Juízis
12 Nton, kes ómi di tribu di Efrain djunta, es trabesa riu, es bai ti Zafon* i es fla Jefté: “Pamodi ki bu ka txoma-nu pa bai ku bo kantu bu trabesa riu Jurdon pa ba luta kóntra kes amonita? Nu sta ba kema bu kaza ku bo la déntu.” 2 Má Jefté fla-s: “Mi ku nha povu, nu staba na un grandi prubléma ku kes amonita. N txoma nhos pa ben djuda-m, má nhos ka ben salva-m di ses mô. 3 Kantu N odja ma nhos ka staba ta ben djuda-m, N disidi poi nha vida na prigu* i ba luta kóntra kes amonita, i Jeová intrega-s na nha mô. Nton, pamodi ki oji nhos sta ben luta kóntra mi?”
4 Dipôs, Jefté djunta tudu kes ómi di Jiliade, i es luta kóntra Efrain. Kes ómi di Jiliade vense Efrain, ki dja flaba es: “Enbóra nhos ki é di Jiliade nhos ta mora na tiritóriu di Efrain·i di Manasés, nhos ka ta pasa di un grupu di algen ki fuji di Efrain.” 5 Nton, kes ómi di Jiliade toma kes lugar ki ta daba pa trabesa Jurdon ku pé i es poi alguns trópa na kes lugar pa ka dexaba kes ómi di Efrain fujiba. Óras ki un ómi di Efrain ta tenta fujiba, el ta flaba: “Dexa-m pasa.” Kes ómi di Jiliade ta perguntaba el: “Abo é di Efrain?” I óras ki el flaba: “Nau!” 6 Es ta flaba el: “Favor, fla xiboleti.” Má el ta flaba “siboleti”, pamodi el ka ta konsigi flaba kel palavra dretu. Nton, es ta pegaba el i es ta mataba el pértu di kes lugar ki ta daba pa trabesa Jurdon ku pé. Di kel manera li, es mata 42 mil algen di tribu di Efrain na kel ténpu.
7 Jefté, kel jiliadita, julga Israel duránti 6 anu. Dipôs ki el móre el interadu na se sidadi, na Jiliade.
8 Dipôs di el, Ibzan di Belen, bira juís na Israel. 9 El tinha 30 fidju-fémia i 30 fidju matxu. El kaza ses fidju-fémia ku ómis di otus família i el traze 30 mudjer di otus família pa kaza ku ses fidju matxu. El julga Israel duránti 7 anu. 10 Dipôs, Ibzan móre i el interadu na Belen.
11 Dipôs di el, Elon di Zebulon,·bira juís di Israel. El julga Israel duránti 10 anu. 12 Dipôs, Elon di Zebulon,·móre i el interadu na sidadi di Aijalon, na téra di Zebulon.
13 Dipôs di el, Abdon, fidju di Ilel di Piraton, bira juís di Israel. 14 Abdon tevi 40 fidju i 30 nétu. Tudu kes 70 algen tinha ses própi buru pa monta. Abdon julga Israel duránti 8 anu. 15 Dipôs, Abdon, fidju di Ilel di Piraton, móre i el interadu na Piraton, na téra di Efrain, na kel monti ki amalekitas ta moraba.