Mbivilia Nĩalyũlaa Andũ
MŨNDŨ mũka ũmwe ũla vau mbeenĩ ũtendeeawʼa nĩ kũmũmanya Ngai na waĩ na wĩa mũseo, eekie ata eethĩwa na kĩeleelo thayũnĩ? Mwanake ũmwe waĩ wa kanisa wa Katholeki emanyĩisye ũndũ wĩva ĩũlũ wa kĩkwʼũ ũla watumie avĩndũa mwĩkalĩle wake thayũnĩ? Nake mũndũũme ũmwe wa mũika ũla wakwʼĩte ngoo nũndũ wa maũndũ ala maendeee thayũnĩ emanyĩisye kyaũ ĩũlũ wa Ngai kĩla kyatumie atwʼĩka mũtavanyʼa wa ũvoo mũseo? Soma wone ũndũ andũ asu maĩtye.
“Kwa Myaka Mingĩ Nĩneekũlasya, ‘Kĩeleelo kya Kwĩthĩwa Thayũ Nĩ Kyaũ?’”—ROSALIND JOHN
ASYAIWE MWAKA WA: 1963
NTHĨ ĨLA WUMĨTE: BRITAIN
ĨVINDA ĨVĨTU: AĨ NA WĨA MŨSEO MŨNO
KWĨANA KWAKWA:
Nasyaĩwe Croydon, ngalĩko ya ĩtheo ya London, na nĩ wa thanthatũ katĩ wa syana kenda. Mbeenĩ asyai makwa mekalaa kĩthamanĩ kya Caribbean kĩla kĩ St. Vincent. Inyia-akwa aĩ wa kanisa wa Methodist. Ndyaĩ na wendi wa kwĩmanyĩsya ĩũlũ wa Ngai, o na kau neewʼaa nĩ na mea maingĩ ma kwĩthĩwa na ũmanyi. Yĩla twavinga sukulu, mavinda maingĩ naendaa ĩianĩ yaĩ vakuvĩ na kwitũ na ndisoma mavuku maingĩ ala neethĩawa nĩvoyete nyũmbanĩ ĩmwe ya kũia mavuku ĩla yaĩ vakuvĩ.
Ĩtina wa myaka yĩana ũna namina sukulu, nĩnamanyie kana naĩ na wendi wa kũtetheesya ala matetonya. Nĩnambĩĩie kũtetheesya ala mate na vandũ mekala, na ala methĩawa na mawonzu mana ma mwĩĩ. Kuma vau nĩnaendie yunivasĩtĩ kũsomea koosi ĩkonanĩtye na ũndũ saenzi ĩtonya kũtũmĩwa maũndũnĩ makonanĩtye na ũiiti. Namina koosi ĩsu, nĩnakwatie mawĩa manene na me nguma na nakwata mbesa weethĩa nĩĩkala ũndũ ngwenda. Ndyaandĩkĩtwe nĩ mũndũ, ĩndĩ neekaa kwĩtwa nĩnengane motao mawĩanĩ mana, o na nĩneekaa ũkunĩkĩli ĩũlũ wa maũndũ mana kĩsionĩ. Kwoou, kĩla naĩ na vata nakyo nĩ kana nĩtethye wĩa wakwa no laptop na Indaneti nzeo. Mavinda amwe nĩnaendaa nthĩ sya nza kwa syumwa siana ũna, ngekala ũtelinĩ ũla noonaa wĩ mũseo vyũ, ngatanĩa kwĩloela mawĩthyũlũlũko, o na nĩnaendaa gym kwĩka masoesi nĩ kana nĩthĩwe na mwĩĩ mũseo. Noonaa ndyĩkala ũndũ mũndũ waĩlĩte kwĩkala. Ĩndĩ o na vailye ũu, ndyaaeka kũthĩnĩka nũndũ wa ala matetonya kĩsionĩ.
