Ũtonya Kũtũnga Mũvea Ata Nũndũ wa Mũthĩnzĩo Mũnene wa Ngai?

ĨLA twakwata mũthĩnzĩo mũseo vyũ, nĩtwĩwʼaa twaĩle kũtũnga mũvea. Yesũ nĩwoonanisye vata wa ũndũ ũsu ĩtina wa kũvosya ala aũme ĩkũmi maĩ na ũwau wa mangũ ũla ũtaĩ na ndawa ĩvindanĩ yĩu. No ũmwe katĩ wa aũme asu ĩkũmi wasyokie, “aimũkatha Ngai na wasya mũnene.” Nĩvo ĩndĩ Yesũ wakũlilye atĩĩ: “Ala mathewʼa ti ĩkũmi? ala kenda maĩva?” (Luka 17:12-17) Twĩĩmanyĩsya kyaũ? Nĩ laisi kũlwa nĩ maũndũ maseo ala andũ matwĩkĩte!

Vai mũthĩnzĩo ũtonya kũelekanwʼa na wovosyo. Nĩwʼo mũthĩnzĩo ũla mũnene vyũ wanenganiwe. Kwoou, tũtonya kwonanyʼa ata kana nĩtũmũtũngĩaa Ngai mũvea nũndũ wa maũndũ ala ũtwĩkĩte?

• Mũmanye Mũnengani wa mũthĩnzĩo ũsu. Nthembo ya wovosyo ndĩeteae andũ onthe thayũ ũtathela oou vate ũndũ meanĩĩtye. Na nĩkyo kĩtumi Yesũ waisye ũũ mboyanĩ yake: ‘Na thayũ ũtathela nĩwʼo ũũ, nĩ kana makũmanye we Ngai ũla wa wʼo weka, na ũla wamũtũmie, nake nĩ Yesũ Klĩsto.’ (Yoana 17:3) Wĩwʼa ata ũkamanya kana ve mũndũũme woovoisye thayũ waku ĩla waĩ mũnini? We tyo wendeewʼe nĩ kũmũmanya mũnango na kũmanya nĩkĩ wakwovoisye? Yeova Ngai, ũla watũnengie mũthĩnzĩo wa nthembo ya wovosyo, endaa tũmũmanye na tũyĩthĩwa na ngwatanĩo ya vakuvĩ nake. Mbivilia ĩtwĩkĩĩte vinya na ndeto ii: “Mũthengeei Ngai, nake akamũthengeea inywʼĩ.”—Yakovo 4:8.

• 

  Ĩthĩwa na mũĩkĩĩo nthĩnĩ wa nthembo ya wovosyo. Mbivilia yaĩtye ũũ: “Ũla wĩtĩkĩlaa [kana, ũmũĩkĩĩaa] ũ Mwana e na thayũ ũtathela.” (Yoana 3:36) Tũtonya kwonanyʼa ata kana twĩ na mũĩkĩĩo? Meko maitũ nĩmo monanasya kana twĩ na mũĩkĩĩo nthĩnĩ wa nthembo ya wovosyo. (Yakovo 2:17) Nĩ meko mailyĩ ata? Mũthĩnzĩo ũtwʼĩkaa waku ĩla wawosa na kũwĩtĩkĩla. Kwoou no nginya wĩtĩkĩle na ũyĩthĩwa na mũĩkĩĩo nthĩnĩ wa nthembo ya wovosyo. Ũtonya kwĩka ũu ata? Ĩmanyĩsye ũndũ Ngai wendaa wĩkale, na ĩndĩ ũyĩka kwosana na kĩla ũkwĩmanyĩsya.a Mũvoye Ngai akũekee na aikũnenga wasya mũtheu wa ngoo. Ĩla ũũneena na Ngai, ndũkethĩwe na nzika kana nthembo ya wovosyo ĩkatuma ala methĩawa na mũĩkĩĩo nthĩnĩ wayo methĩwa na mũuo wa tene na tene ĩvindanĩ yũkĩte, mekala mate na mũisyo, na maendeea nesa tene na tene!—Aevelania 11:1.

• 

  Endaa ũmbanonĩ wa kũlilikana kĩkwʼũ kya Yesũ. Yesũ nĩwambĩĩie mũvango wa kũlilikanaa kĩkwʼũ kyake o ĩmwe kwa mwaka. Aineenea ũndũ ũsu awetie ndeto ii: “Ĩkaai ũu ũndũ wa kũndilikana.” (Luka 22:19) Ngũsĩ sya Yeova ikalilikana kĩkwʼũ kya Yesũ Wakelĩ, Matukũ 11, Mwei wa 4, 2017, sua yathũa. Ũmbano ũsu wa kũlilikana kĩkwʼũ kya Yesũ, ũla ũkuaa vakuvĩ ĩsaa yĩmwe, ũkeethĩwa na ũvoo ũkaelesya ũndũ kĩkwʼũ kya Yesũ kĩtonya kũtũtethya ĩvindanĩ yĩĩ na yĩla yũkĩte. Mwaka mũvĩtu, andũ ta milioni 20 nthĩ yonthe nĩmoombanie kũlilikana kĩkwʼũ kya Yesũ. Nĩtũũkũthokya na ũtanu wĩũka kũmbana naitũ nĩ kana twĩonanyʼa nĩtũtũngaa mũvea kwondũ wa mũthĩnzĩo ũsu mũnene wa Ngai.