Yesũ Nĩwamanyĩisye Nikotemo Ũtukũ

Ĩvinda yĩla Yesũ waĩ Yelusaleme kwondũ wa Vasaka ya mwaka wa 30, nĩweekie syama nene. Syama isu weekie nĩsyatumie andũ aingĩ mamũĩkĩĩa. Mũndũ ũmwe wamũĩkĩĩie Yesũ nĩ Nikotemo, ũla waĩ Mũvalisi na ũmwe wa Nzama ya Ayuti. Nikotemo nĩwendeeiwʼe nĩ maũndũ ala Yesũ weekie. Nũndũ nĩwendaa kwĩmanyĩsya maũndũ maingĩ, Nikotemo nĩwaendie vala ve Yesũ ũtukũ. Nĩvatonyeka akethĩwa eekie ũu nũndũ nĩwakĩaa ayoneka nĩ atongoi ala angĩ ma Kĩyuti na ũu ũituma ngwatanĩo yake vamwe namo yanangĩka.

Nikotemo amwĩie Yesũ atĩĩ: “Lavai, nĩtwĩsĩ wumĩte kwa Ngai ta mũmanyĩsya, nũndũ vaiĩ mũndũ ũtonya kwĩka syama ila ũkwĩka Ngai ate vamwe nake.” Yesũ amũsũngĩie amwĩa kana nĩ kenda mũndũ alike Ũsumbĩnĩ wa Ngai, no nginya ‘asyawe ĩngĩ.’—Yoana 3:2, 3.

No nginya Nikotemo ethĩwe asengʼie ũndũ mũndũ ũtonya kũsyawa ĩngĩ. Na nũndũ wa ũu amũkũlya Yesũ atĩĩ: “We [mũndũ] no alike ĩvunĩ ya inyia wake na aisyawa ĩngĩ?”—Yoana 3:4.

Ndeto ‘kũsyawa ĩngĩ’ iyonanasya kana mũndũ nĩwaĩle kũlika ĩvunĩ ya inyia wake ĩngĩ. Yesũ nĩwaeleisye kĩla ndeto isu syonanasya. Aisye-ĩ, “Mũndũ o na wĩva atasyaĩtwe kwĩsĩla kĩwʼũ na veva, ndatonya kũlika Ũsumbĩnĩ wa Ngai.” (Yoana 3:5) Yĩla Yesũ wavatisiwe na veva mũtheu watheea ĩũlũ wake, eethĩiwe asyawa ĩngĩ “kwĩsĩla kĩwʼũ na veva.” Ĩvindanĩ yĩu, wasya nĩwaumie ĩtunĩ ũkyasya: “Ũũ nĩwe Mwana wakwa mwendwa, ũla nendeeawʼa nĩwe.” (Mathayo 3:16, 17) Ngai nĩwatũmĩie nzĩa ĩsu kũtangaasa kana nũndũ Yesũ nĩwetĩkĩwʼa mauta kwĩsĩla veva mũtheu, aĩ na wĩkwatyo wa kwĩsa kũlika Ũsumbĩnĩ wa ĩtu. Ĩtina, twĩ Vendekosito ya mwaka wa 33, veva mũtheu nĩwetĩkĩiwʼe Aklĩsto angĩ avatise, na kwoou masyawa ĩngĩ ta ana ma Ngai me na wĩkwatyo wa kwĩsa kũlika Ũsumbĩnĩ wa ĩtu.—Meko ma Atũmwa 2:1-4.

Nikotemo ndaeleawa kĩla Yesũ wamũmanyĩasya ĩũlũ wa Ũsumbĩ. Nũndũ wa ũu, Yesũ nĩwaendeeie kũmũelesya maũndũ maingangĩ makonetye kĩanda kĩla waĩ nakyo kya mwanya e Mwana wa Ngai. Yesũ aisye atĩĩ: “O tondũ Mose wookĩlilye ĩla nzoka weũnĩ, o ta ũu no nginya Mwana wa mũndũ okĩlwʼe, nĩ kana kĩla mũndũ ũmũĩkĩĩaa atonye kũkwata thayũ wa tene na tene.”—Yoana 3:14, 15.

Ĩvinda ya tene, Aisilaeli ala maũmiwe nĩ nzoka syĩ sumu mũthũku maaĩle kũsisya nzoka ya ũthuku nĩ kana matangĩĩwe. (Motalo 21:9) O ta Aisilaeli asu, andũ onthe nĩmaĩle kũmũĩkĩĩa Mwana wa Ngai nĩ kana matangĩĩwe kuma ũkombonĩ wa naĩ na kĩkwʼũ, na maikwata thayũ ũtathela. Nĩ kana Yesũ akindĩlĩĩle ũndũ wa vata ũla Yeova weekie nĩ kana andũ metangĩĩwa, eeie Nikotemo atĩĩ: “Ngai nĩwendete nthĩ mũno, nĩwanenganie Mwana wake e ũmwe, nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.” (Yoana 3:16) Kwoou, myei ta thanthatũ kuma Yesũ ambĩĩa ũtavanyʼa wake, nĩwamũtetheeisye Nikotemo aelewa nesa kana Ngai akamũtũmĩa Yesũ kũtangĩĩa andũ.

Yesũ amwĩie Nikotemo atĩĩ: “Ngai ndaatũma Mwana wake ĩũlũ wa nthĩ nĩ kana asilĩle nthĩ.” Ndeto isu syĩonanyʼa kana Yesũ ndaatũmwa kũũ nthĩ asilĩle kĩla mũndũ kwĩthĩwa aĩle kwanangwa. Ĩndĩ o tondũ Yesũ waisye, atũmĩtwe “nĩ kana nthĩ ĩtangĩĩwe kwĩsĩla kwake.”—Yoana 3:17.

Nũndũ wa wia, Nikotemo aendie kũmwona Yesũ ũtukũ. Kwoou nĩ ũndũ wa kwendeesya kũmanya kana Yesũ aminie kũneena na Nikotemo kwa kũmũelesya kĩvathũkanyʼo kya andũ athũku na aseo atũmĩĩte ngelekanyʼo ya kyeni na kĩvindu. Amwĩie atĩĩ: “Andũ makasilĩlwa nĩkwĩthĩwa kyeni nĩkyookie ĩũlũ wa nthĩ, ĩndĩ andũ menda kĩvindu vandũ va kyeni, nũndũ mawĩa moo maĩ mathũku. Nũndũ mũndũ o na wĩva ũla wĩkaa maũndũ mathũku nũmenaa kyeni na ndokaa kyeninĩ, nĩ kana mawĩa make maikese kũvuanwʼa. Ĩndĩ mũndũ o na wĩva ũla wĩkaa kĩla kya wʼo nĩwũkaa kyeninĩ, nĩ kana mawĩa make methĩwe matonya kwoneka kana nĩmekĩtwe kwosana na kwenda kwa Ngai.”—Yoana 3:19-21.

Ĩvindanĩ yĩu, Nikotemo, ũla waĩ Mũvalisi na mũmanyĩsya wa Isilaeli, nĩwaaĩle kũsũanĩa maũndũ ala weemanyĩisye, namo makonetye kĩanda kya Yesũ nthĩnĩ wa kwĩanĩwʼa kwa kĩeleelo kya Ngai.