ŨNDŨ MBIVILIA YAALYŨLILE MWĨKALĨLE WAKWA:
Kwa myaka mingĩ nĩneekũlasya, ‘Kĩeleelo kya kwĩthĩwa thayũ nĩ kyaũ?’ Ĩndĩ ndyaĩ naaĩsa kũmantha ũsũngĩo Mbivilianĩ. Mũthenya ũmwe, mwakanĩ wa 1999, mũinawa wĩtawa Margaret, ũla waĩ anatwʼĩka ũmwe wa Ngũsĩ sya Yeova nĩwanthokeie e na mũnyanyae, na mũnyanyae ũsu wake endeewʼa mũno ninyie. Nĩnesie kwendeewʼa nĩ kwĩmanyĩsya Mbivilia na mũnyanyae ũsu wa mũinawa, ĩndĩ neekaa maendeeo mbola nũndũ mwĩkalĩle wakwʼa na wʼĩa wakwa syakuaa ĩvinda yakwa yingĩ.
Mwaka wa 2002, ĩvinda yĩla kwĩthĩawa na ũvyũvu, nĩnathamĩĩie ngalĩko ya ĩtheo ya England. Nĩ kũu, nĩnaendie yunivasĩtĩ ĩngĩ kũsomea koosi ĩkonanĩtye na kwĩka ũkunĩkĩli ĩũlũ wa mĩkalĩle ya andũ, na naĩ na kĩeleelo kya kũkwata ndikilii yĩ ĩũlangũ. Mavinda maingĩ nĩnaendaa maũmbano Nyũmbanĩ ya Ũsumbĩ nĩ na kamwana kakwa kanini. O na kau nĩnatanĩaa kwĩthĩwa na kĩsomo kya ĩũlũ, maũndũ ala neemanyĩasya Mbivilianĩ nĩmatumie nĩelewa nesanga mathĩna ala makwataa andũ na ũndũ matonya kũthela. Nĩnamanyie ũwʼo wa ndeto ila syĩ nthĩnĩ wa Mathayo 6:24, ila syaĩtye kana vai mũndũ ũtonya kũthũkũma mavwana elĩ. No nginya ũtwʼe wĩthũkũma Ngai-ĩ, kana nĩ ũthwii. Nĩnamanyie kana no nginya nĩtwʼe nĩ maũndũ meva ngavĩtasya mbee thayũnĩ.
Mwaka ũla waĩ ũnavĩta, mavinda maingĩ nĩnaendaa kĩkundinĩ kya kwĩmanyĩsya Mbivilia kĩla kyeethĩawa nyũmba kwa mwana-a-asa vala Ngũsĩ syeemanyĩasya ĩvuku yĩtawa Je, Kuna Muumba Anayekujali?a Nĩneethĩiwe nĩ na mũĩkĩĩo mũlũmu kana Yeova, Mũmbi waitũ, e weka no we ũtonya kũtũminĩa mathĩna onthe. Ĩndĩ kũũ yunivasĩtĩ namanyĩiwʼe kana kĩeleelo kya thayũ kĩyakonanĩtye na mũĩkĩĩo wa kana kwĩ Mũmbi. Ũndũ ũsu ndwaandanĩthya. Ĩtina wa myei ĩlĩ, nĩnaekanie na koosi ĩsu ya yunivasĩtĩ, na natwʼa kũtũmĩaa ĩvinda yingĩ maũndũnĩ ma kĩ-veva.
Mũsoa ũmwe ũla wakiitie ngoo yakwa na wandetheesya kũalyũla vyũ mwĩkalĩle wakwa waĩ Nthimo 3:5, 6 ũla waĩtye atĩĩ: “Ĩkĩĩa Yeova na ngoo yaku yonthe, na ndũkekwatye ũmanyi waku mwene: Mĩendelenĩ yaku yonthe mũkũsĩĩe we, na akaũlũngalĩlya nzĩa syaku.” Kwĩmanyĩsya ĩũlũ wa Ngai witũ wĩ wendo waĩ ũndũ wa vata mũno kwĩ syĩndũ sya kĩ-mwĩĩ kana kĩsomo kya ĩũlũ. O ũndũ naendeeie kwĩmanyĩsya ĩũlũ wa Yeova, kĩeleelo kyake kwondũ wa nthĩ, na nthembo ya wovosyo ĩla Yesũ waumisye kwondũ witũ, no wʼo nendeeiwʼe nĩ kwĩyumya vyũ vala ve Mũmbi witũ. Navatisiwe Mwei wa 4, 2003. Ĩtina wa vau, o kavola kwa kavola, nĩnaolangile maũndũ.
