Salmu
SUGUNDU LIVRU
(Salmus 42-72)
Pa diretor di múzika. Maskil* di kes fidju di Korá.
42 Sima un kórsa ki tene gana di bebe agu,
Ami tanbê N tene gana* di sirbi-u, ó Deus.
2 Sima un algen ki tene sedi di agu, mi tanbê N meste di* Deus, kel Deus bibu.
Ki ténpu ki N ta pode bai i parse dianti di Deus?
3 N ka sta konsigi kume, N sta ta txora dia ku noti.
Dia interu pesoas sta ta faze-m trósa i ta pergunta-m: “Undi ki bu Deus sta?”
4 N ta abri nha korason i N ta lenbra di kes kuza li,
Un bês N ta andaba djuntu ku un monti di algen pa kaza di Deus.
N ta baba ses frenti,*
Nu ta gritaba di alegria na kaminhu i nu ta kantaba pa agradese Deus,
Sima un monti di algen ta komemora un fésta.
5 Pamodi ki N sta dizusperadu?
Pamodi ki N sta fadigadu si?
N ta spera na Deus,
Pamodi inda N ta ben lova-l: el é nha Grandiozu Salvador.
6 Ó nha Deus, N sta dizusperadu.
7 N sta ta obi barudju di agu ta kóre,
Barudju di bus kaxuera.
Prublémas dja toma kónta di mi sima óndias brabu.
8 Di dia, Jeová ta mostra-m se amor lial,
Di noti, N ta kanta sobri el: N ta faze un orason pa Deus di nha vida.
9 N ta pergunta Deus, ki é nha rótxa:
“Pamodi ki bu skese di mi?
Pamodi ki N ten ki anda tristi pamodi nha inimigu sta fronta-m?”
10 Nhas inimigu ta odia-m i es ta faze trósa di mi.*
Dia interu es ta faze trósa di mi i es ta pergunta-m: “Undi ki bu Deus sta?”
11 Pamodi ki N sta dizusperadu?
Pamodi ki N sta fadigadu si?
N ta spera na Deus,
Pamodi inda N ta ben lova-l: el é nha Grandiozu Salvador i nha Deus.