Jó
17 “Nha spritu sta kebradu i nhas dia sta ta kaba.
Sipultura sta spera-m.
2 Kes algen ki ta faze trósa sta serka-m,
I nhas odju ten ki odja* ses konportamentu rebéldi.
3 Favor, seta nha garantia i guarda-l ku bo.
Kenha más ki ta pertaba nha mô i ta sérba nha fiador?
4 Pamodi bu fitxa-s menti pa es ka ten intendimentu.
É pur isu ki bu ka ta engrandese-s.
5 Ten algen ki ta oferese pa dividi kuzê ki el ten ku ses amigu,
Timenti ses própi fidju ta pasa fómi.
6 El ta pô-m ta fazedu trósa* na meiu di povu.
Pur isu, es ta kuspi na nha róstu.
7 Nhas odju dja bira fraku pamodi frónta,
Nha brasu ku nha pé sta sen forsa.
8 Kes algen rétu ta fika spantadu óras ki es ta odja kel-li,
I kel algen inosenti ta fika perturbadu pamodi kes algen ki ka ten ruspetu pa Deus.*
9 Algen justu ta kontinua ta faze kel ki é dretu,
Algen inosenti* ta bira kada bês más fórti.
10 Enbóra nhos ta kontinua ta ataka-m ku nhos argumentu,
N ka atxa ningen ki ten sabedoria na nhos meiu.
11 Nhas dia sta ta txiga fin.
Nhas planu, kes dizeju di korason, kabadu ku es.
12 Es ta troka noti pa dia,
Es ta fla: ‘Lus debe sta pértu pamodi sta sukuru.’
13 Si N spera, Sipultura* ta ben ser nha kaza.
N ta ben stende nha kama na sukuru.
14 N ta ben fla kóba:* ‘Bo é nha pai!’
I N ta ben fla kes bitxu: ‘Nhos é nha mai i nhas irman!’
15 Nton, undi ki nha speransa sta?
Ken ki ta pode odja speransa pa mi?
16 Nha speransa ta ben dixi ti kes porton trankadu di Sipultura,
Óras ki nos tudu dixi pa baxu di txon.”