MAKŨLYO KUMA KWA ASOMI MAITŨ

Nũndũ kĩla ũmwe wa etĩkĩwʼa mauta nũnengawe “ngwatĩlĩlyo” na akekĩwa ‘ũsiĩlo’ nĩ Ngai, no tũkũlye atĩĩ, Syo isu nĩ syaũ?—2 Ako. 1:21, 22.

Ngwatĩlĩlyo: Ĩvuku yĩmwe yĩwetete kana ndeto ya Kĩkiliki ĩla ĩalyũlĩtwe “ngwatĩlĩlyo” ĩvukunĩ ya 2 Akolintho 1:22 nĩ ndeto yatũmĩawa “maũndũnĩ ma silikalĩ na viasala,” na yonanasya “ndĩvi ĩla ya mbee yambaa kũĩvĩwa kĩndũ, kĩla wambaa kũnengane nĩ kana ũkwatĩĩe kĩndũ kĩikese kũthi na ũngĩ na ĩndĩ ũikĩĩvĩa o kavola, [kana] kĩla ũtiĩaa mũndũ nĩ kana ndakethĩwe na nzika ũkamũĩva kĩla ũkũtaĩte. Weeka ũu wĩthĩaa nue waĩlĩte kwĩsa kwosa kĩndũ kĩu, na no wasye nĩweewʼana na mwene wakyo.” Ĩla Mũklĩsto wetĩkĩwʼa veva mũtheu ethĩawa akwata ngwatĩlĩlyo ĩndĩ ĩ ndĩvi yonthe, kana kwa ndeto ingĩ, mũthĩnzĩo mwene, nĩ ũla ũwetetwe ĩandĩkonĩ ya 2 Akolintho 5:1-5. Mũthĩnzĩo ũsu ũkonetye kũvwʼĩkwa mwĩĩ ũtakanangĩka. O na nũkonetye kũnengwa thayũ ũtesa kũkwʼa.—1 Ako. 15:48-54.

Kĩthyomonĩ kya Kĩkiliki ũmũnthĩ, ve ndeto ĩngĩ ĩvwʼanene na ĩsu ya ngwatĩlĩlyo, ĩla yonanasya mbete ĩla yĩkĩawa mũndũ ayĩvaawʼa. Ngelekanyʼo ĩsu nĩyaĩlĩte etĩkĩwʼa mauta nũndũ nĩmevaĩtwʼe nĩ Klĩsto.—2 Ako. 11:2; Ũvu. 21:2, 9.

Ũsiĩlo: Tene ũsiĩlo watũmĩawa ta saii ya kũĩkĩĩthya kana kĩndũ kĩna nĩ kya mũndũ mũna, kana nĩ kya wʼo, kana o kũĩkĩĩthya andũ nĩmeewʼana ũndũnĩ mũna. Kwoou etĩkĩwʼa mauta nĩmekĩĩtwe “ũsiĩlo,” kana makavanwa kwa nzĩa ya ngelekanyʼo, nĩ veva mũtheu matwʼĩke ma Ngai. (Aev. 1:13, 14) Ĩndĩ ũsu tiwʼo ũsiĩlo wa mũthya. Mwĩtĩkĩwʼa mauta ekĩawa ũsiĩlo wa mũthya kavinda kanini atanamba kũkwʼa ethĩwa nĩ mũĩkĩĩku, kana ethĩwa ti ũu akeekĩwa kavinda kanini mbee wa ũla thĩna mũnene kwambĩĩa.—Aev. 4:30; Ũvu. 7:2-4.