Salmu
105 Nhos agradese Jeová, nhos invoka se nómi,
I nhos dexa tudu povu sabe kes kuza ki el faze!
3 Nhos pâpia ku orgulhu di Se nómi santu.
Pa korason di kes ki ta djobe Jeová fika kontenti.
4 Nhos buska Jeová i se forsa.
Sénpri nhos djobe se ajuda.*
5 Nhos lenbra di kes kuza grandi ki el faze,
Di kes milagri i di kes julgamentu ki el faze,
6 Anhos ki é disendenti* di Abraon, sérvu di Deus,
Nhos ki é fidjus di Jakó, kel povu ki El skodje.
7 El é Jeová, nos Deus.
Ses julgamentu ta odjadu na téra interu.
8 El ta lenbra di se kontratu pa tudu ténpu,
Di kel promésa ki el faze,* ti pa mil jerason,
9 Di kel kontratu ki el faze ku Abraon,
Di kel juramentu ki el faze pa Izaki,
10 Kel juramentu ki el konfirma Jakó através di un lei,
Di kel kontratu ki el faze ku Israel pa tudu ténpu,
11 Kantu el fla: “N ta da nhos téra di Kanan
Pa ser nhos eransa.”
12 Kel-li kontise kantu es éra poku,
Kantu es éra poku dimás, i es éra stranjeru na kel téra la.
13 Es anda di un nason pa kel otu,
I di un reinu pa kel otu reinu.
14 El ka dexa ninhun ómi maltrata-s,
Má, pamodi es, el koriji* kes rei,
15 Kantu el fla: “Ka nhos toka na kes ki N skodje,
Ka nhos faze nhas proféta nada mariadu.”
16 El manda ben un fómi na país.
El kaba ku kes kumida ki es tinha guardadu.*
17 El manda Juzé pa bai ses dianti,
Un ómi ki bendedu pa ser skravu.
18 Es prende se pé ku korenti,
I es pô-l féru na piskôs.*
19 Ti kel ténpu ki se palavra kunpri,
É palavra di Jeová ki refina-l.
20 Rei manda liberta-l,
Kel governanti di povu manda tra-l di kadia.
21 Rei poi Juzé ta ser xéfi di se palásiu,
Enkaregadu di tudu kes kuza ki el tinha,
22 Pa el pode tinha autoridadi riba di* tudu kes prínsipi sima el kreba,
I pa el inxinaba kes ansion di rei ten más sabedoria.
23 Dipôs, Israel entra na Ijitu,
Jakó vive sima stranjeru na téra di Kan.
24 Deus poi se povu ta bira txeu.
El pô-s ta bira más fórti di ki ses inimigu,
25 I el dexa korason di kes algen di Ijitu ôdia se povu,
I faze planu kóntra ses sérvu.
26 El manda se sérvu Muizés,
I Aron, ki el skodjeba pa bai ku el.
27 El uza-s pa es faze milagri na meiu di povu,
Es faze milagri na téra di Kan.
28 Deus manda sukuru i kel téra fika sukuru.
Es ka rabela kóntra se palavra.
29 El poi ses agu ta bira sangi
I el mata ses pexi.
30 Ses téra fika xeiu di sapu,
Ti na kes kuartu di rei.
31 El manda móska grandi i moskitu
Pa invadi tudu ses tiritóriu.
32 Na lugar di txuba el manda granizu
I relánpagu* riba di ses téra.
33 El kaba ku ses plantason di uva i ses pé di figu
I el distrui tudu arvi na ses país.
34 El manda gafanhotu pa invadi país,
Un monti gafanhotu ki ka ta daba pa konta.
35 Es kume tudu plantason di kel país,
I es kaba ku tudu kuza ki téra ta daba.
36 Nton, Deus mata tudu kes primeru fidju di ses país,
Kes primeru fidju ki nase.
37 El poi povu ta sai ku prata i oru,
I ningen di ses tribu ka fika fraku.*
38 Kes algen di Ijitu fika kontenti kantu es sai,
Pamodi medu di Israel toma kónta di es.
39 Deus manda un núven pa protejeba se povu
I di noti, el ta limiaba es ku lumi.
40 Kantu es pidi karni, el manda-s kudurnis.
El kontinua ta da-s pon di séu ti ki es fika fartu.
41 El abri un rótxa i sai agu,
Agu kóre na dizértu sima un riu.
42 Pamodi el lenbra di kel promésa sagradu ki el fazeba se sérvu Abraon.
43 Nton, el poi se povu ta sai di país txeu kontenti,
Kes algen ki el skodje staba ta grita di alegria.
44 El da-s kes téra di kes nason,
Es erda kes kuza ki kes otu povu trabadja duru pa ten,
45 Asi pa es kunpriba ses lei
I pa es obiba ku ses mandamentu.
Nhos lova Jeová!*