Septembre

Fezuu kiɖeɖeu sɩnɩ Pɩyɛɛrɩ nɛ ɛlabɩnɩ tʋmɩyɛ tɔm pee wena awɛ ndɩ pazɩ yɔ alɩwaatʋ ndʋ ɛyɔɔdaɣ Yowɛɛlɩ natʋ tɔm yɔ. (Tʋma 2:16, 17) Pɩyɛɛrɩ tɩpaɣzɩ ɛ-tɔm nɛ tɔm pee “pʋwayɩ lɛ,” ɛlɛ ɛyɔɔdaa se: “Kɛdɛzaɣ kɩyakɩŋ taa lɛ.” Hɔɔlʋʋ kʋnɛ kɩ-taa lɛ, Pɩyɛɛrɩ wɛɛ nɛ ɛyɔɔdʋʋ alɩwaatʋ pazɩ ndʋ pɩkazaa se pɔyɔkɩ Yeruzalɛm nɛ kɩ-tɛ templo cɩɖɩ cɩɖɩ yɔ tɩ-tɔm na. Alɩwaatʋ ndʋ tɩ-taa lɛ, Ɛsɔ kaɣ pɩyʋʋ e-fezuu “tomnasɩ ndɩ ndɩ yɔɔ.” Tɔm tʋnɛ tɩwɩlɩɣ se alɩwaatʋ sakɩyɛ ɖɛwa pʋcɔ nɛ Yowɛɛlɩ natʋ tɔm la. Ɛsɔ pɩyɩ e-fezuu Krɩstʋ mba yɔɔ kajalaɣ pɩnzɩ mɩnʋʋ taa nɛ pɩtɛ lɛ, papaɣzɩ labʋ tɔm susuu tʋmɩyɛ nɖɩ ɖɩkaɣ talʋʋ ɛjaɖɛ kpeekpe yɔɔ pʋwayɩ yɔ. Alɩwaatʋ ndʋ apostoloo Pɔɔlɩ ma Koloosi mba takayaɣ pɩnaɣ 61 taa mbʋ yɔ, ɛpɩzaɣ se ɛyɔɔdɩ se tɔm susuu yɛlaa nɛ halɩ posusi-tʋ “wondu kɩlɩzɩtʋ tɩŋa ɛjaɖɛ kpeekpe yɔɔ.” (Kol. 1:23) Pɔɔlɩ yɔɔdʋʋ se “wondu kɩlɩzɩtʋ tɩŋa” yɔ, pɩwɩlɩɣ ɛjaɖɛ hɔɔlɩŋ weyi ɩ-taa Pɔɔlɩ nɛ lalaa papɩzaɣ se pɔɖɔ nʋmɔʋ nɛ powolo yɔ. Yehowa fezuu kiɖeɖeu sɩnaa nɛ tɔm susuu yɛlɩ ɖa-alɩwaatʋ taa nɛ pɩkpaɖɩ, pʋ-tɔbʋʋ se pɩtalɩ “tɛtʋ kamaɣ yɔɔ”!—Tʋma 13:47. w20.04 6-7 § 15-16

Yehowa sɔɔlɩ ɖa-taa paa anɩ, pɩkpɛndɩnɩ “heŋ” yaa mba poposini e-ewiɖe yɔ. (Mat. 18:12-14) Ɛsɔ tɩŋnɩ nayʋ Ezekɩyɛɛlɩ yɔɔ nɛ ɛla tamaɣ se ɛkaɣ ñɩnʋ e-heŋ weyi ileba yɔ, nɛ ɛsɩnɩ-ɩ nɛ ɩɖaɣnɩ kpaʋ ɖoŋ fezuu taa. Nɛ ɛyɔɔdɩ nɩŋgbanzɩ nzɩ ɖeyi ɖeyi ɛkaɣ kpɛzʋʋ se eholi-i yɔ sɩ-tɔm. Nɛ nɩŋgbanzɩ nzɩ, sɩwɛ ɖeyi ɖeyi ɛzɩ nzɩ Izrayɛɛlɩ ninɖiɣyu kpɛzaɣ alɩwaatʋ ndʋ e-heu nɔɔyʋ leki yɔ. (Ezek. 34:12-16) Kajalaɣ lɛ, ninɖiɣyu ñɩnaɣ e-heu nɛ pɩpɩzaɣ se pɩpɔzɩ-ɩ alɩwaatʋ nɛ pana ñaɣʋ siŋŋ. Pʋwayɩ lɛ, alɩwaatʋ ndʋ ninɖiɣyu naɣ e-heu kilebu yɔ, ɛpɩsaɣnɩ-ɩ ewiɖe cɔlɔ. Pɩtasɩ lɛ, ye pɩkʋ heu yaa ñɔɔsɩ ɛwɩɣ-ɩ yɔ, ninɖiɣyu sɩɣaɣnɩ-ɩ nɛ sɔɔlɩm, ɛhɔkʋʋ e-heŋ, ɛcɔŋnɩ i-ɖeɖe nɛ ɛhaɣ heu ɛnʋ tɔɔnaɣ. Ɛzʋtʋyaa ɖiyiɣni “Ɛsɔ ewiɖe,” nɛ pɩcɛyaa se pɛkpɛzɩ nɩŋgbanzɩ kʋɖʋmsɩ nzɩ, nɛ pasɩnɩ mba payɩ poposini ɛgbɛyɛ yɔ. (1 Pɩy. 5:2, 3) Ɛzʋtʋyaa ñɩnɩɣ-wɛ, pasɩɣnɩ-wɛ se papɩsɩ ɛgbɛyɛ taa, nɛ pawɩlɩɣ-wɛ se pɔsɔɔlɩ-wɛ alɩwaatʋ ndʋ pasɩɣnɩ-wɛ se papɩsɩ Yehowa taabalaa yɔ. w20.06 20 § 10

Ɛzɩ Yesu maɣzaɣ se tɔɔnaɣ talɩ kʋm mbʋ pʋyɔɔ yɔ, ɛtaɣaɣ liu se ɛyaa sakɩyɛ kaɣ-ɩ tɩŋʋʋ na? Aayɩ pɩtɩkɛ mbʋ. Masɩ kaayɔɔdaa se pɩtɩla ɛyaa pazɩ kaɣnɩ tisuu ɛ-yɔɔ. (Yoh. 12:37, 38) Nɛ Yesu kaawɛnɩ ɖoŋ se ɛpɩzɩ nɛ ɛna ɛyaa laŋa taa. (Mat. 9:4) Ɛlɛ, ɛkam ñʋʋ nɛ ɛyaa pazɩ mba pakaɣ tisuu ɛ-yɔɔ yɔ, nɛ esusi ɛyaa tɩŋa tɔm nɛ kpekpeka. Ðɩɩpɩzɩɣ nɛ ɖɩna ɛyaa laŋa taa, nɛ pʋyɔɔ lɛ pɩtɩmʋna se ɖɩkɔ tɔm ñʋʋ se egeetiye naɖɩyɛ taa mba yaa ɛyʋ nɔɔyʋ ɛɛpɩzɩɣ nɛ ɛlɛɣzɩ! Ɛlɛ, kpaɣ ɛyaa se papɩzɩɣ nɛ papɩsɩ Yesu tɔmkpɛlɩkɩyaa. Tɔzɩ tɔm ndʋ Yesu heyi ɛ-tɔmkpɛlɩkɩyaa yɔ tɩ-yɔɔ. Hayɩm hʋlʋmaa, pʋ-tɔbʋʋ lɛ se hayɩm taa tɔɔnaɣ talɩ kʋm. Ɛyaa pɩzɩɣ pɛlɛɣzɩ nɛ papɩsɩ Krɩstʋ tɔmkpɛlɩkɩyaa. Yehowa wɛnɩ lidaʋ se ɛyaa mba pɛwɛ ɖo-kooka taa yɔ papɩzɩɣ nɛ papɩsɩ tɔmkpɛlɩkɩyaa, nɛ pɛkɛ wondu ndʋ tɩmʋ “ñɩm” yɔ. (Agee 2:7) Ye lɩmaɣza wena Yehowa nɛ Yesu pɛwɛnɩ ɛyaa yɔɔ yɔ, ana ɖɩwɛna yɔ, ɖɩkaɣ kpɛlɩkʋʋ nɛ ɖɩtɩlɩ wɛtʋ ndʋ tɩ-taa pacaɣ wezuu yɔ nɛ mbʋ pɩkɛdɩɣnɩ-wɛ yɔ. Ðɩɩkaɣ-wɛ kpaɣʋ ɛzɩ agɔma yɔ, ɛlɛ ɖɩkaɣ-wɛ kpaɣʋ ɛzɩ mba papɩzɩɣ nɛ papɩsɩ ɖo-koobiya yɔ. w20.04 13 § 18-19

Ɛsɔtɔm wɩlɩɣ kpayɩ kpayɩ se pɩpɔzʋʋ se ɖɩwɛɛnɩ sɔɔlɩm Yesu yɔɔ nɛ pɩsa nɛ ɖɔ-tɔm kɛdɩnɩ Yehowa. Mbʋ ɖɩpɩzɩɣ nɛ ɖɩla nɛ ɖɩpɩzɩ Yesu taabalʋ yɔ, pɩ-taa nabʋyʋ lɛ se ɖɩkpɛlɩkɩ nɛ ɖɩtɩlɩ-ɩ. Ðɩpɩzɩɣ nɛ ɖɩla mbʋ ye ɖɩkalɩɣ Maatiyee, Maarkɩ, Luka nɛ Yohanɛɛsɩ takayɩsɩ nzɩ sɩwɛ Bibl taa yɔ. Bibl taa kɛdɛsɩ nzɩ sɩyɔɔdʋʋ Yesu wezuu caɣʋ tɔm yɔ, sɩ-yɔɔ maɣzʋʋ yeki se ɖɩsɔɔlɩ Yesu nɛ ɖɩñamɩ-ɩ camɩyɛ lakasɩ nzɩ ɛlakaɣ ɛyaa yɔ sɩ-yɔɔ. Kɩɖaʋ nakʋyʋ yɔ, paa ɛɛkɛ ɛ-tɔmkpɛlɩkɩyaa Ñʋʋdʋ yɔ, ɛtɩkpaɣ-wɛ ɛzɩ yomaa yɔ. Ɛlɛ eheyi-wɛ ndʋ ɛmaɣzaɣ yɔ nɛ ɛzɩma pɩlakaɣ-ɩ yɔ. Alɩwaatʋ ndʋ paawɛ laŋwɛɛkɩyɛ taa yɔ, ɛnɩ pe-siziŋ nɛ ɛ nɛ wɛ pewii. (Yoh. 11:32-36) Halɩ mba pakaɖaɣnɩ-ɩ yɔ, paanawa se ɛkɛ mba pewelisiɣ ɛ-tɔm yɔ pa-taabalʋ. (Mat. 11:19) Ye ɖɩmaɣzɩɣnɩ wɛtʋ ndʋ Yesu kaawɛnɩ ɛ-tɔmkpɛlɩkɩyaa yɔɔ yɔ, ɖa nɛ lalaa ɖa-taabalɩyɛ cɛyɩsɩɣ, ɖɩwɛɛ taa leleŋ taa nɛ pɩkpaɖɩ, nɛ ɖɩsɔɔlɩ Yesu nɛ ɖɩñamɩ-ɩ nɛ pɩkpaɖɩ. w20.04 22 § 9-10

