Valũa wa Mbee wa Vetelo
4 Nĩkwĩthĩwa Klĩsto nĩwathĩniwʼe nthĩnĩ wa mwĩĩ, o nenyu ĩyũmbanyʼei kwĩthĩwa na kĩsũanĩo o ta kĩla waĩ nakyo; nũndũ mũndũ ũla ũthĩnĩtwʼe nthĩnĩ wa mwĩĩ nũekanĩte na naĩ, 2 nĩ kana ekale ĩvinda yĩla yĩtiele e nthĩnĩ wa mwĩĩ, ti kwondũ wa mawendi ma andũ, ĩndĩ kwondũ wa kwenda kwa Ngai. 3 Nũndũ ĩvinda yĩla ĩvĩtu nĩyamwĩanĩtye kwĩka kwenda kwa andũ ma mbaĩ ingĩ, yĩla mwekaa maũndũ mavuku na ngũlũ, * mwaĩ na mawendi matasiĩĩka, mwanyusaa mũno, mweethĩawa na mboka itaĩle, mweethĩawa na syathĩ sya kũnywʼa, na mweelikĩtye ũthaithinĩ mũthũku mũno wa mĩvwʼanano. 4 Nĩmasengʼaa moona mũteũsemba vamwe namo mũendelenĩ woo mũvuku, na nĩkyo kĩtumi mamũneeneaa naĩ. 5 Ĩndĩ andũ asu makaumya ũtalo kwa ũla wĩyũmbanĩtye kũsilĩla ala me thayũ na ala akwʼũ. 6 Nĩ wʼo kana kĩu nĩkyo kĩtumi ũvoo mũseo watavaniwʼe kwa ala akwʼũ namo, nĩ kana o na kũtwʼĩka nĩ asilĩle nthĩnĩ wa mwĩĩ kwosana na mawoni ma andũ, matonye kwĩkala thayũ kĩ-veva kwosana na woni wa Ngai.
7 Ĩndĩ mũthya wa maũndũ onthe nĩ mũthengeeu. Kwoou, ĩthĩwai na kĩlĩko kĩseo, na mwĩ metho mũte kũeka kũvoya. 8 Ĩndĩ mbee wa maũndũ onthe, ĩthĩwai na wendo mwingĩ katĩ wenyu, nũndũ wendo nũvwʼĩkaa naĩ mbingĩ. 9 Thokanyʼai mũte kũnyungunyĩsya. 10 Kwĩanana na ũndũ kĩla ũmwe wakwatie mũthĩnzĩo, ũtũmĩei kũtetheanĩsya ta aũngamĩi aseo ma ũseo mwingĩ wa Ngai ũla wonanawʼa kwa nzĩa syĩ kĩvathũkanyʼo. 11 Ethĩwa mũndũ o na wĩva nũkũneena, nĩ aneene ta ũkũneena ndeto syumĩte kwa Ngai; ethĩwa mũndũ o na wĩva nũkũtetheesya angĩ, nĩ eke ũu ekwatĩtye vinya ũla Ngai ũnenganae; nĩ kana maũndũnĩ onthe Ngai akumwʼe kwĩsĩla Yesũ Klĩsto. Nguma na vinya nĩ syake tene na tene. Ameni.
12 Endwa, mũikasengʼe nũndũ wa motato mailye ta mwaki ala mamũkwatĩte, ta mũkwatĩtwe nĩ maũndũ maeni. 13 Vandũ va ũu, endeeai kũtana yĩla mũendeee kũthĩnwʼa o ũndũ Klĩsto wathĩniwʼe, nĩ kana o nenyu mwĩtana na kwĩthĩwa na mũyo mwingĩ ĩvinda ya kũvuanwʼa kwa ũtheu wake mũtisu. 14 Ethĩwa nĩmũũneenewa naĩ nũndũ wa ĩsyĩtwa ya Klĩsto, mwĩ atanu, nũndũ veva ũla mũseo, ĩĩ, veva wa Ngai, wĩ ĩũlũ wenyu.
15 Ĩndĩ vaikethĩwe ũmwe wenyu ũkũthĩnwʼa nũndũ nĩ mũaani, kana kĩngʼei, kana mwĩki wa naĩ, kana mũndũ wĩlikasya maũndũnĩ ma andũ angĩ. 16 Ĩndĩ ethĩwa mũndũ o na wĩva nũkũthĩnwʼa nũndũ nĩ Mũklĩsto, ndakewʼe nthoni, ĩndĩ naendeee kũmũkumya Ngai kwa kwĩkala kwosana na ĩsyĩtwa yĩu. 17 Nĩkwĩthĩwa ĩvinda nĩ ĩviku ya ũsilĩlo kwambĩĩa na nyũmba ya Ngai. Na ethĩwa wĩambĩĩa naitũ, maũndũ makeethĩwa mailye ata kwa ala matethukĩĩasya ũvoo mũseo kuma kwa Ngai? 18 “Na ethĩwa mũndũ mũlũngalu etangĩĩwa na thĩna, maũndũ makeethĩwa mailye ata kwa mũndũ ũla ũtamũkĩaa Ngai na mwĩki wa naĩ?” 19 Kwoou, ekai ala meũthĩnwʼa nũndũ wa kwĩka kwenda kwa Ngai maendeee kwĩka maũndũ maseo na kwĩnengane kwa Mũmbi woo mũĩkĩĩku.