Ézudu

31 Jeová tanbê fla Muizés: 2 “Odja, N skodje Bezalel, fidju di Uri, fidju di Ur, di tribu di Judá. 3 N ta ben intxi-l ku spritu di Deus, N ta da-l sabedoria, intendimentu i konhisimentu di tudu tipu di artizanatu, 4 pa faze tudu tipu di trabadju di arti, pa trabadja ku oru, ku prata i ku kóbri, 5 pa korta pédra i pô-s na moldura, i pa faze tudu tipu di trabadju ku madera. 6 Pa djuda-l, N skodje Oliabe, fidju di Aizamaki, di tribu di Dan. Tanbê N ta poi sabedoria na korason di tudu kes ki ten kapasidadi, asi pa es pode faze tudu kel ki N manda-u: 7 kel ténda di runion, kel arka di Tistimunhu i kel tanpa ki sta riba di el, tudu material di ténda, 8 kel méza ku se material, kel kandelabru di oru puru ku tudu se material, kel altar di insénsu, 9 kel altar di oférta kemadu i tudu se material, kel basia i se supórti, 10 kes ropa ki fazedu bunitu, kes ropa sagradu pa Aron, kel saserdóti, kes ropa pa se fidjus pa es ser saserdóti, 11 kel óliu sagradu i kel insénsu purfumadu pa santuáriu. Es ta faze tudu kel ki N manda-u.”

12 Tanbê Jeová fla Muizés: 13 “Fla kes israelita: ‘Sen falta, nhos ten ki kontinua ta guarda nha sábadu, pamodi kel-li é un sinal entri mi ku nhos pa tudu nhos jerason, asi pa nhos fika ta sabe ma ami, Jeová, N sta santifika nhos. 14 Nhos debe guarda sábadu, pamodi el é un kuza sagradu pa nhos. Kenha ki ka ruspeta-l debe matadu. Si un algen* faze algun trabadju na es dia, el debe matadu.* 15 Nhos pode trabadja duránti 6 dia, má sétimu dia é un sábadu di diskansu konplétu. El é sagradu pa Jeová. Ken ki trabadja na dia di sábadu debe matadu. 16 Israelitas debe guarda sábadu. Es debe komemora sábadu duránti tudu ses jerason. Kel-li é un kontratu pa tudu ténpu. 17 Kel-li é un sinal pa tudu ténpu entri mi ku povu di Israel, pamodi na 6 dia Jeová faze séu ku téra, i na sétimu dia el para di trabadja i el kumesa ta diskansa.’”

18 Lógu ki el tirmina di pâpia ku Muizés na monti Sinai, el da-l dôs tábua di Tistimunhu, ki éra dôs tábua di pédra, ki skrebedu na el ku dédu di Deus.