Pɩnaɣ 1870 taa, Grandɩ Bretaañɩ pɩsɩ ɛjaɖɛ kpeekpe yɔɔ kewiyaɣ ŋga kakpaɖɩ ɖoŋ, nɛ kɛwɛɛnɩ sɔɔjanaa mba pakɩlɩ ɖoŋ yɔ. Danɩyɛɛlɩ natʋ tɔm yɔɔdʋʋ hɩlʋʋ cikpeluu nakʋyʋ tɔm se kɩwabɩ hɩŋ naadozo lɛɛŋ. Hɩlʋʋ cikpeluu ŋgʋ kɩsɩŋnɩ Grandɩ Bretaañɩ nɛ hɩŋ lɛɛŋ ñasɩŋnɩ Fransɩ, Ɛsɩpaañɩ nɛ Peeyibaa. (Dan. 7:7, 8) Nɛ Grandɩ Bretaañɩ kaakɛnɩ hadɛ kiŋ wiyaʋ Caama you kajalaɣ ñɩŋgʋ alɩwaatʋ taa. Alɩwaatʋ kʋɖʋmtʋ ndʋ tɩ-taa lɛ, Etaazuunii ɛjaɖɛ kaapɩsɩ ɛjaɖɛ nɖɩ ɖɩwɛnɩ ñɩm nɛ pɩkpaɖɩ yɔ, nɛ ɖɩɩɖʋ ɛgbɛyɛ nɛ Grandɩ Bretaañɩ. Caama you kajalaɣ ñɩŋgʋ alɩwaatʋ taa, Etaazuunii nɛ Grandɩ Bretaañɩ palabɩ nɔɔ kʋɖʋmaɣ nɛ palʋ nɛ papɩsɩ kewiyaɣ ŋga kɛwɛ ɖoŋ siŋŋ yɔ. Grandɩ Bretaañɩ nɛ Etaazuunii papɩsɩ taabalaa nɛ pɛkpɛndɩ papɩsɩ ajɛɛ wena akpaɖɩ ɖoŋ ɛjaɖɛ kpeekpe yɔɔ yɔ. Ɛzɩ Danɩyɛɛlɩ kaayɔɔdʋʋ yɔ, wiyaʋ ɛnʋ ekpeɣli “sɔɔjanaa sakɩyɛ nɛ ɖoŋ tɩnaa pɩŋŋ.” Kɛdɛzaɣ kɩyakɩŋ taa lɛ, Grandɩ Bretaañɩ nɛ Etaazuunii pɛkpɛndɩna nɛ pɛkɛ hadɛ kiŋ wiyaʋ. w20.05 4 § 7-8

Lɩm mbʋ pɩwɛ tɛtʋ yɔɔ yɔ, pitikii ɛlɛ pɩwɛ cololo mbʋ pʋyɔɔ yɔ tɛtʋ posini wɩsɩ ɛzɩ pɩpɔzʋʋ yɔ. Ye tɛtʋ kaatasɩ ñɔtɩnʋʋ wɩsɩ pazɩ yɔ, lɩm mbʋ pɩwɛ tɛtʋ yɔɔ yɔ, pɩɩpɩsɩ hohou nɛ tɛtʋ saa miŋ nɛ nabʋyʋ taapɩzɩɣ se pɩwɛɛ wezuu tɩ-yɔɔ. Ye tɛtʋ kaatasɩ posinuu wɩsɩ pazɩ yɔ, lɩm kpeekpe kaakiwa nɛ tɛtʋ pɩsɩ ɖɔmbɩyɛ sɔsɔɖɛ naɖɩyɛ. Yehowa sɩ tɛtʋ lone nɖɩ ɖɩmʋnaa yɔ ɖɩ-taa, pʋyɔɔ lɩm mbʋ pɩwɛ tɛtʋ yɔɔ yɔ pɩɩtɛŋ nɛ pɩpɩzɩɣ nɛ pɩɖɔkɩ wezuu. Wɩsɩ yeki nɛ lɩm mbʋ pɩwɛ teŋgu taa nɛ tɛtʋ yɔɔ yɔ pɩsaɣ miŋ nɛ pɩpɩsɩɣ hohou se pikpeɣliɣ nɛ pɩpɩsɩɣ mɩndʋ. Paa pɩnaɣ ŋga lɛ, lɩm mbʋ wɩsɩ yeki nɛ pɩpɩsɩɣ hohou yɔ, pɩtalɩɣ litrinaa miiliyaarɩwaa sakɩyɛ. Lɩm mbʋ, pɩwɛɣ ɛsɔdaa kɩyakɩŋ ɛzɩ hiu mbʋ yɔ pʋcɔ nɛ pɩnɩɩ ɛzɩ tɛʋ yaa ɖɔmbɛɛ yɔ. Ðoŋ ɖoŋ lɛ, lɩm mbʋ pikpeŋ nɛ pɩpɩsɩɣ teŋgu taa yaa hɔɔlɩŋ lɛɛŋ weyi ɩ-taa lɩm wɛɛ yɔ nɛ pɩɖaɣnɩɣ lɛɣzʋʋ. Yehowa labɩ lɩm se pɩpɩzɩ nɛ pɩlɛɣzɩɣ, nɛ pɩsa nɛ lɩm wɛɛ tɛtʋ yɔɔ paa ɛzɩmtaa. Lɛɣzɩtʋ ndʋ tɩwɩlɩɣ se Yehowa kɛ lɔŋsɩnɖʋ nɛ ɛwɛ ɖoŋ ɖɔɖɔ.—Yɔɔb 36:27, 28; w20.05 22 § 6

Yesu seɣti-ɖʋ se ɖiwolo pɩ-yɔɔ nɛ ɖɩtɩmɩɣ nɛ ɖɩpɔzʋʋ fezuu kiɖeɖeu. (Luka 11:9, 13) Yehowa tɩŋɩɣnɩ e-fezuu kiɖeɖeu yɔɔ nɛ ɛhaɣ-ɖʋ “ɖoŋ weyi ɩcɛzɩ ɛyʋ ɖoŋ yɔ.” (2 Kɔr. 4:7) Pɩtɩŋnɩ Ɛsɔ fezuu sɩnʋʋ yɔɔ lɛ, ɖɩpɩzɩɣ nɛ ɖɩɖɔkɩ ɖa-tɩ paa kaɖɛ nɖɩ lɛ ɖɩ-taa. Fezuu kiɖeɖeu pɩzɩɣ kɩsɩnɩ-ɖʋ ɖɔɖɔ nɛ ɖɩla tʋma wena paɖʋ-ɖʋ Ɛsɔ sɛtʋ taa yɔ nɛ kɩzɩɣ kɩsɩnɩ-ɖʋ nɛ ɖɩɖɛɛnɩ ɛsɩndaa hɔɔlɩŋ weyi ɩ-taa ɖɩtɛm wɛʋ niye yɔ. Ðɩnawa se pɩtɩkɛ ɖo-ɖoŋ taa ɖa-pana ñaɣʋ lʋlʋʋ pee kɩbana, ɛlɛ Ɛsɔ fezuu kiɖeɖeu yekina nɛ ɖɩlʋlʋʋ pee ana. Ðɩpɩzɩɣ ɖɩwɩlɩ se Ɛsɔ fezuu kiɖeɖeu mʋ ñɩm ɖɛ-ɛsɩndaa ye ɖɩpɔzɩ Yehowa se eyele nɛ kɩsɩnɩ-ɖʋ nɛ ɖɩtɩlɩ lɩmaɣza kɩdɛkɛda yaa kɔɖɛyɩ kɩdɛkɛdʋʋ ŋgʋ kɩwɛ ɖa-laŋɩyɛ taa yɔ. (Keɣa 138:23, 24) Ye ɖɩlabɩ adɩma ana yɔ, Yehowa pɩzɩɣ ɛtɩŋnɩ e-fezuu yɔɔ nɛ eyele nɛ ɖɩtɩlɩ ɖa-maɣzɩm yaa ɖɔ-kɔɖɛyɩ kɩdɛkɛdʋʋ. Ye mbʋ pɩwɛɛ se ɖɩtɩmɩ se Ɛsɔ fezuu ɛha-ɖʋ ɖoŋ nɛ ɖɩlʋbɩnɩ maɣzɩm kɩdɛkɛdɩm yaa kɔɖɛyɩ kɩdɛkɛdʋʋ ŋgʋ. Ye ɖɩlakɩ mbʋ yɔ, Yehowa kaɣ naʋ se ɖɩtɩsɔɔlɩ se ɖɩla nabʋyʋ mbʋ piyeki se eyele tɩŋnʋʋ e-fezuu kiɖeɖeu yɔɔ nɛ ɛsɩɣnɩ-ɖʋ yɔ.—Efɛz. 4:30. w20.05 28-29 § 10-12

