Salmu
Kántiku di subida.
132 Ó Jeová, lenbra di Davidi
I di tudu se sufrimentu,
2 Di kuzê ki el jura pa Jeová,
Di kel votu ki el faze pa kel Deus Poderozu di Jakó:
3 “N ka ta ben entra na nha ténda, na nha kaza.
N ka ta ben deta na nha kama.
4 N ka ta ben durmi
Nen N ka ta ben fitxa nhas odju,
5 Ti ki N atxa un lugar pa Jeová,
Un lugar bunitu* pa kel Deus Poderozu di Jakó mora na el.”
6 Nu obi ta papiadu di el na Efrata,
Nu atxa-l na florésta.*
7 Nu entra na kel lugar ki el ta mora,
Nu inbaxa dianti di kel bankinhu ki el ta poi pé.
8 Ó Jeová, labanta i ben pa bu lugar di diskansu,
Abo i kel Arka ki ta reprizenta bu forsa.
9 Pa bus saserdóti mostra ma es é justu,
I pa bus sérvu lial grita di alegria.
10 Pamodi Davidi, bu sérvu,
Ka bu nega* kel algen ki bu skodje.
11 Jeová jura pa Davidi,
I el ta ben kunpri se palavra sen falta.
El fla-l: “N ta ben poi un di bus disendenti*
Ta xinta na bu tronu.
12 Si bus disendenti kunpri nha kontratu
I es obi ku lei* ki N da-s,
Ses disendenti tanbê
Ta ben xinta na bu tronu pa tudu ténpu.”
13 Pamodi Jeová skodje Sion.
El dizeja pa el ser se lugar di mora. El fla:
14 “Kel-li é nha lugar di diskansu pa tudu ténpu.
N ta ben mora li pamodi kel-li é nha dizeju.
15 N ta ben abênsua es sidadi ku txeu kumida.
N ta ben da kes algen póbri un monti pon.
16 N ta ben salva kes saserdóti di kel sidadi li,*
I nhas sérvu lial ta ben grita di alegria.
17 La, N ta ben poi Davidi ta ten más puder.*
Dja N pripara un lánpida* pa kel algen ki N skodje.
18 N ta ben bisti ses inimigu di vergónha,
Má koroa* na se kabésa ta ben brilha.”