Jó
30 “Gósi, kes ómi más jóven di ki mi
Ta ri di mi.
N ka ta dexaba ses pai
Nen txigaba pértu di kes katxor ki ta guardaba nha ribanhu.
2 Forsa di ses mô sirbi-m pa algun kuza?
Ses forsa dizaparse.
3 Es sta kansadu dimás pamodi mizéria i fómi.
Es ta kume kel ki es atxa na un téra séku,
Ki dja staba distruídu i bandonadu.
4 Es ta rinka folha salgadu di kes arvi,
I raís margós di kes arvi* pa es kume.
5 Es ta tradu di sidadi.
Pesoas ta grita ku es sima si es é ladron.
6 Es ta mora na kes ladera di kes vali,*
Na kes braku na txon i na rótxa.
7 Es ta grita na meiu di kes arvi
I es ta djunta na meiu di kes padja.*
8 Sima fidju di kes ki ka ten juís i di kes ki ka ten nómi,
Es koredu ku el* di téra.
9 Má gósi, es ta faze-m trósa ti mésmu na ses múzika.
N bira un motivu di trósa* pa es.
10 Es ta odia-m i es ta fika lonji di mi.
Es ka ten medu di kuspi-m na róstu.
11 Pamodi Deus pô-m ta bira fraku i el umilha-m.
Es ka ten medu di disruspeta-m na nha róstu.
12 Na nha direita, es ta labanta kóntra mi sima un grupu pa ataka-m.
Es ta pô-m ta fuji
I es ta blokia nha kaminhu pa kaba ku mi.
14 É sima si es ta entra pa un braku grandi di un muralha i es ta ataka-m.
Es ta ben pa es prujudika-m inda más.
15 N sta ta vive ku txeu medu.
Pesoas ka sta ruspeta-m más,
I nha salvason dizaparse sima un núven.
16 Gósi nha vida* sta ta kaba.
Kes dia di frónta sta ta toma kónta di mi.
17 Di noti, dór ta trabesa nhas osu.*
Kel dór ki sta ta kaba ku mi nunka ka ta pasa.
18 Nha ropa sta ta puxadu ku txeu forsa,*
El sta ta sufoka-m sima un góla pertadu.
19 Deus bota-m na lama,
Dja N bira téra i sinza.
20 N ta grita pa bu djuda-m, má bu ka ta responde-m.
N ta fika di pé, má bu ta fika sô ta djobe-m.
21 Bu bira kóntra mi di un manera kruel
I bu ta ataka-m ku tudu forsa di bu mô.
22 Bu ta labanta-m i bu ta karega-m ku béntu.
Dipôs, bu ta bota-m di un ladu pa kel otu na tenporal.*
23 N sabe ma bu ta ben intrega-m na mô di mórti,
Pa kel kaza undi tudu algen bibu ta ba inkontra.
24 Má ningen ka ta atakaba un ómi ki sta dizanparadu,
Óras ki el grita ta pidi ajuda duránti se disgrasa.
25 Pur akazu, N ka txora pa kes algen ki pasa pa ténpu difísil?*
N ka xinti péna di algen póbri?
26 Enbóra N staba ta spera kuza dretu, txiga kuza mariadu.
N staba ta spera lus, má txiga sukuru.
27 Fadiga déntu di mi ka para,
N pasa pa dias di frónta.
28 N sta ta anda tristi, ka ten lus di sol.
N ta labanta na meiu di un monti di algen, i N ta grita ta pidi ajuda.
29 N bira irmon di kes katxor brabu*
I kunpanheru di kes fidju di avestrus.
30 Nha péli fika sukuru i el kai,
Nhas osu kema pamodi kalor.*
31 Nha arpa ta uzadu sô pa múzika tristi,
I nha flauta* pa kunpanha algen ki sta ta txora.