Ebreus

1 Dja ten txeu ténpu ki Deus pâpia pa nos gentis grandi através di profétas, txeu bês i di txeu manera. 2 Gósi, na fin di kes dia li, el pâpia ku nos através di un Fidju, kel ki el skodje pa ser erderu di tudu kuza, i através di el, el faze tudu kuza ki ta izisti.* 3 El mostra glória di Deus di manera perfeitu. El é kópia izatu di Deus, i el ta sustenta tudu kuza através di se palavra poderozu. I dipôs ki el purifika nos pekadu, el xinta na direita di kel Deus Grandi, na altura. 4 Di kel manera li, el bira mutu más grandi di ki anjus, dja ki el erda un nómi mutu más grandi ki di ses.

5 Pur izénplu, kal di kes anju ki Deus fla algun bês: “Abo é nha fidju i oji N bira bu pai”? I tanbê: “N ta ben bira se pai i el ta ben bira nha fidju”? 6 Má, óras ki el torna traze se primeru Fidju pa téra, el ta fla: “Pa tudu anju di Deus inbaxa se dianti.”

7 Tanbê, el ta fla sobri anjus: “El ta faze se anjus spritu, i se sérvus* sima un lumi ki ta arde.” 8 Má sobri Fidju, el ta fla: “Deus é bu tronu pa tudu ténpu, i vara di bu Reinu é vara di justisa. 9 Bu ama justisa i bu ôdia kes kuza ki é kóntra lei. É pur isu ki Deus, bu Deus, skodje-u ku óliu di alegria más di ki bus kunpanheru.” 10 Tanbê el ta fla: “Ó Sinhor, na komésu bu lansa kes alisérsi di téra, i séu é trabadju di bu mô. 11 Es ta ben dexa di izisti, má abo bu ta kontinua pa tudu ténpu. Es ta ben gasta sima un pésa di ropa, 12 i bu ta ben rola-s sima un kapa, sima un pésa di ropa, i es ta ben trokadu. Má abo é kel mê, i bus anu nunka ka ta kaba.”

13 Má sobri kal di kes anju ki el fla algun bês: “Xinta na nha direita, ti ki N poi bus inimigu dibaxu di bu pé”?* 14 Tudu es é ka spritu pa faze sirvisu sagradu, ki mandadu pa sirbi kes ki ta ben erda salvason?