Alɩwaatʋ ndʋ ɖɩlʋkɩ Yehowa hɩɖɛ yɔɔ yɔ, pɩwɩlɩɣ se ɖɩmaɣzɩɣnɩ Yesu Krɩstʋ kɩɖaʋ. Pɩtasɩna se Yesu labɩnɩ ɛ-Caa hɩɖɛ tʋmɩyɛ se ɛyaa ɩtɩlɩ-ɖɩ lɛ, ɛwɩlɩ-wɛ ɖɔɖɔ ɛyʋ weyi keekee Yehowa kɛnaa yɔ. Kɩɖaʋ nakʋyʋ yɔ: Ɛkaɖɩnɩ Farɩsɩ ñɩma mba peyekaɣ se ɛyaa ɩmaɣzɩ se Yehowa wɛ kañatʋ, ɛ-paɣtʋ wɛ kaɖɛ, eposini ɛyaa nɛ ɛɛnaɣ pa-pʋtɔdɩyɛ yɔ. Yesu sɩnɩ ɛyaa nɛ patɩlɩ se ɛ-Caa nɩɣ ɛyaa tɔm taa, ɛwɛ suuɖu, ɛkɛ sɔɔlɩm tʋ nɛ ekpeɣu. Ɛsɩnɩ ɛyaa ɖɔɖɔ se patɩlɩ Yehowa pɩtɩŋnɩ ɛzɩma ɛmaɣzɩnɩ ɛ-Caa wɛtʋ ɖeyi ɖeyi e-wezuu caɣʋ kɩyakɩŋ kpeekpe taa yɔ pɩ-yɔɔ. (Yoh. 14:9) Ɛzɩ Yesu yɔ, ɖɩpɩzɩɣ nɛ ɖiheyi ɛyaa ndʋ ɖɩsɩm Yehowa yɔɔ yɔ, nɛ ɖɩwɩlɩ-wɛ se ɛkɛ Ɛsɔ sɔɔlɩm tʋ nɛ ɛlakɩ camɩyɛ lakasɩ. Ye ɖɩlakɩ mbʋ yɔ, ɖɩkaɖɩɣnɩ pɔbɔtʋ nɛ cɛtɩm tɔm ndʋ pɔyɔɔdʋʋ Yehowa yɔɔ yɔ. Ðɩpɩzɩɣ nɛ ɖɩñalɩ Yehowa hɩɖɛ yɔɔ ye ɖɩsɩɣnɩ ɛyaa se patɩlɩ se hɩɖɛ nɖɩ ɖɩwɛ kele kele yɔ. Ðɔ-yɔɔdaɣ nɛ ɖa-lakasɩ taa ɖɩwɩlɩɣ ɛyaa ɛyʋ weyi keekee Yehowa kɛnaa yɔ. Ðɩlʋkɩ hɩɖɛ nɖɩ ɖɩ-yɔɔ ye ɖɩsɩɣnɩ ɛyaa se patɩlɩ toovenim Ɛsɔ yɔɔ yɔ. w20.06 6 § 17-18

Ðɩpɩzɩɣ nɛ ɖɩlabɩnɩ réseaux sociaux waa tʋmɩyɛ camɩyɛ. Kɩɖaʋ nakʋyʋ yɔ: Ðɩpɩzɩɣ ɖɩtɩŋnɩ pɔ-yɔɔ nɛ ɖɩyɔɔdɩnɩ ɖɔ-hɔʋ taa ñɩma nɛ ɖa-taabalaa. Paa mbʋ yɔ, ŋyʋsaa se ɛyaa nabɛyɛ maɣ tɔm réseaux sociaux waa yɔɔ, paɖʋʋ fotonaa nɛ videowaa se peyele nɛ lalaa sam-wɛ? Pɩwɛ ɛzɩ pacaɣ se peheyi lalaa se “ɩcɔnɩ-m” yɔ. Halɩ lalaa yɔɔdʋʋ kaañamtʋ tɔm yaa kʋzɔɔtʋ tɔm pa-maɣmaɣ po-fotonaa yaa fotonaa mba lalaa ɖʋʋ réseaux sociaux waa yɔɔ yɔ pɔ-yɔɔ. Bibl seɣtiɣ Krɩstʋ ñɩma se pɛwɛɛnɩ tɩ luzuu nɛ panɩɩ ɖama siziŋ, pʋyɔɔ lɛ pɩtɩkɛ mbʋ pɩmʋnaa se palabɩnɩ tʋmɩyɛ réseaux sociaux waa. (1 Pɩy. 3:8) Ye ŋlakɩnɩ tʋmɩyɛ réseaux sociaux waa yɔ, pɔzɩ ña-tɩ tɔm tʋnɛ: ‘Tɔm ndʋ mamaɣ yɔ, fotonaa yaa videowaa mba manɖʋʋ réseaux sociaux waa yɔɔ yɔ, papɩzɩɣ peyele nɛ lalaa maɣzɩ se mankpazɩɣ man-tɩ yaa we? Manpɩzɩɣ meyele nɛ lalaa wɛɛnɩ sʋsɩ na?’ Pɩfɛyɩ se Krɩstʋ ñɩma ɩsɔɔlɩ se pɔ-tɔm ɛkɩlɩnɩ cɛyʋʋ yaa lalaa ɩsam-wɛ. Pɔɖɔŋ Bibl lɔŋ tasʋʋ mbʋ pɩwɛ sɔnɔ evemiye mayaɣ taa pɩ-yɔɔ. Ye ɖɩwɛnɩ tɩ luzuu yɔ, ɖɩɩkaɣ wɛʋ ɛzɩ ɛjaɖɛ yɔɔ ɛyaa mba pakpazɩɣ pa-tɩ nɛ pɔsɔɔlaa se lalaa ɩmaɣzɩ se pɔ-tɔm cɛyɩ siŋŋ yɔ.—1 Yoh. 2:16. w20.07 6 § 14-15

Pʋcɔ nɛ apostoloo Pɔɔlɩ pɩsɩɣ Krɩstʋ tɔmkpɛlɩkɩyʋ lɛ, ɛɛkɛ abalʋ weyi ɛɛwɛ kaañamtʋ yɔ nɛ ɛɛnazɩ Yesu wayɩ tɩŋɩyaa. (Tʋma 7:58) Yesu mamaɣ sɩnzɩ Pɔɔlɩ, se eyele nazʋʋ Krɩstʋ ɛgbɛyɛ. Pʋbʋ taa lɛ, payaɣaɣ Pɔɔlɩ se Sɔɔlɩ. Yesu yɔɔdɩnɩ Pɔɔlɩ nɛ ɛsɔdaa kiŋ nɛ eyele nɛ ɛpɩsɩ yʋlʋm. Pɩsa nɛ Pɔɔlɩ ɖaɣnɩ paɣzʋʋ naʋ lɛ, pɩɩpɔzaa se eyele nɛ ɛyaa mba ɛnazaɣ yɔ pasɩnɩ-ɩ. Pɔɔlɩ luzi ɛ-tɩ nɛ etisi nɛ tɔmkpɛlɩkɩyʋ Anaanɩyaasɩ sɩnɩ-ɩ nɛ ɛɖaɣnɩ paɣzʋʋ naʋ. (Tʋma 9:3-9, 17, 18) Pʋwayɩ, Pɔɔlɩ kɔm nɛ ɛpɩsɩ Krɩstʋ ɛgbɛyɛ taa tʋ weyi pasɩmɩ-ɩ camɩyɛ yɔ, ɛlɛ ɛtɩsɔɔ lɔŋ weyi Yesu kpɛlɩkɩ-ɩ Damaasɩ habɩyɛ yɔɔ yɔ ɩ-yɔɔ wiɖiyi kpa. Pɔɔlɩ wobi pɩ-yɔɔ nɛ eluzuu ɛ-tɩ, nɛ etisi faaa nɛ e-koobiya sɩnɩ-ɩ. Eɖiɣzinaa se ‘papɩsɩ sɩnʋʋ mbʋ pɩkpazɩ-ɩ ɖoŋ yɔ.’—Kol. 4:10, 11, pɩ-tɛɛ tɔm. w20.07 18-19 § 16-17

Paa Yehowa ɛkɛnɩ kɩlɩm yɔ, ɛhaɣ lalaa wala naayɛ. Kɩɖaʋ nakʋyʋ yɔ, ɛlɩzɩ Yesu se ɛkɛ Kewiyaɣ Wiyaʋ, nɛ ɛkaɣ haʋ ɛyaa 144 000 waa mba pa nɛ Yesu pakaɣ kewiyitu tɔɔʋ yɔ wala naayɛ. Toovenim taa lɛ, Yehowa falɩsɩ Yesu se ɛkɛ Wiyaʋ nɛ Cɔjɔ Sɔsɔ. (Ebr. 5:8, 9) Pɩtasɩ lɛ, ɛwɛɛ nɛ ɛfalɩsɩɣ mba pa nɛ Yesu pakaɣ tɔɔʋ kewiyitu yɔ se papɩzɩ nɛ pala pa-tʋmɩyɛ. Ɛlɛ ɛɛñakɩ pana nɛ ɛcɔŋna tete nɛ ɛnaɣ ɛzɩma palakɩ tʋmɩyɛ yɔ. Ɛlɛ, ɛtaɣ liu se pakaɣ labʋ ɛ-sɔɔlɩm. (Natʋ 5:10) Pɩtɩcɛyɩ se nɔɔyʋ ɛsɩnɩ ɖa-Caa weyi ɛwɛ ɛsɔdaa yɔ, paa mbʋ yɔ, ɛhaɣ lalaa wala. Ye mbʋ, pɩpɔzʋʋ se ɖɩla mbʋ nɛ pɩkpaɖɩ! Ŋkɛ hɔʋ ñʋʋdʋ yaa ɛgbɛyɛ taa ɛzʋtʋyʋ na? Maɣzɩnɩ Yehowa kɩɖaʋ nɛ ŋɖʋ lalaa tʋma, nɛ taañakɩ pana nɛ ŋcɔŋnɩ tete nɛ ŋnaɣ ɛzɩma palakɩ tʋmɩyɛ yɔ. Ye ŋmaɣzɩɣnɩ Yehowa yɔ, lalaa kaɣ labʋ tʋmɩyɛ nɖɩ ŋɖʋ-wɛ yɔ, nɛ ŋkaɣ-wɛ falɩsʋʋ nɛ ŋsɩnɩ-wɛ nɛ pataa pa-tɩ liu nɛ pɩkpaɖɩ.—Iza. 41:10. w20.08 9 § 5-6

