Nĩ Masyĩtwa ma Aaũ Maandĩkĩtwe ‘Ĩvukunĩ ya Thayũ’?

Ũndũ Mbivilia yaasya

“Ĩvuku ya thayũ,” yĩla o na ĩngĩ yĩtĩtwe “ĩvuku ya kũkũnzwa ya thayũ,” kana “ĩvuku ya ũlilikanyʼo,” yĩandĩkĩtwe masyĩtwa ma andũ ala me na wĩkwatyo wa kũkwata mũthĩnzĩo wa thayũ ũtathela. (Ũvuanʼyo 3:5; 20:12, New World Translation; Malaki 3:16) Ngai aamũaa masyĩtwa ala ũkũandĩka vo kwosana na ũndũ mũndũ wekala e mũĩkĩĩku kwake.​—Yoana 3:16; 1 Yoana 5:3.

Ngai aiĩte athũkũmi make aĩkĩĩku kĩlilikanonĩ kyake, ũkethĩa no ta ũmaandĩkĩte ĩvukunĩ, kuma “mwambĩlĩlyo wa nthĩ,” ĩla woombie andũ. (Ũvuanʼyo 17:8) Nĩvatonyeka ũkethĩa Aveli ũla waĩ mũndũũme mũĩkĩĩku nowe waĩ wa mbee kũandĩkwa ĩvukunĩ yĩu ya thayũ. (Aevelania 11:4) Yĩu ti o ĩvuku yĩ na masyĩtwa maandĩkĩtwe, ĩndĩ nĩyĩtwonasya kana Yeova nĩ Ngai wĩ wendo, na “nũmesĩ ala make.”​—2 Timotheo 2:19; 1 Yoana 4:8.

Yo masyĩtwa ala me ‘ĩvukunĩ ya thayũ’ no mavutwe?

Ĩĩ. Ngai aisye ũũ ĩũlũ wa ala matamwĩwʼaa ĩvindanĩ ya Aisilaeli: “O ũla ũmbĩtanĩsye, ũsu ngavuta ĩvukunĩ yakwa.” (Kuma 32:33) Ĩndĩ twaendeea kwĩkala twĩ aĩkĩĩku, masyĩtwa maitũ maikavutwa ‘ĩvukunĩ ya kũkũnzwa ya thayũ.’​—Ũvuanʼyo 20:12, NWT.