ĨSOMO YA 4

Kũneenea Ĩandĩko Ũtanamba Kũyĩsoma

Mathayo 22:41-45

KWA ŨKUVĨ: Ũmbanyʼa ilĩko sya ethukĩĩsya maku ũtanamba kũsoma ĩandĩko.

Sũanĩa nĩkĩ ũũsoma ĩandĩko. Ũtanamba kũsoma ĩandĩko, weta ũndũ ũtonya kũtuma ethukĩĩsya masũanĩa ũndũ wa vata ũla ũkwenda kũweta ĩandĩkonĩ yĩu.

Sũanĩa mĩsoa ĩla ĩthyũlũlũkĩte ĩandĩko yĩu. Watwʼa kũweta ũla waneenie ndeto ila syĩ ĩandĩkonĩ yĩu kana ũla waandĩkie ĩvuku yĩu, ĩkĩĩthya ndũnaweta mũndũ ũte we.
Onanyʼa kana ndeto syaku syumĩte Mbivilianĩ. Yĩla ũũneena na mũndũ ũmũĩkĩĩaa Ngai, onanyʼa kana Mbivilia nĩ Ndeto ya Ngai, nũndũ weeka ũu wĩĩthĩwa ũyonanyʼa kana Mbivilia nĩyo yĩthĩawa na ũĩ ũla mwingĩ.
Tetheesya ethukĩĩsya mendeewʼe nĩ ĩandĩko. Kũlya ĩkũlyo yĩtonya kũsũngĩwa nĩ ĩandĩko yĩla ũũsoma, kana ũwete thĩna mũna na ũyonanyʼa ũndũ ĩandĩko yĩu yĩtonya kũtetheesya kũũmina. O na no ũwete mwolooto mũna ũtonya kũelewʼa nĩ ĩandĩko yĩla ũkwenda kũsoma.

Sũanĩa maũndũ ala ethukĩĩsya maku mesĩ ĩũlũ wa kĩla ũũneenea, na ĩandĩko yĩla ũũsoma. Ũtanamba kũsoma ĩandĩko, weta ũndũ ũtonya kũtuma ethukĩĩsya mayĩsũanĩa kwa nzĩa ĩngĩ o na ethĩwa nĩmayĩsĩ.