Salmu
Pa diretor di múzika. Pa toka na ton di múzika “Ka bu distrui”. Salmu di Davidi. Mikton.* Kantu Saul manda alguns ómi pa ba fika di guarda na kaza di Davidi,* asi pa es pode mataba el.
59 Ó nha Deus, salva-m di nhas inimigu,
Proteje-m di kes ki ta labanta kóntra mi.
2 Libra-m di kes algen mau
I salva-m di kes ómi violéntu.*
3 Odja! Es ta fika sukundidu pa ataka-m.*
Ó Jeová, ómis fórti sta ta ataka-m.
Má é ka pamodi N rabela ô N peka.
4 Enbóra N ka faze nada mariadu, es ta pripara faxi pa ataka-m.
Favor, óras ki N txoma-u, labanta pa djuda-m i odja kuzê ki es sta ta faze.
5 Pamodi abo, ó Jeová, kel Deus di izérsitu, bo é Deus di Israel.
Labanta i djobe kuzê ki tudu nason sta ta faze.
Ka bu ten péna di ninhun di kes traidor mau. (Selá)
6 Es ta volta sénpri óras ki ta fika noti.
Es ta ronka* sima katxor i es ta faze rónda na sidadi.
7 Odja kuzê ki sta ta sai di ses bóka.
Ses palavra é sima spada,
Pamodi es ta fla: “Ken ki sta ta obi?”
8 Má abo, ó Jeová, bu ta ben ri di es,
Bu ta ben faze trósa di tudu kes nason.
9 Ó nha Forsa, N ta kontinua ta spera pa bo,
Pamodi Deus é nha proteson suguru.*
10 Kel Deus ki ta mostra-m amor lial ta ben djuda-m.
Deus ta pô-m ta odja nhas inimigu ta vensedu.
11 Ka bu mata-s, asi pa nha povu ka skese.
Uza bu forsa pa bu pô-s ta anda atoa.
Ó Jeová, nos skudu, pô-s ta kai.
12 Es ta peka ku ses bóka, ku palavra di ses bóka.
Pa ses orgulhu ser un armadilha pa es,
Pamodi es ta maldísua algen i es ta konta mintira.
13 Kaba ku es na bu raiba.
Kaba ku es pa es ka izisti más.
Pa es fika ta sabe ma Deus ta governa kes disendenti di Jakó i ti kes párti más lonji di téra. (Selá)
14 Pa es volta óras ki fika noti.
Pa es ronka sima katxor i pa es faze rónda na sidadi.
15 Pa es anda atoa ta djobe algun kuza pa kume.
Pa es ka fika fartu nen pa es ka atxa un lugar pa es pasa noti.
16 Má ami, N ta ben kanta sobri bu forsa.
Di palmanhan, N ta ben pâpia ku alegria sobri bu amor lial.
Pamodi bo é nha proteson suguru
I un lugar pa undi N ta fuji óras ki N sta frontadu.
17 Ó nha Forsa, N ta ben kanta lovor* pa bo,
Pamodi Deus é nha proteson suguru, kel Deus ki ta mostra-m amor lial.