MOATHIMO ALA NĨKWATĨTE:
Oyu, ũnyanya wakwa vamwe na Yeova ndwĩ maela. Nĩ na mũuo ũla wa wʼo na ũtanu mwingĩ nũndũ wa kũmũmanya Yeova. O na ĩngĩ nĩnĩwʼaa mũyo mũno kwĩthĩwa na ngwatanĩo vamwe na athaithi ala angĩ ma wʼo ma Ngai.
Wendi wakwa wa kũkwata ũmanyi ũendeee kwĩanĩwʼa nesa vyũ nũndũ wa maũndũ ala nĩmanyĩasya kuma Mbivilianĩ na maũmbanonĩ ma Kĩklĩsto. Nĩndanĩaa kũtavya ala angĩ ĩũlũ wa mũĩkĩĩo wakwa. Ũsu ũtwʼĩkĩte ta wʼĩa wakwa, kũmanya kana no nĩtetheesye andũ makethĩwa na thayũ mũseo oyu, na mayĩthĩwa na wĩkwatyo mũseo wa kwĩsa kũtanĩa thayũ nthĩnĩ wa nthĩ nzaũ. Kuma Mwei wa 6, 2008, nĩthĩĩtwe nĩ mũtavanyʼa wa ĩvinda yonthe, na nĩnĩwʼaa nĩ mũtanu na nĩmwĩanĩe vyũ kwĩ vau mbeenĩ. Nĩwʼaa namanyie kĩeleelo kya kwĩthĩwa thayũ, na nũndũ wa kĩtumi kĩu nĩnĩmũtũngĩaa Yeova mũvea mũno.
“Kĩkwʼũ kya Mũnyanyawa Kyanũmĩisye Mũno.”—ROMAN IRNESBERGER
ASYAIWE MWAKA WA: 1973
NTHĨ ĨLA WUMĨTE: AUSTRIA
ĨVINDA ĨVĨTU: AŨTHAA KALATA
KWĨANA KWAKWA:
Neanĩie taoninĩ nini ya Braunau, Austria. Kĩsio kĩu kyaĩ na andũ athwii, na ũngʼei ndwaĩ mwingĩ mũno. Asyai makwa mathaithaa kanisanĩ wa Katholeki na vau no vo naeeiwe.
Ve ũndũ mũna weekĩkie tene nĩ mũnini na neewʼaa ũinũmĩsya mũno. Mwakanĩ wa 1984, nĩ na myaka ta 11 ũu, nĩlilikanaa ndithaũka mũvĩla wa maaũ nĩ na ũmwe wa anyanya makwa ma vakuvĩ. Mũthenyanĩ o ũsu mawĩoonĩ, nĩwooaiwe nĩ ngalĩ. Kĩkwʼũ kya mũnyanyawa kyanũmĩisye mũno. Kwa myaka yĩana ũna amina kũkwʼa, neekũlasya yo kwĩthĩawa ata yĩla twakwʼa?
Yĩla naminie sukulu, nĩnambĩĩe kũthũkũma wĩa ũkonanĩtye na sitima. O na kau nĩnatwʼĩkie mũthaũki mũnene wa kalata na nĩnakwataa mbesa mbingĩ, ndyaĩ na mathĩna ma mbesa. O na ĩngĩ nĩnatũmĩaa ĩvinda yingĩ mathaũnĩ na neethĩwa nendete mũno mbathi sya heavy metal na punk rock. Natanĩaa mũno kũthi kũsũnga ilavu, na kũthi mbokanĩ sya kwĩtanĩthya. Navĩtasya mbee o maũndũ ma kwĩtanĩthya, naĩ na mwĩkalĩle mũthũku, ĩndĩ neewʼaa nĩ o vathei.
