Salmu
116 N ta ama Jeová,
Pamodi el ta obi nha vós* óras ki N ta inplora-l pa el djuda-m.
2 Pamodi el ta inbaxa se obidu pa obi-m,
Pur isu, timenti N sta bibu N ta ben invoka-l.
3 Kes kórda di mórti serka-m.
N xinti ma N staba kuazi ta dixi pa Sipultura.*
Frónta i tristéza toma kónta di mi.
4 Má N invoka nómi di Jeová i N fla:
“Ó Jeová, salva-m!”*
5 Jeová ten konpaxon i el é justu.
Nos Deus ten mizerikórdia.
6 Jeová ta proteje ken ki ka ten spiriénsia.
N staba sen forsa i el salva-m.
7 N* ta ben fika trankuilu otu bês,
Pamodi Jeová trata-m ku bondadi.
8 Bu libra-m di mórti.
Bu pô-m ta para di txora i bu ka dexa nha pé tropesa.
9 N ta ben sirbi Jeová timenti N sta bibu.*
10 N tinha fé, pur isu N pâpia,
Enbóra N staba frontadu dimás.
11 Medu toma kónta di mi i N fla:
“Tudu ómi é mintirozu.”
12 Modi ki N ta paga Jeová
Pa tudu kuza dretu ki el faze pa mi?
13 N ta ben labanta kópu di salvason,*
I N ta ben invoka nómi di Jeová.
14 N ta ben kunpri nhas votu ki N faze pa Jeová
Dianti di tudu se povu.
15 Jeová ta xinti txeu dór*
Óras ki ses sérvu lial ta móre.
16 Ó Jeová, N ta inplora-u pa bu djuda-m,
Pamodi ami é bu sérvu.
Ami é bu sérvu, fidju di bu skrava.
Bu liberta-m di nhas korenti.
17 N ta ben oferese-u sakrifisiu di agradesimentu.
N ta ben invoka nómi di Jeová.
18 N ta ben kunpri nhas votu ki N faze pa Jeová
Dianti di tudu se povu,
19 Na kes pátiu di kaza di Jeová,
Na bu meiu, ó Jiruzalen.
Nhos lova Jeová!*