Lɩmaɣza wena Yehowa sɔɔlaa se ɖɩwɛɛnɩ e-heŋ weyi ileba yɔ ɩ-yɔɔ? Yesu kɩɖaʋ pɩzɩɣ nɛ kɩkpɛlɩkɩ-ɖʋ lɔŋ. Yesu kaanawa se Yehowa heŋ tɩŋa mʋ ñɩm Yehowa ɛsɩndaa, pʋyɔɔ lɛ, ɛlabɩ mbʋ payɩ ɛpɩzɩɣ yɔ se ɛsɩnɩ “Izrayɛɛlɩ ɖɩɣa taa heŋ kilebiŋ” nɛ ɩpɩsɩ Yehowa cɔlɔ. (Mat. 15:24) Ɛzɩ ninɖiɣyu kɩbanʋ yɔ, Yesu labɩ mbʋ payɩ ɛpɩzɩɣ yɔ se pɩsa nɛ etaalesi Yehowa heu nɔɔyʋ. (Yoh. 6:39) Apostoloo Pɔɔlɩ kaaseɣti Efɛɛzɩ ɛgbɛyɛ taa ɛzʋtʋyaa se pamaɣzɩnɩ Yesu kɩɖaʋ. Ɛyɔɔdaa se: “Ɩsɩnɩ ajamaa, nɛ pɩwɛɛ se ɩtɔzʋʋ Kɩbaɣlʋ Yesu tɔm yɔɔ, alɩwaatʋ ndʋ ɛ-maɣmaɣ ɛyɔɔdaa se: ‘Taa leleŋ wɛ haʋ taa nɛ pɩkɩlɩ mʋʋ taa’ yɔ.” (Tʋma 20:17, 35) Mayaɣ ŋga, kawɩlɩɣ se ɛzʋtʋyaa wɛnɩ tʋmɩyɛ kɩcɛyɩyɛ naɖɩyɛ; nɖɩ lɛ se pɔcɔnɩ Yehowa samaɣ yɔɔ. Payaɣ ɛgbɛyɛ taa ɛzʋtʋyʋ nɔɔyʋ se Salvador nɛ ɛwɛ Ɛsɩpaañɩ ɛjaɖɛ taa. Ɛyɔɔdaa se: “Alɩwaatʋ ndʋ mamaɣzɩɣ ɛzɩma Yehowa cɔŋnɩ e-heŋ weyi ileba yɔ ɩ-yɔɔ siŋŋ yɔ pɩ-yɔɔ lɛ, piseɣtiɣ-m se mala mbʋ payɩ manpɩzɩɣ yɔ nɛ mansɩnɩ heŋ ɛnɩ. Man-taa tɛma se Yehowa sɔɔlaa se mɔncɔnɩ heŋ ɛnɩ ɩ-yɔɔ.” w20.06 23 § 15-16

Yehowa kaɣ ɖʋʋ suuɖu nɛ ɛɖaŋ se pɩnzɩ kudoku ɩtɛ pʋcɔ nɛ ɖɩtalɩ pilim. Pʋcɔ nɛ alɩwaatʋ ndʋ tɩtalɩ lɛ, Yehowa sɔɔlɩ faaa se ekpeɣ-ɖʋ ɖa-kɩwɛɛkɩm. Ye mbʋ, ɖa ɖɔɖɔ pɩwɛɛ se ɖɩmaɣzɩnɩ ɛ-kɩɖaʋ nɛ ɖɩka ɖa-lɩmaɣza lalaa wɛtʋ kɩbandʋ yɔɔ, nɛ ɖɩwɩlɩ-wɛ suuɖu. Alɩwaatʋ ndʋ pacalɩ lɩzʋʋ tɛtʋ yɔ, Yesu nɛ Ɛsɔ tiyiyaa pa-taa kaalabɩ leleŋ. Ɛlɛ maɣzɩ nɛ ŋna ɛzɩma pa-taa kaɣ labʋ leleŋ alɩwaatʋ ndʋ panaɣ se tɛtʋ suni ɛyaa mba yɔ, patalɩ pilim nɛ pɔsɔɔlɩ Yehowa nɛ pɛsɛɣ-ɩ yɔ. Maɣzɩ nɛ ŋna taa leleŋ weyi ɩ-taa mba pakaɣ kpaʋ ɛsɔdaa yɔ pɛwɛɣ yɔ, alɩwaatʋ ndʋ panaɣ se pa-tʋmɩyɛ wɛɛ nɛ ɖɩwazɩɣ ɛyaa yɔ. (Natʋ 4:4, 9-11; 5:9, 10) Maɣzɩ se ŋwɛ wezuu alɩwaatʋ ndʋ tɩ-taa taa leleŋ ɛsɩtɛɣlɩm lɛɣzɩ kʋñɔŋ ɛsɩtɛɣlɩm yɔ, alɩwaatʋ ndʋ kʋdɔŋ, wɩzasɩ nɛ sɩm patɩtasɩ wɛʋ yɔ. Pʋcɔ nɛ pɩtalɩ mbʋ lɛ, tɛ ña-taa se ŋmaɣzɩɣnɩ ña-Caa sɔɔlɩm tʋ, lɔŋsɩnɖʋ nɛ suuɖu tʋ Yehowa. Ye ŋlakɩ mbʋ yɔ, ŋkaɣ wɛʋ taa leleŋ taa paa tɩlasɩ nzɩ ŋkatɩɣ yɔ. (Yak. 1:2-4) Pɩwɛɛ se ɖɩsɛɛ Yehowa, tamaɣ ŋga ɛlaba se ‘ɛkaɣ fezuu ɛyaa’ yɔ kɔ-yɔɔ!—Tʋma 24:15. w20.08 19 § 18-19

Bibl kɛ kʋjɔʋ ŋgʋ Ɛsɔ labɩ-ɖʋ nɛ sɔɔlɩm yɔ. Ða-Caa weyi ɛwɛ ɛsɔdaa yɔ, ɛtɩŋnɩ fezuu kiɖeɖeu yɔɔ nɛ ɛsɩnɩ abalaa nabɛyɛ nɛ pama-kʋ mbʋ pʋyɔɔ yɔ ɛsɔɔlɩ-ɖʋ siŋŋ. Yehowa tɩŋɩɣnɩ Bibl yɔɔ nɛ ecosuu tɔm kɩcɛyɩtʋ ndʋ ɖɩpɩzɩɣ nɛ ɖɩpɔzɩ ɖa-tɩ yɔ tɩ-yɔɔ. Tɩ-taa natʋyʋ yɔ: Le ɖɩlɩnaa? Wezuu kaɖʋwa lɛ ŋga? Ɛbɛ cee wayɩ kaɣ-ɖʋ kɔnʋʋ? Yehowa sɔɔlaa se e-piya tɩŋa ɩtɩlɩ tɔm ndʋ tɩ-yɔɔ cosuu, pʋyɔɔ eseɣti abalaa nabɛyɛ se pɛɖɛzɩ Bibl kʋnʋmɩŋ sakɩyɛ taa. Sɔnɔ, Bibl kpeekpe yaa kɩ-hɔɔlɩŋ nɩɩyɩ wɛ kʋnʋmɩŋ weyi ɩ-taa yɔ, ɩcɛzɩ 3 000 mbʋ yɔ! Ɛyaa wezuu caɣʋ taa lɛ, Bibl kɛnɩ takayaɣ ŋga pakɩlɩ ɖɛzʋʋ nɛ ŋga pakɩlɩ tayʋʋ yɔ. Ðɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ Bibl yɔɔ ye ɖɩkalɩɣ-kʋ paa evemiye nɖɩ, ɖɩmaɣzɩɣ kɩ-wɩlɩtʋ yɔɔ nɛ ɖɩlakɩ ɖo-ɖoŋ ɖeɖe se ɖɩɖɔ ndʋ ɖɩkpɛlɩkɩɣ yɔ tɩ-yɔɔ yɔ. Pɩtasɩ lɛ, ye ɖɩñakɩ pana se ɖɩwɩlɩ Bibl taa tɔm ɛyaa sakɩyɛ yɔ, pʋbʋ lɛ ɖɩwɩlɩɣ se ɖɩwɛnɩ ɛsɩmɩyɛ Ɛsɔ yɔɔ.—Keɣa 1:1-3; Mat. 28:19, 20. w20.05 24-25 § 15-16

Paaɖʋ nayʋ Yereemii tʋmɩyɛ se esusi tɔm lone nɖɩ ɖɩwɛ kaɖɛ siŋŋ yɔ ɖɩ-taa. Ɛyaa tʋwaɣ-ɩ nɛ pohoŋuu-i “paa ɖooye.” (Yer. 20:8, 9) Piitibi-i yɔɔɔ kpem nɛ halɩ ɛñɩnaɣ se eyele tɔm susuu. Ɛlɛ, etiyele. Ɛbɛ yɔɔ etiyele? “[Yehowa] tɔm” kaawɛ Yereemii taa ɛzɩ miŋ yɔ nɛ ɛɛpɩzɩɣ se esum-tʋ. (Yer. 20:9) Ye ɖɩkpɛlɩkɩɣ Bibl paa ɖooye nɛ ɖɩmaɣzɩɣ tɔm ndʋ ɖɩkpɛlɩkɩɣ yɔ tɩ-yɔɔ siŋŋ yɔ, ɖɩpɩzɩɣ nɛ ɖɩwɛɛ ɛzɩ Yereemii yɔ. Ye ɖɩlabɩ mbʋ yɔ, ɖɩkaɣ hiɣu taa leleŋ tɔm susuu taa nɛ pɩkɩlɩ nɛ ɛyaa sakɩyɛ pɩzɩɣ nɛ pewelisini-ɖʋ. (Yer. 15:16) Pʋyɔɔ lɛ, pitibi-ŋ yɔɔɔ yɔ, tendi Yehowa se ɛsɩnɩ-ŋ. Ɛkaɣ-ŋ sɩnʋʋ nɛ ŋlʋbɩnɩ ñɛ-ɛjandʋ, ña-kɩwɛɛkɩm, yaa ña-kʋdɔŋ taa. Ɛkaɣ-ŋ sɩnʋʋ nɛ ŋwɛɛnɩ lɩmaɣza kɩbana ɛ-sɛtʋ taa wala wɛnʋʋ yɔɔ. Nɛ ɛkaɣ-ŋ sɩnʋʋ nɛ ŋwɛɛnɩ lɩmaɣza kɩbana ñɔ-tɔm susuu yɔɔ. Kɔzɩ kɔzɩ lɛ, tɩmnɩ ña-Caa sɔɔlɩm tʋ nɛ ŋheyi-i ɛzɩma ɖeyi ɖeyi pɩlakɩ-ŋ yɔ. Ɛkaɣ-ŋ sɩnʋʋ nɛ ŋwa mbʋ piyeki nɛ pitiki-ŋ yɔɔɔ yɔ. w20.12 27 § 20-21