ŨNDŨ MBIVILIA YAALYŨLILE MWĨKALĨLE WAKWA:
Mwakanĩ wa 1995, mwana-a-asa ũmwe mũkũũ nĩwakũnangie mũomo wakwa na anenga ĩvuku yaeleetye ũsũngĩo wa Mbivilia ĩũlũ wa ĩkũlyo yĩĩ, Vethĩawa ata yĩla twakwʼa? Kĩkwʼũ kya mũnyanyawa neewʼaa kĩinyamaasya mũno, na kwondũ wa ũu nĩnoosie ĩvuku yĩu. Ndyaasoma o kĩlungu kĩu kyaeleetye ĩũlũ wa kĩkwʼũ ĩndĩ nasomie ĩvuku yonthe!
Kĩla nasomie nĩkyasũngĩie makũlyo makwa ĩũlũ wa kĩkwʼũ. Ĩndĩ nĩneemanyĩisye maũndũ maingangĩ. Nũndũ naeeiwe kanisanĩ wa Katholeki, mũĩkĩĩo wakwa wakonanĩtye na Yesũ e weka. Ĩndĩ o na vailye ũu, kwĩmanyĩsya Mbivilia nĩkwandetheeisye kwĩthĩwa na ũnyanya wa vakuvĩ vamwe na Ĩthe wa Yesũ, ũla nĩ Yeova Ngai. Natanie mũno vyũ kũmanya kana Yeova nũtũthĩnĩkĩaa na atũthuthasya twĩkĩe kĩthito tũmũmanye. (Mathayo 7:7-11) Nĩnamanyie kana Yeova nĩwendeeawʼa nithyĩ. O na ĩngĩ nĩnamanyie kana mavinda onthe Yeova nĩwĩanĩasya ndeto syake. Ũu nĩwatumie nendeewʼa mũno nĩ mawathani ma Mbivilia na kwĩka ũkunĩkĩli mũnango ũndũ methĩĩtwe mayĩanĩa. Kĩla neemanyĩisye nĩkyalũlũmĩĩilye mũĩkĩĩo wakwa vyũ vala ve Ngai.
O kwa mĩtũkĩ nĩnamanyie kana Ngũsĩ sya Yeova no mo methĩawa meyumĩtye vyũ kũtetheesya andũ ala angĩ memanyĩsye Mbivilia. Nĩnaandĩkie maandĩko ala maĩ mavukunĩ ma Ngũsĩ na namasianĩsya na Mbivilia yakwa ya Katholeki. O ũndũ naendeeie kwĩka ũkunĩkĩli, no wʼo namanyie kana nĩnakwatie ũwʼo.
Kwĩmanyĩsya Mbivilia kwandetheeisye kũmanya kana Yeova endaa nĩkale kwosana na myolooto yake. Ĩtina wa kũsoma Aeveso 4:22-24, nĩnamanyie kana yaĩ no nginya nĩekane vyũ na ‘mwĩkalĩle wakwa wa tene,’ ũla wakonanĩtye na ‘meko makwa ma tene,’ na nĩnaaĩle “kwĩvwʼĩka mwĩkalĩle mweũ ũla woombiwe kwosana na kwenda kwa Ngai.” Kwoou nĩnaekanie vyũ na mwĩkalĩle wakwa mũthũku. O na ĩngĩ nĩnoonie ve vata wa kũeka kũthaũka kalata, nũndũ kĩmanyĩo kĩu kĩtumaa mũndũ ethĩwa endete syĩndũ sya kĩ-mwĩĩ na ayĩthĩwa na ĩtomo. (1 Akolintho 6:9, 10) Nĩnamanyie kana nenda kwĩka moalyũku asu, no nginya nĩtile kĩtindo kyakwa na atindanyʼa asu ma tene na kũmantha atindanyʼa ala mekalaa kwosana na myolooto ĩla naatĩĩa.
