Ĩvuku ya Kelĩ ya Asumbĩ
22 Yosia aĩ na myaka nyanya yĩla watwʼĩkie mũsumbĩ, na asumbĩkie myaka 31 e Yelusalemu. Inyia wake eetawa Yetita na aĩ mwĩĩtu wa Ataia ũla watwĩe Mbosikathi. 2 Nĩweekie kĩla kyaĩlĩte methonĩ ma Yeova na nĩwakinyĩile nzĩanĩ syonthe sya Ndaviti ũmae wake, na ndaaelelũka akathi kwʼokonĩ kwa aũme kana kwʼokonĩ kwa aka.
3 Mwakanĩ wa 18 wa Mũsumbĩ Yosia, mũsumbĩ nĩwatũmie mũandĩki Savani, ũla waĩ mwana wa Asaliau mwana wa Mesulamu, nyũmbanĩ ya Yeova, aimwĩa: 4 “Ambata vala ve Mũthembi Mũnene Ilikia, na ũimwĩa ombanyʼe mbesa syonthe ila ikũetwe nyũmbanĩ ya Yeova, ila asũvĩi ma mũomonĩ moombanĩtye kuma andũnĩ. 5 Na ũimeaĩa mainenge ala manyuvĩtwe maũngamĩe wĩa nyũmbanĩ ya Yeova, namo maĩlĩte kũinenga athũkũmi ala me nyũmbanĩ ya Yeova ala meũtũngĩĩa kũla kwanangĩku* nyũmbanĩ ĩsu, 6 namo nĩ mavundi, aki, na mavundi ma mavia; namo maĩlĩte kũtũmĩa mbesa isu kũthooa mbwaũ na mavia mase kwondũ wa kũtũngĩĩa nyũmba ĩsu. 7 Ĩndĩ mayaĩlĩte kũkũlwʼa maumye ũtalo ĩũlũ wa mbesa ila meũnengwa, nũndũ mo nĩ aĩkĩĩku.”
8 Ĩtina wa ĩvinda, Mũthembi Mũnene Ilikia nĩwaneenie na mũandĩki Savani, na amwĩa: “Nĩnoona ĩvuku ya ĩla Mĩao nyũmbanĩ ya Yeova.” Na kwoou Ilikia anenga Savani ĩvuku yĩu, nake ambĩĩa kũyĩsoma. 9 Ĩtina wa ũu, mũandĩki Savani nĩwaendie vala ve mũsumbĩ na amwĩa atĩĩ: “Athũkũmi maku nĩmatulũla mbesa ila syeethĩwa nyũmbanĩ ĩsu, na nĩmainenga ala manyuvĩtwe maũngamĩe wĩa nyũmbanĩ ya Yeova.” 10 O na ĩngĩ, mũandĩki Savani eeie mũsumbĩ atĩĩ: “Ve ĩvuku mũthembi Ilikia wanenga.” Na ĩndĩ Savani ambĩĩa kũsomea mũsumbĩ ĩvuku yĩu.
11 Yĩla mũsumbĩ weewie ndeto sya ĩvuku yĩu ya Mĩao oou, nĩwatembũie ngũa syake. 12 Na ĩndĩ mũsumbĩ eeaĩa mũthembi Ilikia, Aikamu mwana wa Savani, Akivoli mwana wa Mikaia, mũandĩki Savani, na Asaia mũthũkũmi wa mũsumbĩ amea: 13 “Endai mũkakũlye ũtao wa Yeova kwondũ wakwa, kwondũ wa andũ, na kwondũ wa Yuta yonthe ĩũlũ wa ndeto sya ĩvuku yĩĩ yĩla yooneka; nĩkwĩthĩwa ũthilĩku wa Yeova ũla ũtwakanĩe nĩ mwingĩ, nũndũ aa-ũmae maitũ mayaakwata ndeto sya ĩvuku yĩĩ kwa kũatĩĩa kyonthe kĩla kĩandĩkĩtwe kwondũ witũ.”
14 Na kwoou mũthembi Ilikia, Aikamu, Akivoli, Savani, na Asaia mathi vala ve Ulita, ũla waĩ mwathani mũndũ mũka. Ulita aĩ mũka wa Salumu mwana wa Tikiva mwana wa Aliasi, ũla waĩ mũsũvĩi wa ngũa, na ekalaa Ũtũinĩ wa Kelĩ wa Yelusalemu; na maneenea nake vau. 15 Na ĩndĩ Ulita amea: “Ũũ nĩwʼo Yeova Ngai wa Isilaeli ũkwasya, ‘Tavyai mũndũũme ũla wamũtũma kũla nĩĩ atĩĩ: 16 “Ũũ nĩwʼo Yeova ũkwasya, ‘Nĩngũetee vandũ vaa na ekali ma vo mũisyo, kwosana na ndeto syonthe ila syĩ ĩvukunĩ yĩla mũsumbĩ wa Yuta wasoma. 17 Nũndũ nĩmandiĩte na matumaa nthembo itoa kwondũ wa ngai ingĩ nĩ kana manthatye na wĩa wʼonthe wa moko moo, ũthilĩku wakwa nũkwakanĩa vandũ vaa na ndwĩvowʼa.’” 18 Ĩndĩ ũũ nĩwʼo mwaĩlĩte kũtavya mũsumbĩ wa Yuta, ũla ũmũtũmĩte mũke kũkũlya ũtao wa Yeova, “Ũũ nĩwʼo Yeova Ngai wa Isilaeli ũkwasya: ‘Ĩũlũ wa ndeto ila weewʼa, 19 nũndũ ngoo yaku nĩyeethĩwa yĩ mbĩwi* na weenyivya mbee wa Yeova yĩla weewʼa ũsilĩlo ũla nĩtwʼĩte ĩũlũ wa vandũ vaa na ekali ma vo, kana makatwʼĩka kĩndũ kya kũtelemya na andũ aumanĩe, na nĩwatembũa ngũa syaku na waĩa mbee wakwa, o nakwa nĩnakwĩthukĩĩsya, easya ũu Yeova. 20 Nĩkyo kĩtumi ngakũmbanyʼa vamwe na aa-ũmae maku,* na ũkathikwa mbũanĩ yaku na mũuo, na metho maku maikona mũisyo wʼonthe ũla ngaetee vandũ vaa.’”’” Na ĩndĩ masyoka na matavya mũsumbĩ ndeto isu.