Ndevili Ekalaa Va?

Ũndũ Mbivilia yaasya

Nũndũ Ndevili nĩ kyũmbe kya veva, tũitonya kwona vala wĩkalaa. Ĩndĩ o na vailyĩ ũu, we ndekalaa ĩianĩ ya mwaki aithĩnyʼa andũ ala athũku o tondũ mavisa ala me kĩlungunĩ kĩĩ mekwonanyʼa.

“Kaũ ĩtunĩ”

Kwa ĩvinda, Satani ũla Ndevili nĩwaendaa kũla syũmbe sya veva syĩkalaa o ĩla wenda, o na nĩwaendaa na kũũngama mbee wa Ngai vamwe na alaĩka ala aĩkĩĩku. (Yovu 1:6) Ĩndĩ Mbivilia nĩyathanie kana kũkeethĩwa “kaũ ĩtunĩ” ũla wesaa kũtuma Satani alũngwʼa ĩtunĩ na ‘ayĩkwʼa nthĩ.’ (Ũvuanʼyo 12:7-9) Ũndũ maũndũ ala mawetetwe Mbivilianĩ maatĩanĩe, vamwe na maũndũ ala mekĩkĩte kũũ ĩũlũ wa nthĩ, meĩkĩĩthya kana kaũ ũsu nĩwokitiwe ĩtunĩ. Na kwoou Ndevili nĩwekiwʼe kũũ ĩũlũ wa nthĩ.

Ĩndĩ ũu wĩonanyʼa kana Ndevili ekalaa vandũ vana ĩũlũ wa nthĩ? Kwa ngelekanyʼo, mũsyĩ wa tene wa Velikamu weeawa nĩvo “ve kĩvĩla kya ũsumbĩ kya Satani” na nĩvo “vala Satani ũtwĩe.” (Ũvuanʼyo 2:13) Nĩvatonyeka ndeto isu ikethĩwa syoonanasya ũndũ ũthaithi wa Satani waingĩvĩte mũsyĩnĩ ũsu. Mbivilia yaĩtye kana Ndevili nĩwe ũsumbĩkĩte “mosumbĩ onthe ma nthĩ.” Ũu wĩonanyʼa kana ndekalaa vandũ vana kũũ ĩũlũ wa nthĩ.​—Luka 4:​5, 6.