Salmu

28 Ó Jeová, nha Rótxa, N ta kontinua ta pidi-u ajuda.

Ka bu para di obi-m.

Si bu fika kaladu,

N ta ser sima kes algen ki ta dixi pa kóba.*

 2 Obi nha súplika óras ki N ta pidi-u ajuda

Óras ki N ta labanta nha mô na direson di kel lugar más santu di bu santuáriu.

 3 Ka bu kastiga-m djuntu ku kes algen mau i ki ta faze kuzas mariadu,

Ki ta pâpia di pas ku ses kunpanheru timenti ses korason sta xeiu di maldadi.

 4 Da-s kel ki es merese,

Di akordu ku kes kuza mariadu ki es ta faze.

Da-s kel ki es merese di akordu ku trabadju di ses mô,

Di akordu ku kel ki es faze.

 5 Pamodi es ka ta presta atenson na kes kuza ki Jeová ta faze,

Nen na trabadju di se mô.

 6 Pa Jeová lovadu,

Pamodi el obi nhas pididu di ajuda.

 7 Jeová é nha forsa i nha skudu.

Nha korason ta kunfia na el.

N resebe se ajuda i nha korason sta kontenti,

Pur isu, N ta ben kanta pa N lova-l.

 8 Jeová ta da se povu forsa.

El é sima un lugar di proteson, na undi se sérvu ki el skodje ta atxa salvason.