Kwĩka moalyũku asu kũyaĩ laisi. Ĩndĩ nĩnambĩĩie kũmbanaa vamwe na Ngũsĩ Nyũmbanĩ ya Ũsumbĩ na nambĩĩa kũkwata anyanya eũ kĩkundinĩ kĩla naendaa. O na ĩngĩ nĩnambĩĩie kwĩmanyĩsya Mbivilia na kĩthito nĩ weka. Matambya asu nĩmandetheeisye kũekana na mbathi ila nendete, navĩndũa mĩvango ĩla naĩ nayo thayũnĩ, na nambĩĩa kwĩkĩa ngũa nesa na kwĩyĩkalya nĩ mũndũ mũtheu. Mwakanĩ wa 1995, nĩnavatisiwe natwʼĩka ũmwe wa Ngũsĩ sya Yeova.
MOATHIMO ALA NĨKWATĨTE:
Yu nĩnĩthĩawa na woni mũseo ĩũlũ wa mbesa na syĩndũ sya kĩ-mwĩĩ. Naĩ na mũtuo wa kũthata na mĩtũkĩ, ĩndĩ yu ndithataa na mĩtũkĩ o na vanini. O na ĩngĩ nĩnaekie kwĩmakĩa mũno ĩũlũ wa ĩvinda yũkĩte.
Nĩndanĩaa mũno kwĩthĩwa nĩ ũmwe wa andũ ma nthĩ yonthe ala mamũthũkũmaa Yeova. Nĩnonaa amwe moo ũndũ matataa kũngʼangʼana na mathĩna ĩndĩ o na vailye ũu nĩmaendeeaa kũmũthũkũma Ngai me aĩkĩĩku. Yu nĩwʼaa nĩ mũtanu nũndũ nĩtũmĩaa ĩvinda yakwa yonthe na vinya wakwa, ti kwondũ wa kwĩanĩsya mawendi makwa, ĩndĩ kũmũthũkũma Yeova na kwĩka andũ ala angĩ nesa.
“Yu Nĩnĩthĩawa na Ũtanu.”—IAN KING
ASYAIWE MWAKA WA: 1963
NTHĨ ĨLA WUMĨTE: ENGLAND
ĨVINDA ĨVĨTU: AKWʼĨTE NGOO VYŨ NĨ MAŨNDŨ ALA MAENDEEE THAYŨNĨ WAKE
KWĨANA KWAKWA:
Nasyaĩwe England, ĩndĩ nĩ na myaka mũonza, mũsyĩ witũ wathamĩĩa Australia. Twekalile vandũ vetawa Gold Coast, vala vatembeawa nĩ atalii kĩsionĩ kya Queensland, Australia. O na kau tũyaĩ athwii, tũyakosaa syĩndũ ila twaĩ na vata nasyo.
O na kau ndyaaewa na thĩna, ndyeethĩawa nĩ mũtanu. Nĩnakwie ngoo mũno nũndũ wa maũndũ ala maendeee thayũnĩ wakwa. Ĩthe wakwa anyusaa ũkĩ mũno. Ndyamwendete mũno nũndũ wa kũnywʼa kũu kwake, na nũndũ nĩwathĩnasya inyia-akwa. Ĩtina wa ĩvinda, nĩnamanyie maũndũ ala mamũkwatĩte e mũsikalĩ kĩsionĩ kĩtawa Malaya, na nũndũ wa ũu nambĩĩa kũelewa nĩkĩ wekaa maũndũ asu.
