Mbivilia yaasya

Mbivilia yonanasya kana Ngai ndaaũmba Ndevili. Ĩndĩ oombie kyũmbe kĩla kyesie kũtwʼĩka Ndevili. Mbivilia yaĩtye ũũ ĩũlũ wa Ngai: “Wĩa wake nĩ mwĩanĩu; nũndũ nzĩa syake syonthe nĩ ndũngalu: Ngai wa kĩthito na ũte na naĩ, nake nĩ wa wʼo na mũlũngalu.” (Kũtũngĩlĩlwa Kwa Mĩao 32:3-5) Kwosana na ndeto isu, no twasye kana ĩvinda yĩmwe Satani aĩ mwĩanĩu na mũlũngalu, e ũmwe wa alaĩka ma Ngai.

Ĩvukunĩ ya Yoana 8:44, Yesũ aisye kana Ndevili “ndaaĩkala nthĩnĩ wa wʼo,” kwonanyʼa kana ve ĩvinda Satani waĩ ngalĩ ya ũwʼo ate na naĩ.

O na ũu wĩ o vo, mũlaĩka ũla wesie kũtwʼĩka Satani, o ta syũmbe syonthe syĩ kĩlĩko ila Yeova woombĩte, aĩ na ũthasyo wa kwĩka ũla ũseo kana ũla ũthũku. Kwa kũnyuva kũmũvĩnga Ngai na kũkenga asyai maitũ ma mbee, nĩweetwʼĩkĩthisye Satani, syĩtwa yĩla yonanasya “Mũvĩnganisya.”—Mwambĩlĩlyo 3:1-5; Ũvuanʼyo 12:9