Koobiya halɩñɩma nabɛyɛ lɛ, kediɣzisi taa ɖeke pehikiɣ waɖɛ nɛ pa nɛ po-koobiya lalaa pacakɩ. Pʋyɔɔ lɛ, ɖɩsɔɔlaa se ɖɩtɩŋnɩ alɩwaatʋ ndʋ tɩ-yɔɔ nɛ ɖɩmʋ-wɛ camɩyɛ, ɖɩyɔɔdɩnɩ-wɛ nɛ ɖiyele nɛ patɩlɩ se ɖɩmaɣzɩɣ pɔ-yɔɔ. Ɛzɩ Yesu yɔ, ɖɩpɩzɩɣ ɖɩñɩnɩ alɩwaatʋ nɛ ɖa nɛ ɖo-koobiya halɩñɩma ɖɩcakɩ. (Luka 10:38-42) Pɩtɩla, ɖɩpɩzɩɣ nɛ ɖɩyaa-wɛ nɛ ɖa nɛ wɛ ɖɩtɔɔ tɔɔnaɣ yaa ɖɩmʋ helim. Alɩwaatʋ ndʋ ɖɩlakɩ mbʋ yɔ, ɖɩsɔɔlaa se ɖiyele nɛ kɛdaɣ ŋga ɖɩlakɩ yɔ kakpazɩ-ɖʋ ɖoŋ. (Roma 1:11, 12) Pɩwɛɛ se ɛgbɛyɛ taa ɛzʋtʋyaa ɩwɛɛnɩ wɛtʋ ndʋ Yesu kaawɛna yɔ. Ɛɛnawa se ɛɖandʋ caɣʋ pɩzɩɣ nɛ pɩwɛɛ ɛyaa nabɛyɛ kaɖɛ, ɛlɛ ɛwɩlɩ kpayɩ kpayɩ se pɩtɩkɛ nesi ɖɔkʋʋ yaa piya wɛnʋʋ yekina se ɛyʋ ehiɣ taa leleŋ weyi eleɖiɣ yɔ. (Luka 11:27, 28) Ɛlɛ, ye ɛyʋ ɛsɩɣ Yehowa tʋmɩyɛ kajalaɣ ɖeɖe yɔ, ɛwɛɣ taa leleŋ taa paa ɛzɩmtaa. (Mat. 19:12) Kɔzɩ kɔzɩ lɛ, pɩwɛɛ se ɛgbɛyɛ taa ɛzʋtʋyaa ɩkpaɣ Krɩstʋ mba halɩñɩma se pɛkɛ pe-newaa, pɔ-kɔɔnaa nɛ po-ɖoonaa fezuu taa. Pɩwɛɣ ɖeu se ɛzʋtʋyaa ɩkpakɩɣ alɩwaatʋ nɛ pɔyɔɔdʋʋnɩ koobiya halɩñɩma pʋcɔ nɛ kediɣzisi paɣzɩ yaa sɩtɛŋ lɛ. w20.09 21-22 § 7-9

Izrayɛɛlɩ taa lɛ, tɛʋ kajalaɣ ñɩŋgʋ nɩɣ lɛ haɖʋ ɖuu e-ɖomaɣ nɛ ɛkʋŋ tɔɔnaɣ wayɩ wayɩ tɛʋ wayɩ. (Mark. 4:28) Ye ɖɩmaɣzɩɣnɩ haɖʋ suuɖu yɔ, ɖɩkaɣ wɛʋ lɔŋ. Ɛlɛ, pɩtɩla pɩɩwɛɣ kɛlɛʋ. Ɛyaa mantɩtalɩ pilimwaa sɔɔlaa se pa-pana ñaɣʋ ɛlʋlɩ pee kpaagbaa. Ɛlɛ, ye ɖɩsɔɔlaa se tɩŋ ɩpaɣlɩ nɛ ɩlʋlɩ pee yɔ, pɩwɛɛ se ɖɩcɔŋnɩ ɩ-yɔɔ paa ɛzɩmtaa. Pɩwɛɛ se ɖihuyi pɔŋ, ɖɩsɔ, ɖɩkpɛzɩ ñɩtʋ nɛ ɖɩmɩzɩ-ɩ lɩm. Kpɛlɩkɩyaa labʋ tʋmɩyɛ pɔzʋʋ ɖɔɖɔ se ɖiwolo pɩ-yɔɔ nɛ ɖɩñakɩ pana. Pʋcɔ nɛ ɖɩpɩzɩ ɖɩsɩnɩ ɖe-Bibl kpɛlɩkɩyaa nɛ pataaɖʋ tʋkaɣ ɛyaa hɛkʋ taa nɛ pɛwɛɛnɩ ɖɔɖɔ sɔɔlɩm lɛ, pɩkpakɩɣ alɩwaatʋ. Ye ɖɩwɛnɩ suuɖu yɔ, pɩkaɣ-ɖʋ sɩnʋʋ se pitaatibi-ɖʋ yɔɔɔ alɩwaatʋ ndʋ ɖɩkatɩɣ kala yɔ. Alɩwaatʋ ndʋ ɛyaa nabɛyɛ tisiɣ faaa se pewelisini-ɖʋ nɛ pɛkpɛlɩkɩ tɔm yɔ, pɩpɔzʋʋ ɖɔɖɔ se ɖɩwɛɛ suuɖu. Ðɩɩpɩzɩɣ nɛ ɖɩñɩɣ Bibl kpɛlɩkɩyʋ nɔɔyʋ yɔɔ se ɛwɛɛnɩ tisuu. Nabʋyʋ taa, halɩ Yesu tɔmkpɛlɩkɩyaa taanɩɣ ɛ-wɩlɩtʋ taa kpaagbaa. (Yoh. 14:9) Pɩwɛɛ se ɖɩtɔzɩ se ɖɩpɩzɩɣ nɛ ɖiɖuu nɛ ɖɩmɩzɩ lɩm, ɛlɛ Ɛsɔ yekina nɛ pɩpaɣlɩɣ.—1 Kɔr. 3:6. w20.09 11 § 10-11

Ða-tɩŋa payɩ ɖɩsɔɔlaa se ɖe-Bibl kpɛlɩkɩyaa ɩɖɛɛnɩ ɛsɩndaa nɛ pamɩyɩsɩ-wɛ lɩm. Nʋmɔʋ sɔsɔʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ-wɛ yɔ, ŋgʋ lɛ se ɖiseɣti-wɛ se pɔkɔŋ ɛgbɛyɛ taa kediɣzisi. Ðoŋ ɖoŋ lɛ, Bibl kpɛlɩkɩyaa mba powoki kediɣzisi yɔ, pɛɖɛɣnɩ ɛsɩndaa lɛɛ lɛɛ. Wɩlɩyaa nabɛyɛ heyiɣ pe-Bibl kpɛlɩkɩyaa se pɩsa nɛ patɩlɩ Bibl taa tɔm nɛ pɩkpaɖɩ lɛ, pɩpɔzʋʋ se powoki kediɣzisi. Ña nɛ ñe-Bibl kpɛlɩkɩyʋ ɩkalɩ Ebree mba 10:24, 25 nɛ ŋwɩlɩ-ɩ wazasɩ nzɩ ɛkaɣ hiɣu ye ɛkɔŋ kediɣzisi yɔ. Heyi-i nɛ kpekpeka tɔm ndʋ ŋkpɛlɩkɩ kediɣzaɣ nakɛyɛ taa pitileɖita yɔ tɩ-taa natʋyʋ. Ɛnaɣ lɩmaɣza wena ŋwɛnɩ kediɣzaɣ yɔɔ yɔ lɛ, ɛpɩzɩɣ nɛ ɛsɔɔlɩ se ɛkɔɔ. Mbʋ ñe-Bibl kpɛlɩkɩyʋ kaɣ naʋ kediɣzaɣ ŋga ɛcalɩɣ wobu yɔ ka-taa yɔ, pɩkpaɖɩɣ mbʋ payɩ ɛtɛm naʋ Ɛsɔ sɛtʋ agbaa lɛɛna taa yɔ. (1 Kɔr. 14:24, 25) Ɛkaɣ katʋʋ ɛyaa lalaa; nɛ ɛpɩzɩɣ nɛ ɛmaɣzɩnɩ ɛyaa mba pa-kɩɖaŋ kɩbaŋ. Pakaɣ-ɩ sɩnʋʋ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm. w20.10 10-11 § 14-15

Ɛsɔ fezuu kaɣ-ŋ sɩnʋʋ nɛ ŋɖɔ tɔm ndʋ ŋkalɩɣ nɛ ŋkpɛlɩkɩɣ Ɛsɔtɔm taa yɔ tɩ-yɔɔ ñe-wezuu caɣʋ taa. Tɩmɩ ɛzɩ keɣa maɖʋ nɔɔyʋ kaalabʋ yɔ. Ɛtɩmaa nɛ ɛyɔɔdɩ se: “Wɩlɩ-m ña-nʋmɔʋ nɛ mɔnɖɔ siɣsiɣ, ha-m laŋɩyɛ kʋɖʋmɖɩyɛ nɛ maña ña-hɩɖɛ!” (Keɣa 85:11) Ye mbʋ, wolo pɩ-yɔɔ nɛ ŋkalɩɣ nɛ ŋkpɛlɩkɩɣ Bibl nɛ takayɩsɩ lɛɛsɩ nzɩ Yehowa ɛgbɛyɛ lɩzaa yɔ. Toovenim taa lɛ, ña-kaɖʋwa tɩkɛna se ŋwɛɛnɩ lɔŋsɩnɖɛ yem. Ŋsɔɔlaa se ña-taa ɛtɛmnɩ toovenim tɔm nɛ ŋɖɔ tɩ-yɔɔ ñe-wezuu caɣʋ taa. Yehowa fezuu pɩzɩɣ kɩsɩnɩ-ŋ nɛ ŋla mbʋ. Ŋsɔɔlaa ɖɔɖɔ se ŋkpazɩ ɖoŋ ño-koobiya. (Ebr. 10:24, 25) Ɛbɛ yɔɔ? Mbʋ pʋyɔɔ yɔ, pɛkɛ ñɔ-hɔʋ taa ñɩma fezuu taa. Tɩmnɩ Ɛsɔ se ɛha-ŋ e-fezuu kiɖeɖeu nɛ kɩsɩnɩ-ŋ nɛ ŋcosi tɔm ndʋ tɩlɩnɩ ña-laŋɩyɛ taa yɔ kediɣzisi taa, nɛ ŋla ño-ɖoŋ ɖeɖe alɩwaatʋ ndʋ ŋwɛɣnɩ tʋmɩyɛ naɖɩyɛ sɩ-taa yɔ. Ye ŋlakɩ mbʋ yɔ, ŋwɩlɩɣ Yehowa nɛ ɛ-Pɩyalʋ se ŋsɔɔlɩ ‘pe-heŋ.’ Heŋ ɛnɩ ɩmʋ ñɩm pɛ-ɛsɩndaa. (Yoh. 21:15-17) Ye mbʋ, yele nɛ ɖʋtʋ ndʋ Yehowa laba yɔ tɩwazɩ-ŋ nɛ pɩwɩlɩ se ŋwelsiɣni ña-Wɩlɩyʋ sɔsɔ. w20.10 24-25 § 15-17

