Mũikemakĩe

MWOOLOTO WA MBIVILIA: “Mũikemakĩe ũndũ wa mathayũ menyu.”—Mathayo 6:25.

Ĩandĩko yĩu yĩtũmanyĩsya kyaũ? Yesũ aneenie ndeto isu e ũla Ũtavanyʼanĩ wa Kĩĩmanĩ. Kwosana na ĩvuku yĩmwe yĩeleasya ndeto sya Mbivilia, ndeto ya Kĩkiliki ĩla ĩalyũlĩtwe “kwĩmakĩa” yonanasya “thĩna wa ngoo ũla ũkwataa mũndũ eethĩwa e ngya, e na nzaa na akwatwa nĩ mathĩna angĩ ma kĩla mũthenya.” Kwĩmakĩa mavinda maingĩ kũetawe nĩ mũndũ kũthĩnĩkĩa mũno maũndũ matonya kwĩsa kwĩkĩka ĩvinda yũkĩte. Ti ũthũku mũndũ kũthĩnĩkĩa ũndũ ũkwĩanĩsya mavata make ma kĩ-mwĩĩ na ma andũ make. (Avilivi 2:20) Ĩndĩ ĩla Yesũ waisye “mũikemakĩe,” anengae amanyĩwʼa make ũtao wa kana mayaĩlĩte kwĩmakĩa kũvĩtũka kĩasi, nũndũ ĩla mũndũ weemakĩa ĩũlũ wa ĩvinda yũkĩte ethĩawa ate na ũtanu.—Mathayo 6:31, 34.

Ũtao ũsu no ũtũmĩke ũmũnthĩ? Nĩ ũndũ mũseo kũatĩĩa ũtao ũsu wa Yesũ. Nĩkĩ? Mavuku amwe ma kwĩka ũkunĩkĩli monanasya kana ĩla mũndũ weemakĩa mũno, ve kĩlungu kĩna kya mwĩĩ (sympathetic nervous system) kyambĩĩaa kũthũkũma kĩte kũthũmũa na ũu “nũtumaa andũ makwatwa nĩ mowau ta itau sya nda, ũwau wa ngoo, na asthma.”

Yesũ nĩwoonanisye kana vai vata wa kwĩmakĩa nũndũ kwĩmakĩa kũyĩsa kũtethya mũndũ. Akũlilye atĩĩ: “Nũũ kwenyu ũla ũtonya kwondũ wa kwĩmakĩa kwake kwĩyongeleela ũasa wake mũkono ũmwe?” (Mathayo 6:27) Kwĩmakĩa kũyĩsa kwongela kĩndũ o na kĩmwe thayũnĩ witũ. O na mavinda maingĩ maũndũ mekĩkaa kĩvathũkanyʼo na ũndũ tũũsũanĩaa. Mũsomi ũmwe aielesya ũndũ ũsu aisye atĩĩ: “Kwĩmakĩa ĩũlũ wa ĩvinda yũkĩte nĩ kwananga saa na mavinda maingĩ maũndũ methĩawa mate mathũku ũndũ tũnasũanĩaa.”

Tũtonya kwĩka ata nĩ kana tũeke kwĩmakĩa? Ũndũ wa mbee nĩ kũmwĩkwatya Ngai. Ethĩwa Ngai nũmanthĩaa nyũnyi lĩu na akavwʼĩka malaa, no aemwe nĩ kwĩanĩsya mavata ma andũ ala monaa kũmũthaitha kwĩ kwa vata thayũnĩ woo? (Mathayo 6:25, 26, 28-30) Ũndũ wa kelĩ, ndũkathĩnĩke nũndũ wa ũnĩ. Yesũ aisye atĩĩ: “Mũikemakĩe ĩndĩ ũndũ wa ũnĩ; nũndũ ũnĩ ũkeemakĩa e wʼo.” We tyo wĩtĩkĩle kana kĩla “mũthenya nĩwĩanĩwe nĩ ũthũku wawʼo”?—Mathayo 6:34.

Twaatĩĩa ũtao ũsu wa Yesũ, tũkeesianĩa na mathĩna ala matonya kũtũũmĩsya. O na ĩngĩ tũkeethĩwa na mũuo wa ngoo ũla Mbivilia ĩwĩtĩte “mũuo wa Ngai.”—Avilivi 4:6, 7.