Salmu

83 Ó Deus, ka bu fika kaladu.

Ó Deus Santu, ka bu fika kaladu* nen ka bu fika paradu.

 2 Odja! Bus inimigu sta prontu pa briga.

Kes ki ta odia-u sta labanta kóntra bo.*

 3 Sukundidu, es ta faze planu kóntra bu povu.

Es ta faze planu kóntra kes ki ten valor pa bo.*

 4 Es ta fla: “Nu ben, nu kaba ku nason di Israel,

Asi pa nómi di Israel ka lenbradu nunka más.”

 5 Es faze un planu djuntu.*

Es faze un kontratu kóntra bo:

 6 Kes algen di Edon, kes ismaelita, Moabe, kes agarenu,

 7 Kes algen di Jebal, di Amon, di Amaleki,

Di Filístia i kes algen di Tiru.

 8 Asíria tanbê djunta ku es.

Es apoia* kes fidju di Ló. (Selá)

 9 Faze-s kel ki bu faze Midian,

Kel ki bu faze ku Sízera i Jabin, na riu* Kizon.

10 Es distruídu na En-Dor.

Es bira strumu pa txon.

11 Faze ku ses ómi inportanti kel ki bu faze ku Orebe i Zebe

I ku ses líder,* kel ki bu faze ku Zeba i Zalmuna,

12 Pamodi es fla: “Nu ba toma kel téra undi Deus ta mora.”

13 Ó nha Deus, bira-s sima planta séku ki béntu ta leba pa lonji,

Sima padja ki béntu ta leba di un ladu pa kel otu.

14 Sima lumi ki ta kema florésta,

Sima lumi ki ta kema kes monti,

15 Pirsigi-s ku bu tenpistadi

I dizorienta-s ku bu béntu fórti.

16 Ó Jeová, umilha-s,*

Pa es pode djobe bu nómi.

17 Pa es podu na vergónha i pa es fika ku medu pa tudu ténpu;

Pa es umilhadu i pa es dexa di izisti;

18 Pa tudu algen sabe ma bu nómi é Jeová,

I ma é sô bo ki é kel Deus Más Grandi riba téra interu.