Romanus
11 Nton N ta pergunta: Deus nega se povu? Klaru ki nau! Pamodi ami tanbê é israelita, di disendénsia* di Abraon, di tribu di Benjamin. 2 Deus ka nega se povu, kel ki el skodje* primeru. Nhos ka sabe kuzê ki Skrituras ta fla sobri Elias, kantu el da Deus kexa di Israel? 3 “Jeová,* es mata bus proféta, es ronba bus altar. É sô mi ki fika, i gósi es sta ta tenta tra-m nha vida.”* 4 Má kuzê ki Deus responde-l? “Inda N ten 7 mil ómi ki ka juelha dianti di Baal.” 5 Di mésmu manera, na kel ténpu li tanbê, ten un réstu di israelita ki Deus skodje pamodi se grandi bondadi. 6 Si es skodjedu pamodi kel grandi bondadi, nton é ka através di óbras, sinon kel grandi bondadi ka ta sérba grandi bondadi.
7 Nton kuzê ki nu ta fla? Kel ki Israel staba ta buska ku inpenhu el ka atxa-l, má kes ki skodjedu atxa-l. Kes otu nega obi, 8 sima sta skrebedu: “Deus pô-s na un sónu pizadu, asi pa ses odju ka odja i ses obidu ka obi, ti dia di oji.” 9 Tanbê, Davidi fla: “Pa ses fésta* bira un lasu i un armadilha, un pédra di tropesu i un kastigu pa es. 10 Pa ses odju fika sukuru i pa es ka konsigi odja, i pa bu poi ses kósta ta fika sénpri inkrokadu.”*
11 Nton N ta pergunta: es tropesa i es kai pa tudu ténpu? Klaru ki nau! Má pamodi es ka kunpri lei, pesoas di otus nason ten salvason, i kel-li ta pô-s ta xinti siumis. 12 Nton, si pamodi es viola lei es traze rikéza pa mundu, i pamodi es bira más poku es traze rikéza pa pesoas di otus nason, óras ki kel nunbru bira konplétu, rikéza é mutu más txeu inda!
13 Gósi N sta ta pâpia ku nhos ki é pesoas di otus nason. Dja ki mi é apóstlu pa nasons, N ta da txeu valor pa* nha sirvisu pa Deus, 14 pa N odja si di algun manera N ta pode poi alguns di nha povu ta xinti siumis i salva alguns di es. 15 Dja ki es negadu, kel-la djuda alguns algen na mundu ser amigu di Deus otu bês. Si Deus seta-s gósi é sima ki el sta ta traze-s di mórti pa vida. 16 Tanbê, si kel párti di masa ki ta oferesedu primeru é santu, masa interu tanbê é santu. I si raís é santu, kes ramu tanbê é santu.
17 Má, si alguns di kes ramu kortadu, i abo enbóra bo é olivera brabu, bu inxertadu* na ses meiu i bu pasa ta resebe kes txeu kuza ki sta na raís di kel olivera, 18 ka bu pensa ma abo é midjór di ki kes otu ramu.* Si bu pensa ma abo é midjór,* lenbra ma bu ka ta sustenta raís, má é raís ki ta sustenta-u. 19 Nton bu ta fla: “Alguns ramu kortadu pa N pode inxertadu.” 20 É verdadi! Pamodi ses falta di fé, es kortadu, má abo bu sta di pé pamodi fé. Ka bu ser orgulhozu, má ruspeta Deus. 21 Si Deus ka dexa kes ramu natural, nen bo tanbê el ka ta dexa. 22 Pur isu, pensa na bondadi i na kastigu di Deus. El ta kastiga kes ki kai, má abo el ta mostra-u bondadi, désdi ki bu kontinua na se bondadi, sinon abo tanbê bu ta kortadu. 23 I es tanbê, si es kumesa ta mostra fé, es pode inxertadu, pamodi Deus pode inxerta-s otu bês. 24 Abo bu kortadu di un olivera brabu i bu inxertadu na un olivera ki plantadu, i kel-li é un kuza ki é ka natural. Nton, é mutu más fásil inda pa Deus inxerta kes ramu ki é própi di kel olivera!
25 Pur isu, irmons, N krê pa nhos sabe di kel segredu sagradu li, asi pa nhos ka pensa ma nhos ten sabedoria: un párti di Israel nega obi ti ki nunbru di kes algen di otus nason fikaba konplétu. 26 Di kel manera li, Israel interu ta ben ser salvu, sima sta skrebedu: “Kel salvador* ta sai di Sion i el ta ben djuda Jakó afasta di kes kuza mariadu. 27 I kel-li é nha kontratu ki N ta ben faze ku es, óras ki N tra-s ses pekadu.” 28 É verdadi ki es éra inimigus di kes notísia sábi, i kel-li djuda nhos. Má Deus skodje-s i el ama-s pamodi ses gentis grandi. 29 Deus ka ta rapende di se prezentis ô di kes ki el txoma. 30 Antis nhos ka ta obiba ku Deus, má gósi el trata nhos ku mizerikórdia pamodi ses dizobidiensa. 31 Gósi tanbê, es ka sta ta obi i Deus mostra mizerikórdia pa nhos, asi pa es mostradu mizerikórdia sima nhos tanbê. 32 Pamodi Deus poi tudu es prézu na dizobidiensa pa el pode mostra mizerikórdia pa es tudu.
33 Rikéza, sabedoria i konhisimentu di Deus ka ten limiti! Ningen ka ta pode intende se julgamentu i ningen ka ta pode sabe se kaminhu! 34 Pamodi “kenha ki txiga di konxe menti di Jeová,* i kenha ki pode da-l konsedju?” 35 Ô “kenha ki da Deus algun kuza primeru, di manera ki Deus ten ki paga-l?” 36 Pamodi tudu kuza ben di el, es izisti através di el i pa el. Pa el dadu glória pa tudu ténpu. Amén.