Salmu
Orason di Davidi.
17 Ó Jeová, obi nha pididu i faze-m justisa.
Presta atenson na nha gritu di ajuda.
Obi nha orason sinseru.
2 Favor, toma un disizon justu pa mi.
Pa bus odju odja kel ki é dretu.
3 Bu izamina nha korason i bu analiza-m di noti,
Bu purifika-m.*
Óras ki bu izamina-m, bu ta odja ma N ka faze planu pa N faze nada mariadu
I ma N ka peka ku nha bóka.
4 Tanbê N ka ta sigi kaminhu di kes algen mau,*
Sima txeu algen ta faze, pamodi N krê obi ku palavra ki ta sai di bu bóka.
5 Djuda-m kontinua ta anda na bus kaminhu,
Asi pa nha pé ka tropesa.
6 Ó nha Deus, N ta txoma-u pamodi N sabe ma bu ta ben responde-m.
Presta atenson na mi.* Obi nhas palavra.
7 Mostra bu amor lial di un manera spetakular,
Abo é Salvador di kes ki ta djobe proteson na bu direita
Pa bu proteje-s di kes algen ki ta rabela kóntra bo.
8 Proteje-m sima bu ta proteje bus odju,*
Sukundi-m na sónbra di bus aza.
9 Proteje-m di kes algen mau ki sta ataka-m,
Di nhas inimigu ki sta serka-m i ki krê mata-m.
10 Ses korason dja bira duru.*
Es ta pâpia ku orgulhu.
11 Gósi, dja es serka-nu.
Es sta ta djobe un oportunidadi pa es pô-nu ta kai.*
12 Kada un di es é sima un lion ki tene gana di dispadasa un animal,
Sima un lion novu ki sta sukundidu prontu pa ataka.
13 Ó Jeová, labanta pa bu infrenta-l i da-l na txon.
Uza bu spada pa bu libra-m* di kes algen mau.
14 Ó Jeová, uza bu mô pa libra-m
Di kes ómi mau di kel mundu li, di kes algen ki ta vive sô pa kel vida li,
Kes ki bu ta da txeu kuza bon
I ki ta dexa un eransa pa ses monti fidju.