Alɩwaatʋ natʋyʋ piitibi apostoloowaa yɔɔɔ lɛ, ɛzɩma Yesu laba? Pefezi Yesu nɛ pɩla pazɩ lɛ, eheyi ɛ-wayɩ tɩŋɩyaa nabɛyɛ se: “Sɔɔndʋ ɛtaakpa-mɩ! Iwolo nɛ iheyi mon-koobiya se [pefezi-m].” (Mat. 28:10a) Yesu tɩlɔ lidaʋ ŋgʋ ɛɛwɛnɩ ɛ-apostoloowaa yɔɔ yɔ. Paa paasewa nɛ peyebi-i yɔ, ewobi pɩ-yɔɔ nɛ ɛyaɣ-wɛ se “mon-koobiya.” Ɛzɩ Yehowa yɔ, Yesu naɣaɣ pʋtɔdɩyɛ nɛ ekpeɣu. (2 Aw. 13:23) Mbʋ ɖɔɖɔ ɖɩmaɣzɩɣ tɔm susuu yebiyaa yɔɔ siŋŋ. Pɛkɛ ɖo-koobiya nɛ ɖɩsɔɔlɩ-wɛ! Ðiɖiɣni tɔzʋʋ tʋmɩyɛ sɔsɔɖɛ nɖɩ payɩ koobiya mba paalabɩ Yehowa sɛtʋ taa yɔ ɖɩ-yɔɔ. Mba peyebi tɔm susuu sɔnɔ yɔ, pa-taa nabɛyɛ kaalabɩ Yehowa tʋmɩyɛ nɛ kpekpeka pɩnzɩ sakɩyɛ. (Ebr. 6:10) Pɛtɛɖɩɣ-ɖʋ siŋŋ! (Luka 15:4-7) Ye mbʋ, ɖiseɣti tɔm susuu yebiyaa se pɔkɔɔ kediɣzisi. Nɛ alɩwaatʋ ndʋ tɔm susuu yebiyu nɔɔyʋ kɔŋ Kewiyaɣ Kpaaŋ taa yɔ pɩwɛɛ se ɖacalɩnɩ wobu ɛ-cɔlɔ nɛ ɖɩmʋ-ɩ nɛ taa leleŋ. w20.11 6 § 14-17

Yakubu nɛ Yohanɛɛsɩ po-ɖoo pɔzɩ Yesu se ɛha ɛ-pɩyalaa mbʋ ɛtaawɛɛnɩ waɖɛ se ɛha-wɛ yɔ. Yesu heyi-i kpaagbaa se ɛ-Caa weyi ɛwɛ ɛsɔdaa yɔ, e-ɖeke ɛpɩzɩɣna nɛ ɛlɩzɩ weyi ɛkaɣ caɣʋ Yesu nesi kɩbanzɩ nɛ ɛ-nɩmɩyɛ yɔɔ Kewiyaɣ taa yɔ. (Mat. 20:20-23) Yesu wɩlaa se ɛsɩm e-ɖoŋ kamaɣ. Ɛɛwɛnɩ tɩ luzuu. Wiɖiyi ɛtɩla mbʋ Yehowa tɩha-ɩ waɖɛ se ɛla yɔ. (Yoh. 12:49) Ɛzɩma ɖɩpɩzɩɣ nɛ ɖɩmaɣzɩnɩ Yesu kɩɖaʋ kɩbaŋʋ? Ye ɖɩɖɔŋ lɔŋ weyi sɔnɔ evemiye mayaɣ tasɩɣ-ɖʋ yɔ ɩ-yɔɔ yɔ, ɖɩwɩlɩɣ se ɖɩwɛɛ nɛ ɖɩmaɣzɩɣnɩ Yesu kɩɖaʋ. Peheyiɣ-ɖʋ peeɖe se: “Ɩtaacɛzɩ tɔm ndʋ pamawa yɔ tɩ-yɔɔ.” Pʋyɔɔ lɛ, alɩwaatʋ ndʋ nɔɔyʋ pɔzʋʋ-ɖʋ lɔŋ tasʋʋ yɔ, pɩtɩpɔzɩ kpa se ɖɩñɩɣ ɛ-yɔɔ se etisi ndʋ ɖa-maɣmaɣ ɖɩmaɣzɩɣ yɔ tɩ-yɔɔ, yaa pɩtɩpɔzɩ kpa se ɖɩyɔɔdɩ ndʋ ɖɩmaɣzɩɣ yɔ nɛ ɖɩtɩmaɣzɩ camɩyɛ. Ɛlɛ pɩwɛɛ se ɖɩmaɣzɩ lɔŋ tasʋʋ mbʋ pɩwɛ Bibl nɛ ɖa-takayɩsɩ taa yɔ pɩ-yɔɔ. Ye ɖɩlakɩ mbʋ yɔ, ɖɩwɩlɩɣ se ɖɩsɩm ɖo-ɖoŋ kamaɣ. Ðiluzuu ɖa-tɩ nɛ ɖɩñaŋ kedeŋa kpeekpe Kɩlɩm “paɣtʋ siɣsiɣ ñɩndʋ.”—Natʋ 15:3, 4. w20.08 11-12 § 14-15

Ye ŋmaɣzɩɣ se pɩpɔzʋʋ se ŋtasɩ ña-taabalʋ nɔɔyʋ lɔŋ yɔ, tɔm ndʋ yɔɔ pɩwɛɛ se ŋtaasɔɔ? Pʋcɔ nɛ ŋyɔɔdɩnɩ ña-taabalʋ lɛ, pɩwɛɛ se ŋpɔzɩ ña-tɩ tɔm tʋnɛ: “Mɛwɛɛ nɛ ‘mantadayɩɣ nɛ siɣsiɣ wɛʋ na’?” Ɛyʋ weyi ɛtadayɩɣ nɛ siɣsiɣ wɛʋ yɔ, pɩtɩkɛ Yehowa paɣtʋ yɔɔ ɛtɩŋɩɣna nɛ ɛhʋʋnɩ lalaa tɔm, ɛlɛ ɛ-maɣmaɣ ɛ-ñɩndʋ yɔɔ ɛtɩŋɩɣna nɛ ɛlakɩ mbʋ, nɛ pɩtʋʋ fɛyɩ se ɛfɛyɩnɩ pʋtɔdɩyɛ naʋ siŋŋ. Ye ŋtazɩ ña-taa camɩyɛ nɛ ŋna se pɩcɛyaa se ŋyɔɔdɩnɩ ña-taabalʋ yɔ, heyi-i mbʋ ɖeyi ɖeyi ɛwɛɛkaa yɔ; nɛ ŋtɩŋnɩ tɔm pɔzʋʋ yɔɔ nɛ ŋsɩnɩ-ɩ nɛ ɛna se mbʋ ɛlaba yɔ pɩtɩtʋʋzɩ. Ñaɣ pana nɛ tɔm ndʋ ŋyɔɔdʋʋ yɔ tɩlɩɩnɩ Masɩ taa, nɛ taasɔɔ se pɩtɩkɛ ña-sʋʋtʋ pɩkɛnaa se ŋhʋʋnɩ ña-taabalʋ tɔm ɛlɛ ña-sʋʋtʋ pɩkɛnaa se ŋsɩnɩ-ɩ nɛ ɛna lɩmaɣza wena Yehowa wɛnɩ mbʋ ɛwɛɛ nɛ ɛlakɩ yɔ pɩ-yɔɔ yɔ. (Roma 14:10) Labɩnɩ tʋmɩyɛ lɔŋsɩnɖɛ nɖɩ ɖɩwɛ Ɛsɔtɔm taa yɔ, nɛ alɩwaatʋ ndʋ ŋtasɩɣ nɔɔyʋ lɔŋ yɔ, maɣzɩnɩ Yesu pʋtɔdɩyɛ naʋ. (Adu. 3:5; Mat. 12:20) Ɛbɛ yɔɔ? Mbʋ pʋyɔɔ yɔ wɛtʋ ndʋ ɖɩlɩzɩɣ nɛ ɖɩwɩlɩɣ lalaa yɔ, ndʋ ɖɔɖɔ Yehowa kaɣ lɩzʋʋ nɛ ɛwɩlɩ-ɖʋ.—Yak. 2:13. w20.11 21 § 13

Pɩkɛdɩɣnɩ-ŋ se ɛyaa ɩcɔnɩ ño-tomnaɣ tɔlɩm, ñɛ-ɛsɩndaa wɛtʋ nɛ ña-paɣlɩka nɛ pahʋʋnɩ-ŋ tɔm yaa we? Pɩtʋʋ fɛyɩ se pɩɩkɛdɩɣnɩ-ŋ. Ye mbʋ, pɩhɛzɩɣ ɖa-laŋa siŋŋ se ɖɩtɩlɩ se Yehowa ɛɛcɔŋnɩ mbʋ ɛyaa pɩzɩɣ nɛ pana yɔ nɛ ɛhʋʋnɩ-ɖʋ tɔm! Kɩɖaʋ nakʋyʋ yɔ. Alɩwaatʋ ndʋ Samɩyɛɛlɩ cɔnɩ Yesee pɩyalaa yɔ, ɛtɩna mbʋ Yehowa ñanawa yɔ. Yehowa kaaheyi Samɩyɛɛlɩ se Yesee pɩyalaa taa kʋɖʋm kaɣ pɩsʋʋ Izrayɛɛlɩ wiyaʋ. Ɛlɛ pa-taa weyi? Alɩwaatʋ ndʋ Samɩyɛɛlɩ na Yesee pɩyalʋ sɔsɔ Eliyaabɩ yɔ, ɛyɔɔdaa se: ‘Ndɛŋgbɛzaɣ fɛyɩ se ɛnʋ Yehowa lɩzaa se pataa-ɩ num.’ Eliyaabɩ wɛtʋ kaayeba nɛ Samɩyɛɛlɩ maɣzɩ se ɛnʋ pakaɣ lɩzʋʋ se ɛkɛ wiyaʋ. Ɛlɛ, “[Yehowa] heyi Samɩyɛɛlɩ se: ‘Taacɔnɩ ɛ-ɛsɩndaa nɛ ɛ-ɖaɣlɩkɩŋ, mbʋ yɔ mɔlɔ-ɩ.’” Ɛbɛ pɩkpɛlɩkɩɣ-ɖʋ? Yehowa tasɩ yɔɔdʋʋ se: “Ɛyʋ cɔŋnɩ mbʋ pɩnaɣ ɛsɩndaa yem yɔ, ɛlɛ [Yehowa] cɔŋnɩ laŋɩyɛ taa na. (1 Sam. 16:1, 6, 7) Pɩwɛɣ ɖeu se ɖɩmaɣzɩnɩ Yehowa, wɛtʋ ndʋ ɖɩwɛnɩ lalaa yɔɔ yɔ pɩ-hɔɔlʋʋ taa. w20.04 14 § 1; 15 § 3