Nĩ sukulu ya sekondalĩ, o nakwa nĩnambĩĩie kũnywʼa ũkĩ mũno. Nĩ na myaka 16, nĩnatiie sukulu na nalika itanĩ sya asikalĩ ma kĩwʼũnĩ. Nĩnambĩĩie kũtatĩthya ndawa sya kũmila syĩ kĩvathũkanyʼo na nakwatwa vyũ nĩ kũnywʼa mbakĩ. O na ĩngĩ nĩnakwatiwe nĩ ũkĩ mũno weethĩa ndyĩka ũndũ ndaũnywʼĩte. O na kau mũno mũno nanyusaa wikendi, nĩnambĩĩie kwĩkaa ũu kĩla mũthenya.
Nĩangĩe kũvikya myaka 20, na nĩ na myaka mĩongo ĩlĩ na kĩndũ, nĩnambĩĩie kwĩkũlya kana kwĩ Ngai. Neekũlasya, ‘ethĩwa we Ngai e kwʼo, nĩkĩ ũekete andũ maendeee kũthĩna na kũkwʼa?’ O na ĩngĩ nĩnaandĩkie voemu nĩmũtũlĩte Ngai mũtĩ kwondũ wa mothũku onthe ala maendeee ĩũlũ wa nthĩ.
Natiie wĩa wa ita sya asikalĩ ma kĩwʼũnĩ nĩ na myaka 23. Kuma vau, nĩnambĩĩie kũthũkũma mawĩa me kĩvathũkanyʼo o na nĩnaendie nthĩ sya nza kwa mwaka mũima, ĩndĩ maũndũ asu onthe mayaandetee ũtanu. Ndyaĩ na wendi wa kwĩvangĩĩa maũndũ kana kwĩanĩsya ũndũ o na ũmwe. Kwa wʼo vai kĩndũ kyambendeeasya. Wĩkwatyo wa kwĩthĩwa na nyũmba yakwa, wĩa mũseo, na kwambatangwʼa kĩlasi wĩanĩ, syonthe noonaa syĩ sya mana. Kĩla neewʼaa kĩingiakisya no kũnywʼa ũkĩ na kwĩthukĩĩsya mbathi.
Nĩlilikene nesa vyũ ĩvinda yĩla neewie nĩ na wendi wa kũmantha kĩeleelo kya thayũ. Naĩ Poland, vala nathokeete kambi ĩmwe ya kũthĩnĩsya andũ yeesĩkĩe mũno kũu Auschwitz. Nĩnasomete ĩũlũ wa ũaani ũla waendeete kambinĩ ĩsu. Ĩndĩ yĩla naũngamie vau na noona ũndũ kambi ĩsu yanenevete mũno wĩana, neewie naũmĩa ngoonĩ mũno. Ndyaĩ nĩtonya kũelewa ũndũ andũ matonya kũthĩnyʼa andũ ala angĩ mũno wĩana ũu. Nĩlilikana nditembeanga vau kambinĩ nĩendeee kũkelemya methoi na neekũlya, ‘Ũndũ ta ũũ ũtonyeka ata?’
ŨNDŨ MBIVILIA YAALYŨLILE MWĨKALĨLE WAKWA:
Ĩtina wa kuma nthĩ ingĩ mwakanĩ wa 1993, nĩnambĩĩie kũsoma Mbivilia na kũmantha mosũngĩo. O mĩtũkĩ ĩtina wa vau, Ngũsĩ ilĩ sya Yeova nĩsyakũnangie mũomo wakwa na syanthokya ũmbanonĩ mũnene ũla waĩ wĩkĩwe kĩwanzanĩ kyaĩ o vau vakuvĩ. Nĩnatwie kũthi.
