No Ũlilikane?

Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Yesũ aneeneaa naĩ syĩva ĩla wanenganie ũla ũtao wĩ nthĩnĩ wa Mathayo 18:15-17?

Aneeneaa naĩ yaĩ ĩtonya kũneenewa nĩ andũ maemanĩtwe na mayĩwʼana. Ĩndĩ yaĩ ngito ũkethĩa ũla ũmĩkĩte no atengwe malea kũeleanwa. Naĩ ĩsu nĩ ta ũvenani kana o ũneeni ũtonya kwanangĩa mũndũ ĩsyĩtwa.—w16.05, ĩth. 7.

Ũtonya kwĩka ata ũtetheke vyũ ĩla ũũsoma Mbivilia?

No wĩke maũndũ aa: Soma wĩ na kĩeleelo kya kwĩmanyĩsya kĩndũ, na ũisisya nĩ kyaũ ũtonya kwosa vo kĩkaũtethya; ĩkũlye makũlyo ta, ‘Ndonya kũtetheesya angĩ ata ngĩtũmĩa ũvoo ũũ?’; na tũmĩa syĩndũ sya kwĩka ũkunĩkĩli ila ũtonya kũkwata nĩ kana wĩke ũkunĩkĩli wa ũvoo ũla wasoma.—w16.05, ĩth. 24-26.

Nũthũku Mũklĩsto kwĩthĩwa na kyeva o na kau nĩwĩsĩ kwĩ ũthayũũkyo?

Kũĩkĩĩa kana kwĩ ũthayũũkyo kũivetea Mũklĩsto ũkwʼĩĩwe woo wʼonthe. Avalaamu nĩwamũmeteie Sala. (Mwa. 23:2) Ĩtina wa ĩvinda kyeva nĩkĩolekaa.—wp16.3, ĩth. 4.

Nũũ ũla mũndũ wĩ na ũvya wa ingi wa mũandĩki ũwetetwe ĩandĩkonĩ ya Esekieli kĩlungu kya 9, na naaũ ala aũme thanthatũ me na mĩio yoo ya kaũ ya kũaa ĩandĩkonĩ o yĩu?

Aũme asu meonanyʼa ita sya ĩtunĩ ila syatũmĩiwe kwananga Yelusaleme, na nosyo ikatũmĩwa kwananga nthĩ ĩno nthũku ya Satani ĩvindanĩ ya Ali–Maketoni. Wĩanĩsyo wa ũmũnthĩ wa woni ũsu nĩ kana ũla mũndũ wĩ na ũvya wa ingi wa mũandĩki nĩ Yesũ Klĩsto, na nĩwe ũvanaa ala makatangĩĩwa.—w16.06, ĩth. 16-17.

Mbivilia yavonokie mĩisyo yĩva?

Yavonokie (1) mũisyo wa kwoa nũndũ syĩndũ ila syatũmĩkie kũmĩandĩka ta makangaa na kĩthuma nĩsyoaa; (2) ũvinganĩsya nũndũ atongoi aingĩ ma siasa na ma ndĩni maĩ na mũvango wa kũmĩmina vyũ; na (3) kĩthito kya amwe kya kũvĩndũa ũvoo ũla wĩ nthĩnĩ.—wp16.4, ĩth. 4-7.

Mũklĩsto atonya kũolanga maũndũ make ata?

Manya mavata maku na ũiekana na ngalama ite sya lasima. Vangĩĩa maũndũ meanĩĩe mbesa syaku. Vetanga syĩndũ ila ũtatũmĩaa na ũiĩva makoani maku onthe. Ola ĩvinda yĩla ũtũmĩaa wĩanĩ na ũivanga ũndũ ũtonya kwongela ĩvinda yĩla ũtũmĩaa ũtavanyʼanĩ.—w16.07, ĩth. 10.

Nĩ kyaũ Mbivilia yaĩtye nĩ kĩseango o na kwĩ thaavu kana vetha?

Ĩandĩko ya Yovu 28:12, 15 yonanĩtye kana ũĩ wa Ngai nĩ mũseango kwĩ thaavu kana vetha. O ũendeee kũmantha ũĩ ũsu, tata wĩthĩwe na wĩnyivyo na mũĩkĩĩo mũlũmu.—w16.08, ĩth. 18-19.

Ve ũthũku ũmũnthĩ mwana-a-asa akaĩthya kĩngʼee?

Kũndũ kũmwe no kwĩthĩwa vate ũthũku kwa aũme kwĩthĩwa na kĩngʼee kĩtilĩtwe o nesa, na no kwĩthĩwa kĩu kĩtasiĩĩa andũ kwĩthukĩĩsya ũvoo wa Ũsumbĩ. Ĩndĩ vailyĩ oou, ana-a-asa amwe nĩmanyuvaa kwĩkala mate na kĩngʼee. (1 Ako. 8:9) Nakwʼo kũndũ kũngĩ wonekaa ũte ũndũ waĩle kwa Ngũsĩ sya Yeova kũĩthya ingʼee.—w16.09, ĩth. 21.

Ngewa ĩla yĩ Mbivilianĩ ya Ndaviti na Ngoliathu nĩ ya wʼo?

Ũmũnthĩ mũndũ ũla mũasa vyũ waaoneka atiĩtwe nĩ Ngoliathu na ũasa wa inzi 6 (sendimita 15). Ndaviti aĩ mũndũ waĩ thayũ nũndũ ve maandĩko ma tene moonekie mawetete nyũmba ya Ndaviti. Kĩndũ kĩngĩ kĩĩkĩĩthasya ũu nĩ ndeto ila syaneeniwe nĩ Yesũ. Maũndũ ala maeleetwʼe ngewanĩ ya Ndaviti na Ngoliathu meekĩkie vandũ vesĩkĩe nĩ andũ.—wp16.5, ĩth. 13.

Kĩvathũkanyʼo kya mũndũ wĩ ũmanyi, na mũndũ ũeleawa maũndũ, na ũngĩ wĩ ũĩ nĩ kyaũ?

Mũndũ wĩ ũmanyi ekaa kwĩthĩwa esĩ maũndũ maingĩ. Nake mũndũ ũeleawa maũndũ nĩwonaa nata ũndũ ũmwe ũkonanĩtye na ũla ũngĩ. Ĩndĩ mũndũ ũla mũĩ nĩwĩthĩawa atonya kũtũmĩa ũmanyi ũla wĩ nawʼo vamwe na maũndũ ala ũeleetwe kwa nzĩa ĩtonya kũmũtethya.—w16.10, ĩth. 18.