Yesu wokaɣ Galilee lɛ, ɛtɩŋnɩ hayɩm nabʋyʋ taa; pɩtɩla orjɩ ŋgʋ kɩtɩtɩɩpɩta yɔ, kɩ-hayɩm taa ɛtɩŋnaa. (Yoh. 4:3-6) Pɩkazɩ fenasɩ naanza mbʋ yɔ pʋcɔ nɛ kɩtalɩ kʋm. Pɩtɩla pɩɖɩɣzɩ ɛyaa alɩwaatʋ ndʋ Yesu yɔɔdaa se: “Ɩkpazɩ mɩ-ɛsa nɛ ɩcɔna hayɩm, tɔɔnaɣ pɩwa se pakʋm-kɛ” yɔ. (Yoh. 4:35, 36) Suwe ɛñɩnaɣ yɔɔdʋʋ? Pɩtɩla Yesu ñɩnaɣ yɔɔdʋʋ ɛyaa kpeɣluu tɔm na, ɛlɛ pɩtɩkɛ tɔɔnaɣ kʋmtʋ tɔm. Na mbʋ pɩlabɩ pʋwayɩ kpaagbaa yɔ. Paa Yuuda mba ɩpaɖaɣ Samaarii mba yɔ, Yesu susi Samaarii halʋ nɔɔyʋ tɔm nɛ ɛlɛ welisi! Nɛ alɩwaatʋ ndʋ Yesu yɔɔdaɣ se “tɔɔnaɣ pɩwa se pakʋm-kɛ” yɔ, Samaarii ɛyaa samaɣ nakɛyɛ kɔŋaɣ se kewelisini Yesu nɛ pɩkɩlɩ. Samaɣ ŋga kaanɩ Yesu yɔɔ tɔm Samaarii halʋ ɛnʋ ɛ-cɔlɔ. (Yoh. 4:9, 39-42) Bibl taa tazɩyʋ nɔɔyʋ yɔɔdɩ kɛdaɣ ŋga kɔ-yɔɔ se: “Ɛzɩma ɛyaa kɔm lɛɛ lɛɛ se pakatɩ Yesu nɛ pewelisini-i yɔ, pɩwɩlɩɣ se paawɛ ɛzɩ tɔɔnaɣ ŋga katalaa se pakʋm-kɛ yɔ.” w20.04 8 § 1-2

Ðe-kediɣzisi sɩɣnɩ-ɖʋ se ɖɩkɛ tɔm susuyaa nɛ tɔm wɩlɩyaa kɩbama nɛ pɩkpaɖɩ. Sɩ-taa ɖɩkpɛlɩkɩɣ ɛzɩma ɖɩlabɩnɩ wondu ndɩ ndɩ ndʋ tɩwɛ ɖɔ-Tɔm wɩlʋʋ wondu taa yɔ tʋmɩyɛ camɩyɛ yɔ. Pʋyɔɔ lɛ, ñɔɔzɩ ɛgbɛyɛ taa kediɣzisi camɩyɛ pʋcɔ nɛ ŋwolo sɩ-taa. Paalakɩ kediɣzaɣ lɛ, welisi camɩyɛ. Kediɣzaɣ tɛŋ lɛ, labɩnɩ tʋmɩyɛ falɩsʋʋ mbʋ ŋmʋwa yɔ. Ye ŋlakɩ mbʋ yɔ, ŋkaɣ pɩsʋʋ “Krɩstʋ Yesu sɔɔja kɩbanʋ.” (2 Tim. 2:3) Ɛsɔ tiyiyaa miiliyaarɩwaa sakɩyɛ mba pɛwɛ ɖoŋ yɔ, pasɩɣnɩ-ɖʋ ɖɔɖɔ. Maɣzɩ mbʋ tiyiyu kʋɖʋm ɖeke pɩzɩɣ nɛ ɛla yɔ pɩ-yɔɔ nɛ ŋna! (Iza. 37:36) Lɛɛlɛɛyɔ maɣzɩ mbʋ tiyiyaa canɖaʋ sɔsɔʋ nakʋyʋ pɩzɩɣ nɛ kɩla yɔ pɩ-yɔɔ nɛ ŋna. Ɛyʋ nɔɔyʋ yaa eleeu nɔɔyʋ ɛɛpɩzɩɣ nɛ ɛwa Yehowa sɔɔjanaa mba pɛwɛ ɖoŋ yɔ. Yehowa kpaɖɩnɩ ɖoŋ kedeŋa kpeekpe yɔɔ. Pʋyɔɔ lɛ, ye ɛwɛ ɖɔ-hɔɔlʋʋ yɔɔ yɔ, ɖɩkaɣ wɛʋ ɖoŋ paa ɛzɩmtaa nɛ pɩkpaɖɩ mba pakaɖɩɣnɩ-ɖʋ yɔ paa pɔɖɔ ɛzɩma yɔ. (Th. 6:16) Ða-taa pɩzɩɣ nɛ pɩtɛ se tɔm ndʋ tɩkɛ toovenim! Alɩwaatʋ ndʋ ña-tʋmɩyɛ taa tʋ nɔɔyʋ, ño-sukuli taa tʋ nɔɔyʋ yaa ñɔ-hɔʋ taa tʋ weyi ɛtɩkɛ Aseɣɖe Tʋ yɔ, ɛyɔɔdʋʋ natʋyʋ yaa ɛlakɩ nabʋyʋ nɛ pitibi-ŋ yɔɔɔ yɔ, maɣzɩ tɔm ndʋ tɩ-yɔɔ. Taasɔɔ se pɩtɩkɛ ñe-ɖeke ŋwɛna nɛ ŋlakɩ fezuu taa you ŋgʋ. Ŋwɛɛ nɛ ŋɖɔŋ nʋmɔʋ ŋgʋ Yehowa wɩlɩɣ-ŋ yɔ kɩ-taa. w21.03 29 § 13-14

Pɩtɩla tɔm ndʋ tɩwɛ Izaayii 22:13 taa yɔ apostoloo Pɔɔlɩ labɩnɩ tʋmɩyɛ, nɛ tɔm ndʋ titukuuni wɛtʋ ndʋ Izrayɛɛlɩ piya kaawɛna yɔ. Mbʋ ɛzɩ Izrayɛɛlɩ piya kaañɔnɩ Ɛsɔ lɛ, sɩɩkam sɩ-lɩmaɣza leleŋ nɩʋ yɔɔ. Toovenim taa lɛ, Izrayɛɛlɩ piya nzɩ sɩmaɣzaɣ se pɩwɛɛ se sɩnɩɩ leleŋ si-wezuu caɣʋ taa lɛɛlɛɛyɔ mbʋ pʋyɔɔ yɔ, si-wezuu pɩzɩɣ nɛ kɩsɩɩ tɩnaɣ paa alɩwaatʋ ndʋ tɩ-yɔɔ. Halɩ ɛyaa sakɩyɛ wɛnɩ lɩmaɣza ana sɔnɔ ɖɔɖɔ. Ðɩnawa se Yehowa kaɣ fezuu sɩɖaa nɛ pʋyɔɔ lɛ, pɩwɛɛ se tɔm ndʋ tɩwɛɛnɩ ɖoŋ ɛyaa mba ɖɩlɩzɩɣ se pɛkɛ ɖa-taabalaa yɔ pɩ-yɔɔ. Pɩɩcɛyaa se Kɔrɛntɩ koobiya ɩkpa pa-tɩ nɛ pataaɖʋ taabalɩyɛ nɛ ɛyaa mba pataawɛɛnɩ tisuu sɩɖaa femtu yɔɔ yɔ. Pɩkpɛlɩkɩɣ-ɖʋ lɔŋ sɔnɔ ɖɔɖɔ. Ɛnɩ yɔ: Pɩwɛɛ se ɖɩkpa ɖa-tɩ nɛ taabalaa mba pamaɣzɩɣ leleŋ nɩʋ ɖeke yɔɔ nɛ pa-paa fɛyɩnɩ mbʋ pɩkaɣ labʋ cee wayɩ yɔ. Ye ɖɩkpakɩɣ alɩwaatʋ nɛ ɖa nɛ wɛ ɖɩcakɩ yɔ, pakaɣ wɛnʋʋ ɖoŋ kɩdɛkɛdɩŋ ɖɔ-yɔɔ. Ye toovenim Krɩstʋ tʋ nɔɔyʋ ɛkpakɩɣ alɩwaatʋ nɛ ɛ nɛ ɛyaa mba pacakɩ yɔ, ɛpɩzɩɣ nɛ elesi wɛtʋ kɩbandʋ ndʋ ɛwɛna yɔ. Halɩ ɛyaa mba, papɩzɩɣ potuyi-i nɛ ɛla mbʋ Ɛsɔ paɖɩɣ yɔ. Pʋyɔɔ Pɔɔlɩ seɣti-ɖʋ se: “Ife mɩ-lɩmaɣza taa ɛzɩ siɣsiɣ wɛtʋ pɔzʋʋ yɔ nɛ itaayele nɛ kɩwɛɛkɩm labʋ malɩnɩ-mɩ.”—1 Kɔr. 15:33, 34. w20.12 9 § 3, 5-6

