Salmu
Salmu di Davidi.
35 Ó Jeová, difende-m di nhas inimigu.
Luta kóntra kes ki ta luta kóntra mi.
2 Panha bu skudu pikinoti* i bu skudu grandi,
I ben difende-m.
3 Labanta bu lansa i bu matxadu di géra kóntra kes ki ta pirsigi-m.
Fla-m:* “Ami é bu salvason.”
4 Pa kes ki krê mata-m* podu na vergónha i umilhadu.
Pa kes ki sta faze planu pa kaba ku mi, fuji ku vergónha.
5 Pa es bira sima padja ki ta bai na béntu.
Pa anju di Jeová kóre ku es.
6 Óras ki anju di Jeová ta pirsigi-s,
Pa ses kaminhu bira sukuru i ta skorega.
7 Pamodi sen ninhun motivu, es sukundi un armadilha pa pega-m.
Sen ninhun motivu, es abri un kóba pa mi.
8 Pa disgrasa panha-s di surpréza.
Pa es pegadu na kel própi armadilha ki es sukundi.
Pa es kai na el i pa es distruídu.
9 Má ami, N ta ben fika kontenti pamodi Jeová.
N ta ben fika kontenti pamodi kes kuza ki el ta faze pa salva-m.
10 Tudu nhas osu ta ben fla:
“Ó Jeová, ken ki é sima bo?
Bu ta libra kel dizanparadu di kes ki é más fórti ki el,
Kel dizanparadu i kel póbri di kes ki ta furta-s.”
11 Tistimunhas mau ta ben kóntra mi,
Es ta akuza-m di kuzas ki N ka sabe nada.
12 Es ta paga-m ben ku mal,
I kel-li ta pô-m ta xinti txeu tristi.
13 Má óras ki es staba duenti, N ta bistiba di panu di saku.*
N ta umilhaba i N ta fazeba jejun,
I óras ki N ta oraba pa es i ka ta binha respósta,
14 N ta andaba ta txora, sima un algen ki perde un amigu ô un irmon.
N ta andaba tristi ku róstu pa txon, sima un algen ki perde se mai.
15 Má kantu N kai, es fika kontenti i es djunta.
Es djunta pa ataka-m sukundidu.
Es kaba ku mi i es ka fika kaladu.
17 Ó Jeová, ti ki ténpu bu ta fika sô ta odja?
Salva-m di kes algen ki ta ataka-m,
Libra nha vida, ki ten txeu valor, di kes lion novu.
18 Nton, N ta ben agradese-u na kongregason grandi.
N ta ben lova-u na meiu di un monti di algen.
19 Ka bu dexa kes ki bira nhas inimigu sen ninhun motivu, fika kontenti ku nha disgrasa.
Ka bu dexa pa kes ki ta odia-m sen ninhun motivu, piska odju ku maldadi.
20 Es ka ta pâpia di kuzas ki ta traze pas,
Má, ku falsidadi, es ta faze planu kóntra kes algen ki ta vive na pas.
21 Es ta abri ses bóka pa akuza-m,
Es ta fla: “Bu faze sin! Nu odja ku nos própi odju.”
22 Ó Jeová, bo tanbê bu odja. Ka bu fika kaladu.
Ó Jeová, ka bu fika lonji di mi.
23 Favor, presta atenson i ben difende-m,
Ó Jeová, nha Deus, difende nha kazu.
24 Ó Jeová, nha Deus, faze-m justisa* di akordu ku bu lei justu.
Ka bu dexa nhas inimigu fika kontenti ku nha disgrasa.
25 Pa nunka es ka fla: “Fórti sábi! Nu konsigi kuzê ki nu kreba.”
Pa nunka es ka fla: “Nu kaba ku el.”
26 Pa tudu es pasa vergónha i pa es umilhadu,
Kes ki ta fika kontenti ku nha disgrasa.
Pa kes ki ta atxa ma es é midjór di ki mi pasa vergónha i pa es umilhadu.
27 Pa kes ki ta fika kontenti pamodi N ta faze kel ki é dretu, grita di alegria.
Pa es fla sénpri:
“Pa Jeová dadu glória. El ta fika kontenti óras ki ses sérvu sta na pas.”
28 Nton, nha língua ta ben pâpia di* bu justisa
I lova-u dia interu.