Jó

28 “Ten un lugar undi pesoas ta tra prata

I un lugar undi ki es ta tra oru pa es refina.

 2 Es ta tra féru di txon,

I es ta tra kóbri* di rótxa.

 3 Ómis ta traze lus pa lugar sukuru,

Es ta bai pa kes lugar más sukuru di téra,

Pa djobe kes metal* di valor.

 4 Es ta koba braku fundu na mina, lonji di undi ki algen ta vive,

Na kes lugar ki pesoas dja skese di es, lonji di undi pesoas ta pasa.

Alguns ómi ta dixi na kes braku na un kórda, i es ta trabadja prindadu.

 5 Riba di téra ta da kumida,

Má baxu txon ta parse sima si rabidadu ku lumi.*

 6 La, bu ta atxa safira na meiu di pédra.

I na meiu di puera ten oru.

 7 Ágia ka sabe modi ki el ta txiga na kes lugar.

I odju di milhafri-prétu nunka ka odja kes lugar li.

 8 Ninhun animal brabu ka ta poi pé na kes lugar,

I lion novu ka ta sta pa la.

 9 Ku ses mô, pesoas ta koba kes rótxa duru,

Es ta distrui kes montanha.

10 Es ta koba kanal di agu na rótxa,

I ses odju ta odja tudu kes pédra di valor.

11 Es ta blokia kes nasenti di riu,

I es ta traze kes tizoru ki staba sukundidu pa lus.

12 Má undi ki nu pode atxa sabedoria?

I undi ki fonti di intendimentu sta?

13 Ningen ka ta rekonhese valor di sabedoria,

I el ka ta atxadu na ninhun lugar na mundu.

15 Sabedoria ka pode kunpradu ku oru puru,

Nen ka pode pezadu prata pa troka ku el.

16 El ka pode kunpradu ku oru di Ofir,

Nen ku óniks ki ten txeu valor, nen ku safira.

17 Oru i vidru ka pode konparadu ku el.

Nen el ka pode trokadu pa un vazu di oru finu.*

18 Koral ku kristal ka ta txiga nen pértu di el,

Pamodi un bólsa xeiu di sabedoria ta bale más di ki un bólsa xeiu di pérula.

19 Sabedoria ka pode konparadu ku topáziu di Kuxe.

El ka pode kunpradu nen mésmu ku oru puru.

20 Má di undi ki sabedoria ta ben?

I undi ki fonti di intendimentu sta?

21 Sabedoria sukundidu di odju di tudu algen bibu

I el sukundidu di kes pasu di séu.

22 Distruison i mórti fla:

‘Nos obidu sô obi ta papiadu di el.’

23 Deus sabe na undi ki bu pode atxa-l.

É sô el ki sabe na undi ki el ta mora,

24 Pamodi el ta odja ti kes párti más lonji di téra,

El ta odja tudu kuza ki sta dibaxu di séu.

25 Kantu ki el da béntu forsa*

I el midi kes agu,

26 Kantu ki el poi un lei pa txuba

I un kaminhu pa núven sukuru di tenporal,

27 Nton, el odja sabedoria na ses óbra i el splika-l.

El poi sabedoria ta fika firmi i el testa se valor.

‘Odja! Ten grandi ruspetu pa Jeová, kel-li ki é sabedoria.

I disvia di mal é intendimentu.’”