Maũndũ Mathũku Nĩmesĩte Kwingĩva!

Mũndũ mũka ũmwe waĩ na myaka 35 ũla weetawa Smita,a kuma Dhaka, nthĩ ya Bangladesh, aĩ na nguma nzeo nũndũ nĩwendete andũ na nĩwamathĩnĩkĩaa. Andũ nĩmeesĩ kana eethĩawa e kĩveti kya mũika kĩ kĩthito, kĩtanu, na kyendete kũtetheesya andũ mamũmanye Ngai. Ĩndĩ andũ ma mũsyĩ vamwe na anyanyae make nĩmaseng’ie mũno ĩla wakwatiwe nĩ ũwau, na wamũaa kyumwa kĩmwe kĩte kĩthelu!

James na mũka wake, ala maĩ na myaka 30 na kĩndũ, maĩ o na nguma nzeo ta Smita. Ĩvinda yĩmwe nĩmaendie kwona anyanyae moo West Coast, nthĩ ya Amelika. Ĩndĩ ĩla maendie kw’o, mayaasyoka New York mũsyĩ kwoo. Nĩkĩ? Nũndũ nĩmakw’ĩĩie mũisyonĩ mũthũku wa lelũnĩ, ũla watiie kĩmako kĩnene kwa endwa moo na andũ ala mathũkũmaa namo.

Ũmũnthĩ ũthũku na mathĩna syusũĩte kĩla vandũ. Makaũ moaa asikalĩ vamwe na andũ mate asikalĩ. Naw’o ũthũku na maũndũ ma ũng’endu ikwataa o na ala mate na ĩvĩtyo. Mĩisyo mĩthũku vyũ na mowau mathũku ikwataa andũ onthe vate kũvathũkany’a ũkũũ wa mũndũ kana nĩwe ũũ. Na ve mĩisyo ĩngĩ yumĩlaa ĩkatuta andũ aingĩ kĩsionĩ kĩmwe ĩteũvathũkany’a. Kĩmena na ũsili ũte wa katĩ nasyo syusũĩte kĩla vandũ. O na we mwene nũtonya kwĩthĩwa ũkwatĩtwe nĩ maũndũ ta asu.

Andũ aingĩ nĩmekũlasya makũlyo ta aa:

• Nĩkĩ andũ aseo makwatawa nĩ maũndũ mathũku?

• We Ngai nĩwe waĩle kũtũlwa mũtĩ nũndũ wa maũndũ asu?

• Maũndũ mathũku mekaa kwĩyumĩlya kana maetawe nĩ andũ?

• Nĩmatonya kwĩthĩwa maumĩlaa nũndũ wa Karma?b

• Ethĩwa kwĩ Ngai mwene vinya w’onthe, nĩkĩ ũtasũvĩaa andũ ala aseo maikakwatwe nĩ maũndũ mathũku?

• Ve ĩvinda ũthũku na mathĩna ikathela?

Nĩ kana tũkwate ũsũngĩo wa makũlyo asu, twaĩle kwamba kũelewa ũsũngĩo wa makũlyo aa elĩ ma vata: Nĩkĩ maũndũ mathũku maumĩlaa, na Ngai akoosa ĩtambya yaũ?