Ũndũ Tũtonya Kwĩthĩwa Atavanyʼa Aseo—Kwĩmanyĩsya na Mũndũ Mũomonĩ Tũtũmĩĩte Ũvoo Mũseo Kuma kwa Ngai!
Nĩkĩ Nĩ Ũndũ wa Vata: Nĩ kana twĩthĩwe na amanyĩwʼa ma Mbivilia, no nginya twĩthĩwe twĩ alimũ ma Ndeto ya Ngai. (Mt. 28:19, 20) Ithyonthe no tũmanyĩsye nesa ũla wʼo kwa kũtũmĩa syĩndũ syonthe ila tũnengetwe. Mbulosua Ũvoo Mũseo Kuma kwa Ngai! ĩseũvĩtwʼe nĩ kana ĩtũtetheesye kũmanyĩsya andũ ũla wʼo. O na no tũmĩtũmĩe kwĩmanyĩsya na mũndũ mũthenya wa mbee mũomonĩ kwake.
Tata Kwĩka Ũndũ Ũũ Mweinĩ Ũũ:
Voya nĩ kana wĩthĩwe na wendi wa kũmanyĩsya mũndũ Mbivilia. O na ĩngĩ, voya Yeova aũtetheesye nĩ kana ũkwate mũndũ wa kũmanyĩwʼa Mbivilia, na ũyĩthĩwa wĩ mwalimũ mũseo wa ũla wʼo.—Avi. 2:13.
Ĩvinda ya ũthaithi wa mũsyĩ kana ĩla ũkwĩmanyĩsya wĩ weka, tata kũsyokeleela ũndũ ũsu ũkwenda kũthi kũneenea nĩ kana ũlike ngoonĩ. Kwĩka ũu no kũũtetheesye kũneena ũte na nzika, na ũyambĩĩa kwĩmanyĩsya na mũndũ Mbivilia mũomonĩ ĩla ũũtavanyʼa.