Mosũngĩo ma makũlyo ma mbivilia

Nĩkĩ nthĩ yoombiwe?

Nthĩ ĩno yitũ yoombiwe yaĩlĩte nĩ kana yĩkalae syĩndũ syĩ thayũ. Yũmbĩtwe yĩ na kĩw’ũ kingĩ mũno nũndũ kĩw’ũ nĩ kya vata kwondũ wa thayũ. O na ĩngĩ, nthĩ yũmbĩtwe nesa ũkethĩa nĩkweeka, ĩkathyũũka, na ĩkathyũlũlũka syũa kwa nzĩa ĩla yaĩlĩte vyũ, nĩ kana wĩthĩe kĩw’ũ kĩla kĩ ũkanganĩ kĩitw’ĩka mbalavu, kana kĩkatheũka nginya kĩkang’ala. Nayo yayaya na vinya wa mũthemba mũna ũmĩthyũlũlũkĩte (magnetic field) nimĩsũvĩanaa na kyeni kĩla kĩthũku kya syũa. O na ĩngĩ, ũndũ nyamũ itethekaa kumana na mĩtĩ na ũndũ mĩtĩ ĩtethekaa kumana na nyamũ wĩthĩawa wĩ ũndũ wa kwendeesya mũno. Nũndũ wa itumi isu andũ aingĩ maasyaa nthĩ ĩno yitũ yoombiwe yĩ na kĩeleelo.—Soma Isaia 45:18.

Ĩndĩ no ũsaanĩw’e, ‘Mathĩna na ũsili ũte wa katĩ syaĩ o nthĩnĩ wa kĩeleelo kĩu?’—Soma Kũtũngĩlĩlwa Kwa Mĩao 32:4, 5.

Kĩeleelo kya Ngai kwelekela nthĩ kĩkeanĩw’a?

Nthĩ yoombiwe yĩthĩwe vandũ vaseo va kwĩkalaa andũ atanu, manenganĩte ndaĩa, na mamwendete Mũmbi woo. Kwoou, thayũ wa andũ wĩ na kĩeleelo kĩnene kwĩ thayũ wa nyamũ kana mĩtĩ. Ithyĩ no tũelewe Mũmbi witũ, na tũkendeew’a nĩ wendo wake na ũsili wake wa katĩ, na tũkeyĩelekany’a nake.—Soma Mũtavan’ya 12:13; Mika 6:8.

Mũmbi witũ nũtonya kwĩanĩsya ieleelo syake syonthe vyũ. Kwoou no twĩthĩwe na mũĩkĩĩo vyũ kana akavetanga mathĩna onthe, na ũsili ũte wa katĩ na aiseũvya nthĩ ĩno yitũ ĩtw’ĩke vandũ vaseo mũno va kwĩkalwa nĩ andũ.—Soma Savuli 37:11, 29; Isaia 55:11.

Nĩ kana ũkwate ũvoo mwingangĩ, sisya kĩlungu kya 3 kya ĩvuku yĩĩ, yĩla yumĩthĩtw’e nĩ Ngũsĩ sya Yeova

Nũtonya kũyumya kĩsesenĩ kya Indaneti kya www.jw.org/kam