Yehowa labɩ ɛ-hɔʋ ŋgʋ kɩwɛ ɛsɔdaa nɛ tataa yɔ kɩ-taa ɖʋtʋ natʋyʋ. Nɛ ɖʋtʋ ndʋ tɩ-tɔm mayaɣ kanɛ kɔyɔɔdʋʋ. Yehowa kɛnɩ “ñʋʋdʋ” nɛ pʋyɔɔ lɛ, ɛwɛnɩ ɖoŋ pɩtɩŋa pɩ-yɔɔ. Ɛtɩŋnɩ ɖʋtʋ ndʋ ɛlaba se nabɛyɛ ɩkɛ ñʋndɩnaa yɔ tɩ-yɔɔ nɛ ɛha-wɛ ɖoŋ nɩɩyɩ lalaa yɔɔ; ɛlɛ pakaɣ-ɩ labʋ akɔnta ɛzɩma palakɩnɩ tʋmɩyɛ ɖoŋ ɛnɩ yɔ pɩ-yɔɔ. (Roma 14:10; Efɛz. 3:14, 15) Yehowa ha Yesu ɖoŋ ɛgbɛyɛ yɔɔ, ɛlɛ ɛzɩma Yesu lakɩnɩ tʋmɩyɛ ɖoŋ ɛnɩ ɖɔ-yɔɔ yɔ, ɛkaɣ Yehowa labʋ akɔnta pɩ-yɔɔ. (1 Kɔr. 15:27) Yehowa ha ɖɔɖɔ walʋ ɖoŋ ɛ-halʋ nɛ e-piya pɔ-yɔɔ. Ɛbɛ pɩzɩɣ pɩsɩnɩ-ɩ nɛ ɛkɛ hɔʋ ñʋʋdʋ kɩbanʋ? Kajalaɣ lɛ, pɩwɛɛ se ɛtɩlɩ mbʋ Yehowa sɔɔlaa se ɛla yɔ. Pɩwɛɛ ɖɔɖɔ se ɛtɩlɩ mbʋ pʋyɔɔ Yehowa labɩ ɖʋtʋ se ɛyaa nabɛyɛ ɩkɛnɩ ñʋndɩnaa yɔ; nɛ kɔzɩ kɔzɩ ɛzɩma ɛpɩzɩɣ nɛ ɛmaɣzɩnɩ Yehowa nɛ Yesu yɔ. Ɛbɛ yɔɔ pɩcɛyaa se abalʋ ɛtɩlɩ pɩtɩŋa payɩ mbʋ yɔ? Pɩcɛyaa se ɛtɩlɩ tɔm ndʋ mbʋ pʋyɔɔ yɔ, Yehowa ha hɔŋ ñʋndɩnaa ɖoŋ nɩɩyɩ nɛ ɛsɔɔlaa se palabɩnɩ-ɩ tʋmɩyɛ camɩyɛ.—Luka 12:48b. w21.02 2 § 1-3

Pɩwɛɣ ɖeu se ɖɩmaɣzɩnɩ Yehowa nɛ ɖɩlɩzɩ se ɖɩsɔʋ tɔm natʋyʋ yɔɔ. Kɩɖaʋ nakʋyʋ yɔ: Yehowa wɛnɩ maɣzɩm mbʋ pɩtalɩ pilim yɔ, ɛlɛ ye ɖikpiɖaa yɔ, ɛlɩzɩɣ se ekpeɣu-ɖʋ nɛ ɛsɔɔ kɩwɛɛkɩm mbʋ ɖɩlakɩ yɔ pɩ-yɔɔ. (Keɣa 24:7; 129:3, 4) Nɛ ɛsɔɔlaa se ɖɩla lalaa mbʋ ɖɔɖɔ alɩwaatʋ ndʋ palakɩ nabʋyʋ nɛ pɩwɩzɩ-ɖʋ nɛ pɔpɔzɩ kpaɣʋ nɛ kpeɣu yɔ. (Mat. 6:14; Luka 17:3, 4) Ye ɖɩlakɩnɩ ɖa-fɩtɩyɩm tʋmɩyɛ se ɖɩɖʋnɩ hɩɖɛ Weyi ɛha-ɖʋ pʋ yɔ, ɖɩwɩlɩɣ se ɖɩwɛnɩ ɛsɩmɩyɛ kʋjɔʋ kɩbaŋʋ ŋgʋ kɩ-yɔɔ. Nabɛyɛ lɩzɩɣ se palakɩnɩ tʋmɩyɛ pa-fɩtɩyɩm nɛ pa-maɣmaɣ palɩzɩ mbʋ pɩkɛ kɩbam nɛ mbʋ pɩkɛ kɩdɛkɛdɩm yɔ. Ɛlɛ Yehowa lɩzɩnɩ-ɖʋ nɛ pʋyɔɔ lɛ, pʋmʋnaa se ɖitisi se ɛ-paɣtʋ kpaɖɩ ɖeu paɣtʋ ndʋ payɩ ɖɩpɩzɩɣ nɛ ɖɩɖʋ ɖa-tɩ yɔ. (Roma 12:1, 2) Alɩwaatʋ ndʋ ɖɩɖɔŋ ɛ-paɣtʋ yɔɔ yɔ, ɖihikiɣ laŋhɛzɩyɛ ɖe-wezuu caɣʋ taa. (Iza. 48:18) Nɛ ɖɩtɩlɩɣ mbʋ Yehowa sɔɔlaa se ɖɩla alɩwaatʋ ndʋ ɖɩwɛ wezuu yɔ, nɛ pɩɖʋʋ hɩɖɛ ɖa-Lɩzɩyʋ nɛ ɖa-Caa nɛ pɩhaɣ-ɩ taa leleŋ.—Adu. 27:11. w20.05 23-24 § 13-14

Ɛzɩma ɖɩpɩzɩɣ ɖɩla nɛ ɖɩwɛɛnɩ sɔɔlɩm sɔsɔm ɖo-koobiya yɔɔ sɔnɔ? Ye ɖɩñaɣ pana nɛ ɖɩtɩlɩ ɖo-koobiya camɩyɛ yɔ, pɩwɛɣ-ɖʋ kɛlɛʋ se ɖɩnɩɩ pɔ-tɔm taa nɛ ɖɩwɩlɩ-wɛ sɔɔlɩm sɔsɔm. Ða nɛ wɛ ɖɩpɩzɩɣ nɛ ɖɩɖʋ taabalɩyɛ, paa pakɩlɩ-ɖʋ pɩnzɩ yaa ɖɩkɩlɩ-wɛ, yaa ɖa nɛ wɛ ɖɩtɩkaa sɔnzɩ yɔ. Taasɔɔ se Yonataanɩ kaakɩlɩ Daviid nɛ pɩnzɩ 30 mbʋ yɔ, paa mbʋ yɔ, ɛ nɛ ɩ paɖʋ taabalɩyɛ nɛ ɖɩcɛyɩsɩ siŋŋ. Nɔɔyʋ wɛ ñɛ-ɛgbɛyɛ taa nɛ ɛkɩlɩ-ŋ pɩnzɩ yaa ŋkɩlɩ-ɩ nɛ ña nɛ ɩ ɩpɩzɩɣ nɛ ɩɖʋ taabalɩyɛ na? Ye ŋlakɩ mbʋ yɔ, ŋwɛɛ nɛ ŋwɩlɩɣ se “[ŋsɔɔlɩ] ɛjaɖɛ kpeekpe yɔɔ koobiya.” (1 Pɩy. 2:17) Ye pɔtɔm se ɖɩwɛɛnɩ sɔɔlɩm sɔsɔm ɖo-koobiya yɔɔ yɔ, ɛzɩ pɩwɩlɩɣ se ɖa nɛ paa ɛgbɛyɛ taa tʋ weyi lɛ ɖa-taabalɩyɛ kaɣ cɛyɩsʋʋ siŋŋ na? Aayɩ, pɩɩpɩzɩɣ nɛ pɩla mbʋ. Ye ɖa nɛ ɛyaa nabɛyɛ ɖa-taabalɩyɛ ɛcɛyɩsaa nɛ pɩkɩlɩ ɛyaa lalaa mbʋ pʋyɔɔ yɔ, mbʋ pɩkɛdɩɣnɩ-wɛ yɔ pɩkɛdɩɣnɩ ɖa ɖɔɖɔ yɔ, pɩtɩwɩlɩ se kokoko lɛ pɩwɛɛkaa. Yesu kaaya ɛ-apostoloowaa tɩŋa se “taabalaa,” ɛlɛ ɛ nɛ Yohanɛɛsɩ pa-taabalɩyɛ kaacɛyɩsɩ siŋŋ nɛ pɩkɩlɩ. (Yoh. 13:23; 15:15; 20:2) Paa mbʋ yɔ, Yesu taalakɩ Yohanɛɛsɩ camɩyɛ nɛ pɩkɩlɩɣ lalaa.—Mark. 10:35-40. w21.01 23 § 12-13

Ɛzɩma apostoloo Pɔɔlɩ kaasusi tɔm sɩɩnaa layaa mba paawɛ Atɛɛnɩ yɔ, pɩwɛ ndɩ nɛ ɛzɩma eesusi tɔm Yuuda ñɩma mba paawɛ sinaagɔɔgɩ taa yɔ. Ɛcɔnɩ mbʋ pɩcɔ-ɩ nɛ pɩta yɔ camɩyɛ nɛ ɛyʋsɩ sɔnzɩ nzɩ ɛyaa mba palakɩ yɔ. (Tʋma 17:23) Pʋwayɩ lɛ, Pɔɔlɩ heyi-wɛ toovenim tɔm ndʋ tɩwɛ Masɩ taa yɔ; pɩtɩla ɛpaɣzɩnɩ mbʋ petisiɣ pɩ-yɔɔ yɔ. Bibl taa tazɩyʋ nɔɔyʋ yɔɔdaa se: Ye mbʋ, Pɔɔlɩ kaasɔɔlɩ faaa se ɛlɛɣzɩ ɛ-tɔm nɛ tɩmʋnɩ pɛ-wɛtʋ. Eheyi Atɛɛnɩ mba se tɔm ndʋ esusuu yɔ, tɩlɩnɩ ‘Ɛsɔ weyi paasɩŋɩ-ɩ,’ nɛ pañakɩ pana se pɛsɛɛ-ɩ yɔ ɛ-cɔlɔ. Paa Masɩ taa tɔm ɛtaamalɩnɩ sɩɩnaa layaa yɔ, Pɔɔlɩ tɩmaɣzɩ se paakaɣ pɩsʋʋ Krɩstʋ ñɩma kpa. Ɛlɛ, ɛkpaɣ-wɛ ɛzɩ tɔɔnaɣ ŋga katalɩ kʋm yɔ, nɛ ɛlɛɣzɩ ɛzɩma esusi tɔm kɩbandʋ yɔ, nɛ tɩmʋnɩ pɛ-wɛtʋ. Ɛzɩ Pɔɔlɩ yɔ, kɛ weyi ɛcɔŋnɩ camɩyɛ yɔ. Cɔna nɛ ŋna mbʋ pɩpɩzɩɣ nɛ pɩsɩnɩ-ŋ nɛ ŋtɩlɩ tisuu mbʋ ño-kooka taa mba wɛna yɔ. Ɛzɩma ɖɩɣdʋ ñɔɔzɩ ɛ-ɖɩɣa? Ɛ-hɩɖɛ, ɛzɩma esu wondu yɔ, ɛzɩma ɛñɔɔzɩ ɛ-tɩ yaa ɛzɩma ɛyɔɔdʋʋ yɔ, pɩwɩlɩɣ Ɛsɔ sɛtʋ ɛgbɛyɛ nɖɩ ɖɩ-taa ɛwɛɛ yɔ? w20.04 9-10 § 7-8