Myei mĩvũthu ĩla yaĩ ĩnavĩta naĩ kĩwanzanĩ o kĩu ndyĩloela mathaũ, ĩndĩ ũmbano ũũ waĩ na kĩvathũkanyʼo kĩnene mũno. Ngũsĩ ila syaĩ vau nĩsyauĩtye na syeekĩte ngũa nesa, nasyo syana syoo syaĩ na mwĩkalĩle mũseo. Na nĩnasengʼiwʼe mũno nĩ kĩla noonie masaanĩ ma lĩu wa mũthenya. Ngũsĩ maana maingĩ syaĩe lĩu kĩwanzanĩ kĩu kya kũthaũkĩa, ĩndĩ yĩla syasyokie ivĩlanĩ syoo, ndyaaona kalungu o na kamwe ka kĩko kaatiwa vau kĩwanzanĩ! O na eka ũu, andũ aa moonekaa me eanĩe na me na mũuo, ala nĩ maũndũ natwĩe nĩmanthaa. Ndililikene ũvoo o na ũmwe waumiwʼe mũthenya ũsu, ĩndĩ mwĩkalĩle wa Ngũsĩ nĩwatumie nĩthĩwa na ũtanu ũtathela.
Wĩoo ũsu, nĩnasũanĩie ĩũlũ wa mwanake ũmwe nyinyia wake wasyaanĩwʼe na ĩthe wakwa, ũla wasomete Mbivilia na akemanyĩsya ndĩni syĩ kĩvathũkanyʼo. Myaka mĩvĩtu aĩ andavisye kana Yesũ aisye tũkeethĩwa tũtonya kũmanya ndĩni ya wʼo kwĩsĩla mosyao mayo. (Mathayo 7:15-20) Nĩnasũanĩie kana nĩnaĩlĩte kũsisya nesa kĩla kĩtumaa Ngũsĩ syĩthĩwa syĩ kĩvathũkanyʼo. Kwa ĩvinda ya mbee vyũ thayũnĩ wakwa, nĩneethĩiwe nde na nzika na nĩ na wĩkwatyo.
Kyumwa kĩla kyaatĩĩe, ila Ngũsĩ ilĩ syanthoketye ũla ũmbanonĩ mũnene nĩsyasyokie ĩngĩ. Nĩsyangũlilye nĩmanyĩsye Mbivilia, na neetĩkĩla. O na ĩngĩ nĩnambĩĩie kũendaa maũmbanonĩ ma Kĩklĩsto nĩ nasyo.
O ũndũ naendeeie kwĩmanyĩsya Mbivilia, woni wakwa ĩũlũ wa Ngai nĩwaalyũkile vyũ. Nĩneemanyĩisye kana ti we ũtumaa ũthũku na mathĩna syĩthĩwa na kana nĩũũmĩaa mũno yĩla andũ meeka maũndũ mathũku. (Mwambĩlĩlyo 6:6; Savuli 78:40, 41) Nĩnatwie vyũ kũtata ũndũ ndonya ndikamwĩwʼĩthye Yeova woo ĩvinda o na yĩva. Nendaa kũtanĩthya ngoo yake. (Nthimo 27:11) Nĩnaekie kũnywʼa ũkĩ mũno na kũtũmĩa mbakĩ, na naekana na mwĩkalĩle mũthũku. Mwei wa 3, 1994, nĩnavatisiwe na natwʼĩka ũmwe wa Ngũsĩ sya Yeova.
MOATHIMO ALA NĨKWATĨTE:
Yu nĩwʼaa nĩ mũtanu na nĩ mwĩanĩe kuma ngoonĩ. Ndyĩthĩawa na vata wa kũnywʼa ũkĩ nĩ kana nĩmine mathĩna makwa. Vandũ va ũu, nĩnĩmanyĩĩtye kũmwaũĩa Yeova mũio wakwa.—Savuli 55:22.
Kwa ĩvinda ya myaka ĩkũmi mĩvĩtu, twĩthĩĩtwe tũtwaanĩte na mwĩĩtu-a-asa mwanake wĩtawa Karen, na nĩ na kelĩtu kaseo mũno ketawa Nella kala namũtwaie e nako. Twĩ atatũ nĩtũtanĩaa kũtũmĩa ĩvinda yitũ yingĩ ũthũkũminĩ wa Kĩklĩsto tũitetheesya ala angĩ memanyĩsye ũwʼo ĩũlũ wa Ngai. Yu nĩnĩthĩawa na ũtanu.
a Yumĩthĩtwʼe nĩ Ngũsĩ sya Yeova.