Alomi 6:23—“Ĩtuvi ya Naĩ Nĩ Kĩkwʼũ, Ĩndĩ Mũthĩnzĩo wa Ngai Nĩ Thayũ Ũtathela”

“Ĩtuvi ya naĩ nĩ kĩkwʼũ, ĩndĩ mũthĩnzĩo ũla Ngai ũnenganae nĩ thayũ wa tene na tene kwĩsĩla Klĩsto Yesũ, Mwĩaĩi waitũ.”—Alomi 6:23, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Ĩtuvi ya naĩ nĩ kĩkwʼũ, ĩndĩ mũthĩnzĩo wa Ngai nĩ thayũ ũtathela kwĩsĩla Klĩsto Yesũ, Mwĩaĩi waitũ.”—Alomi 6:23, New International Version.

Kĩla Ĩandĩko ya Alomi 6:23 Yonanasya

Mũtũmwa Vaulo atũmĩie ndeto isu kwonanyʼa kana andũ makusaa nũndũ wa naĩ. Ĩndĩ o na vailye ũu, Ngai nĩwathĩte athũkũmi make aĩkĩĩku wĩkwatyo wa mwanya, nawʼo nĩ mũthĩnzĩo wa thayũ wa tene na tene.

“Ĩtuvi ya naĩ nĩ kĩkwʼũ.” Andũ onthe masyaawa me na naĩ, na nũndũ wa ũu methĩawa na mũtuo wa kwenda o kwĩka naĩ.a (Savuli 51:5; Mũtavanʼya 7:20) Nũndũ andũ onthe methĩawa na naĩ, nĩkyo kĩtumi makũaa na maikwʼa.—Alomi 5:12.

Nĩ kana aelesye ũndũ ũsu, Vaulo aelekanilye naĩ na vwana ũla ũĩvaa ndĩvi. O tondũ mũthũkũmi wĩthĩawa ekwatĩtye aĩvwe nũndũ wa wĩa ũla ũtethisye, o namo andũ makusaa nũndũ me na naĩ.

Ĩndĩ o na vailye ũu, Vaulo nĩwasyokie aelesya kana “mũndũ ũla wakwʼa ethĩawa athaĩtwʼe kuma naĩnĩ yake.” (Alomi 6:7) Yĩla mũndũ wakwʼa, ethĩawa athawʼa kumana na naĩ o na yĩva ĩla waaĩka. Kĩu nĩkyo kĩtumi tũtaĩle kũsũanĩa kana ala akwʼũ ve vandũ maendeeaa kũthĩna nũndũ wa mavĩtyo ala meekie. O na Mbivilia nĩyonanĩtye nesa vyũ kana ala akwʼũ mayĩsa kũsũanĩa, kwĩka ũndũ kana kwĩwʼa ũndũ o na ũmwe.—Mũtavanʼya 9:5.

“Ĩndĩ mũthĩnzĩo ũla Ngai ũnenganae nĩ thayũ wa tene na tene kwĩsĩla Klĩsto Yesũ.” Kĩvathũkanyʼo na “ĩtuvi” yĩla naĩ ĩĩvaa, Ngai atũnengae mũthĩnzĩo wa thayũ wa tene na tene. Ndeto ya tene ĩla yonanasya “mũthĩnzĩo”, ĩngĩ no ĩalyũlwe ta “mũthĩnzĩo ũtaĩle kũnengwa” kana “mũthĩnzĩo wa tei.” Yonanasya kĩndũ mũndũ wanengwa o na kau ndakĩthũkũmĩe. Vai mũndũ o na ũmwe wĩ na naĩ ũtonya kũnengane ũtangĩĩo na thayũ wa tene na tene. (Savuli 49:7, 8) Ĩndĩ o na vailye ũu, Ngai anenganae mana mũthĩnzĩo ũte maela wa thayũ wa tene na tene kwa ala mamũĩkĩĩaa Yesũ.—Yoana 3:16; Alomi 5:15, 18.

Mĩsoa Ĩla Ĩthyũlũlũkĩte Alomi 6:23

Vaulo aandĩkĩie Aklĩsto ma Lomi valũa ũũ ta mwaka wa 56 ĩtina wa Klĩsto. Veonekana Aklĩsto amwe ĩvindanĩ yĩu maĩ na mawoni mathũku ĩũlũ wa tei wa Ngai. Nũndũ nĩmalikĩtwe vyũ nĩ momanyĩsyo ma ũvũngũ ma Kĩkiliki, nĩmatonya kwĩthwa masũanĩaa kana o ũndũ meeka naĩ singĩvĩte, nowʼo Ngai ũkamaekeaa mũno wĩana. (Alomi 6:1) Angĩ namo maĩ matonya kwasya kana mayaĩle kũtũlwa mũtĩ o na vanini nũndũ wa mavĩtyo moo nũndũ mayaĩ ungu wa Mĩao ya Mose ĩngĩ. (Alomi 6:15) Valũanĩ wake, Vaulo akindĩlĩĩile kana Aklĩsto mayĩsa kũtetheka nĩ tei wa Ngai ethĩwa makeetĩkĩlasya naĩ ĩmasumbĩke.—Alomi 6:12-14, 16.

Ndeto sya Vaulo iĩkĩĩthasya athaithi ma Ngai ũmũnthĩ kana o na kau masyaawa me na naĩ, me o na wĩkwatyo. Ethĩwa makaatĩĩa myolooto ya Ngai ya mwĩkalĩle na maileana na mawendi mathũku, Ngai amathĩte kũmanenga thayũ wa tene na tene.—Alomi 6:22.

Ĩloele vitio ĩĩ nguvĩ wone maelesyo makuvĩ ma ĩvuku ya Alomi.